Blasi Sturka 5 - DAWAN BÎLA AISKA

Adam kiamka nani ba

¹ Naha sika Adam kiamka nani wauhkataya ba. Baha yua Gâd upla ba paskan bara ai lilka ba kat paskan;

² waitna bara mairin paskan. Witin nani ra yamni munan, paskan ba yua wina. Witin nani ba upla mâkan.

³ Bara Adam mani 130 alkan ba ra, ai luhpia waitna kum baikan, witin wal ai talia pali, ai lilka talia kat, bara nina ba Set mâkan.

⁴ Bara Adam, Set baikan ba ningkara witin kau ban raya kan mani 800 kat. Ai luhpia waitna bara mairin nani sin brin.

⁵ Bara Adam ai rayaka yua nani sut tasba ra raya iwan ba mani 930. Baha ningkara pruan.

⁶ Set 105 mani alkan, bara ai luhpia Enós brin.

⁷ Bara Set, Enós brin ba ningkara, 807 mani alkan. Bara ai luhpia waitna bara mairin nani sin baikan.

⁸ Bara Set ai rayaka yua nani sut ba 912 mani tasba ra raya iwan. Baha ningkara pruan.

⁹ Enós mani 90 alkan ba ra ai luhpia Cainán baikan.

¹⁰ Bara Enós Cainán brin ba ningkara, mani 815 alkan bara ai luhpia waitna bara mairin nani sin baikan.

¹¹ Bamna Enós ai rayaka yua sut pali tasba ra iwan ba 905 mani. Baha ningkara pruan.

¹² Cainán 70 mani alkan ba ra ningkara, ai luhpia Mahalalel brin.

¹³ Bara Cainán ba Mahalalel baikan ba ningkara, 840 mani alkan bara ai luhpia waitna nani bara mairin nani baikan.

¹⁴ Bara Cainán ai rayaka yua nani sut tasba ra raya iwan ba 910 mani. Baha ningkara pruan.

¹⁵ Mahalalel ai rayaka yua nani 65 mani alkan ba ra, ai luhpia Jéred brin.

¹⁶ Bara Mahalalel, Jéred baikan ba ningkara, 830 mani alkan bara ai luhpia waitna bara ai luhpia mairin nani baikan.

¹⁷ Bara Mahalalel ai rayaka yua nani sut tasba ra raya iwan ba 895 mani. Baha ningkara pruan.

¹⁸ Jéred 162 mani alkan ba ra ai luhpia Henoc brin.

¹⁹ Bara Jéred, Henoc baikan ba ningkara 800 mani alkan bara ai luhpia waitna bara ai luhpia mairin nani kau ailal baikan.

²⁰ Bara Jéred ai rayaka yua nani sut tasba ra iwan ba 962 mani alkan. Baha ningkara pruan.

²¹ Henoc ai rayaka yua nani ba 65 mani alkan ba ra ai luhpia Matusalén baikan.

²² Bara Henoc Gâd wal wapan, Matusalén baikan ba ningkara 300 mani alkan ba ra ai luhpia waitna nani bara ai luhpia mairin nani baikan.

²³ Bara Henoc ai rayaka yua nani sut tasba ra iwan ba 365 mani.

²⁴ Henoc Gâd wal wapan bara witin tauki kan ba wina yu kum ban lap tiwan, kan Gâd mita witin ba brih wan bamna.

²⁵ Bara Matusalén ai rayaka yua nani 187 mani alkan ba ra, ai luhpia Lámec brin.

²⁶ Matusalén Lámec baikan ba ningkara ai rayaka yua nani ba 782 mani iwan. Baha ningkara ai luhpia waitna bara mairin nani sin baikan.

²⁷ Matusalén ai rayaka yua nani sut tasba ra iwan ba 969 mani. Baha ningkara pruan.

²⁸ Lámec ai rayaka yua nani 182 mani alkan, bara ai luhpia waitna kum baikan;

²⁹ bara ai nina ba Noa mâkan, bara win: “Kan Dawan mita tasba ba lahtuban bara wan mihta warkka karna nani yawan takbia mangki sakaia dukiara; sakuna naha tuktika baha pâtka wina pri wan sâkbia.”

³⁰ Bara Lámec ai rayaka yua nani iwan ba, Noa baikan ba ningkara, 595 mani alkan, baha ningkara ai luhpia waitna bara mairin nani baikan.

³¹ Bara Lámec ai rayaka yua nani sut tasba ra raya iwan ba 777 mani alkan. Baha ningkara pruan.

³² Bara Noa 500 mani alkan ba ra witin Sem, Cam, Jafet baikan.