Blasi Sturka 47 - DAWAN BÎLA AISKA

¹ Josep king fero ra wan bara naha sturka ba win. Yang aisiki, bara muihki nani sin, Kenan tasbaya wina pat balan. Witin nani pat Gosen ra bâra sa ai sîpka mairin, ai bîpka nani bara ai dukia wala nani sin sut bri balan.

² Bara witin ai muihni nani matsip ba brin ba ra, witin nani ba king fero mawanra bri si marikan witin aikuki kakaira takaia dukiara.

³ Bara king fero witin nani ra makabi walan: —¿Man nani dîa warkka daukisma? Witin nani pana witin ra win: —King man albikam nani, yang nani lika sîp mai kaiki sepad nani aimakisna, damiki nani warkka kan ba ban daukisna.

⁴ Yang nani balri naha kuntrika ra takaskaia, kan Kenan ra plun tiwan tara bâra sa, twi sin âpu yang sîp nani pata. Pliskam pali, king, man âu wis bara yang nani Gosen tasbaya ra takaski iwamna.

⁵ Bara king fero kli Josep ra win: —Man aisikam bara muihkam nani man wal nâra iwaia aidrubi balan sa.

⁶ Idsip tasbaya ra witin nani ai mihta ra sa. Gosen tasbaya ba witin nani ra yas, baha tasbaya ba kau pain sa Idsip tasbaya aiska ra. Witin nani bahara takaski iwbia. Bara witin nani ai tilara waitna nani diara daukaia sip nani ba bâra sa kaka, witin nani ba yang daiwri nani main kaikaia warkka ba daukaia yas.

⁷ Josep ai aisika sin brih wan king fero ra marikaia. Jekob king fero ra kulkanka tara wal lakula daukan,

⁸ bara king fero witin ra makabi walan: —¿Man pat mani an brisma?

⁹ Jekob pana witin ra win: —Nanara pat 130 mani brisna, bara tasba kumi wina ban tasba wala kat impaki watauki ban sna. Ban mani ailal pali lika briras sna, sakuna piua saura nani baman brisna. Damiki nani ai rayaka yua nani ra iwan ba yua nani praiska kat sin kau alkras sna.

¹⁰ Witin wal baku ai lakula daukan ba ningkara, Jekob witin ai lakula win bara mahka taki wan.

¹¹ Bara Josep Idsip tasbaya ra tasba kau pain ba witin nani ra yan. Witin nani bahara iwan, king fero adarka win ba kat. Bara baku Josep aisika, muihnika nani sin Ramsés tasba pain kum brin bâra iwaia.

¹² Baha purkara Josep ba, witin nani watla bîla kumi bani ra plun yabi kan, witin nani briaia kan ba praiska ba kat.

Upla nani lalahka danh takan bara lâ wala daukan ba

¹³ Kuntri aiska ra tawan kumi bani ra, plawar âpu sut danh takan kan. Plun tiwan ba yu bani kau tara taki kan. Idsip baku Kenan ra sin sanglang ba mita upla sut swapni taki prui kan.

¹⁴ Idsip bara Kenan uplika nani plun atki kan lalahka ba Josep atia brin, bara king watla ra bri si suni swin.

¹⁵ Idsip bara Kenan uplika nani sut lalahka danh takan. Bara Idsip uplika nani, Josep ra wan baha tânka ba wiaia. Bara witin nani naku witin ra win: —Nanara man wina yang nani ra plun piaia aik. ¿Aitani sa ki yang nani na ai swirka sanglang bla pruaia, yang nani lalah âpu sna ba tâwan?

¹⁶ Bara Josep pana witin nani ra win: —Nanara man nani lalahkam danh kaka, daiwram nani ba plun mana bri bal bara plun maikamna.

¹⁷ Bara Idsip uplika nani ba, ai araska nani, ai sîpka, ai bîpka mairin nani bara birikuka wainhka nani ba Josep ra bri si yaban. Bara baha daiwra nani ba mana, Josep witin nani ra mani aiska piaia pata plawar yaban.

¹⁸ Sakuna mani kum alki luan ba ra, kli mani raya wala ra diman ba ra, upla nani ba kli bal Josep ra aisi, win: —Pâtki wahwisna na, yang nani lika man wina sip yukukras param mai wiaia sna, yang nani lalah âpu; baha purkara, nanara yang nani daiwri nani ba sin man daiwram nani takan. Bara kau diara wala yang nani âpu sna man ra maikaia, kau yang nani wîni tara na bara tasbayi ba baman sa.

¹⁹ Bamna plun mana tasbayi na bara yang nani wîni tara na sin atki bris. Bara yang nani king fero albika takamna bara tasbayi ra yang nani witin ai warkka dauki kamna. Sakuna baha sim saumuk ba man wina wankma kaka baha wal raya kamna, bara tasba ba sin bahki bîla baman bâra kabia apia. ¿Nahki muni man bui yang nani na ban ai swirka tasbayi aikuki prui tiwamna?

²⁰ Bara Josep Idsip tasbaya aiska ba king fero tasbaya kaia atkan. Idsip uplika nani ai tasbaya nani ba atkan, plun tiwan pâtka tara kuntri bilara iwan bamna. Bara baku baha tasbaya ba purara, king fero ai karnika ba yaban alki brin.

²¹ Baku sin Idsip uplika nani Idsip tasbaya aiska ra ba, witin ai albika nani takan.

²² Prîs nani tasbaya baman lika Josep atkras ban swin kan, king fero wina witin nani ra ban plawar wiria yabi kan bamna. Baha mita witin nani ai tasbaya ba atkras kan, king fero yabi kan ba wina pi kan ba mita.

²³ Bara baha sut atkan ningkara Josep upla nani ra win: —Nanara man nani wînam tara ba, tasbayam nani ba sin sut king fero dukia sa, kan yang bui man nani ba mai atkri king fero dukia kaia dukiara. Bamna nanara man nani plun saumukka nani ba nâra brisma, tasba ra baha mâ nani mangkaia.

²⁴ Plawar mâ dâkisma piua ra, mâ nani sut krikuma ba wina, mânka matsip ba king ra yabi kama. Bara baha wina kau tâka swin ba wina saumuk ba sâkma ba ra, man nani patam sin brima, bara tamya nani pata sin brima.

²⁵ Bara upla nani ba witin ra win: —Man bui yang nani ra yamni pali ai munisma, rayaki nani swaki sakisma. ¡Bamna yang nani king fero albika takamna!

²⁶ Baku Josep Idsip tasbaya aiska ra lâ mangkan, upla sut insla dâki ba wina baha mânka matsip ba king fero ra yabi kabia. Bara baha lâka ba naiwa kat ban kulkisa; sakuna prîs nani lika tasba lal mana aibapras, kan witin nani ai tasbaya ba lika king fero dukia apia sa bamna.

Jekob makabanka lâs ba

²⁷ Israel luhpia nani Idsip tasbaya ra takaski bâra iwan. Gosen tasbaya ba witin nani ai tasbaya brin, bara bahara sahwi upla ailal pali takan.

²⁸ Jekob 17 mani Idsip ra iwi kan, bara ai rayaka yua nani ba 147 mani alkan.

²⁹ Yu kumi Israel ai dara walan, witin ba pruaia pat baila sa. Bara ai luhpia Josep ba paiwan witin ra sturi wiaia: —Man naku diara kum dauki aikaia brin mai daukisa kaka, nanara yang karniki ra alki tâi baiks. Bara yang dîa man ra makabamna ba daukaia swer taki aisas. ¡Pliskam pali, Idsip tasbaya ra lika ai bikpara!

³⁰ Yang damiki nani aikuki mahka ris briaia wamna ba ra, Idsip wina ai sâks bara witin nani raitka ra bri si ai biks witin nani lamara. Josep witin ra win: —Man ai wisma ba baku yang daukamna.

³¹ —¡Yang ra swer taks! —ai aisika taibi aisin. Josep witin ra swer taki aisin, bara Israel ai krikrika wihta ra ai lal makupan.