Blasi Sturka 46 - DAWAN BÎLA AISKA

Jekob Idsip ra wan ba

¹ Israel ai dukia nani sut wahbi brih mahka yabal ra impakan. Witin Beerseba kat wan, bahara ai aisika Aisak Gâdka ra sakripais kum dauki yaban.

² Baha tihmika yaprisauhkan ra diara aihka kaikan, Gâd lika Israel wal aisin, nina mâki winan, Jekob. Witin pana win: —Yang nâra sna.

³ Bamna Gâd bila: —Yang na Gâd, man aisikam Gâdka ba. Man Idsip ra waia si bripara, bahara man kiamkam ba nisan tara daukamni.

⁴ Man wal Idsip ra wamni, bara yang mita kli man kiamkam ba, Idsip wina bri sal sakamna. Baha purkara man pruma ba ra, Josep man lamamra bâra kabia.

⁵ Bara baha ningkara Israel, luhpia nani, ai aisika, tuktan nani ba, mairin nani sut ba wagin ra sunan king fero wina witin brih waia blikan ba waginka nani ra; bara Beerseba wina mahka taki wan.

⁶ Jekob ai uplika nani sut aikuki buan, ai bîpka nani, ai sîpka bara ai dukia nani sut Kenan ra bri kan ba, brih Idsip ra wan.

⁷ Ai luhpia waitna, bara mairin nani ba sut, baku sin ai mula waitna nani, ai mula mairin nani sin sut, aikuki brih wan.

⁸ Israel luhpia, Jekob kiamka nani Idsip ra aidrubi wan nani ba nina nani: Ruben, Jekob tawahkia ba.

⁹ Ruben luhpia waitna nani ba: Hanoc, Falú, Hesrón bara Carmí.

¹⁰ Simian luhpia waitna nani ba: Jemuel, Jamín, Óhad, Jaquín, Sóhar bara Saúl. Saúl yaptika ba Kenan wina.

¹¹ Libai luhpia waitna nani ba: Guersón, Quehat bara Merarí.

¹² Juda luhpia waitna nani ba: Er, Onán, Selá, Fares bara Zérah. (Er bara Onán lika Kenan ra pruan.) Fares luhpia waitna nani ba: Hesrón bara Hamul.

¹³ Isacar luhpia waitna nani ba: Tolá, Puvá, Job bara Simrón.

¹⁴ Zabulón luhpia waitna nani ba: Séred, Elón bara Jahleel.

¹⁵ Naha nani nina mâkan ba sika Jekob, Padán-aram ra iwi kan ba piua ra, ai maya Lea wal ai luhpia nani baikan ba, baha purkara ai luhpia mairin Dina sin. Bamna ai kiamka waitna nani bara mairin nani sut ba asla 33 kulkan sa.

¹⁶ Gad luhpia waitna nani ba: Sefón, Haguí, Esbón, Suní, Erí, Arod bara Arelí.

¹⁷ Aser luhpia waitna nani ba: Imná, Isvá, Isví, Beriá bara ai lakra ba sin nina Sérah. Beriá luhpia waitna nani ba wâl kan: Héber bara Malquiel.

¹⁸ Naha nani sin Jekob luhpia waitna nani ai albika mairin Zilpá wal baikan ba. Labán wina sika, ai albika mairin Zilpá ba ai luhpia mairin Lea ra prisant yaban; bara witin wina sika, Jekob ai kiamka nani sut ba 16 sakan.

¹⁹ Jekob maya mairin wala ba Raquel; luhpia waitna nani ba nina Josep bara Benjamín.

²⁰ Josep luhpia waitna nani wâl, Asenat wal Idsip ra baikan nani ba nina: Manasés bara Efraín. Asenat ba, On Potifera prîska ba luhpia mairin.

²¹ Benjamín luhpia waitna nani ba: Bela, Béquer, Asbel, Guerá, Naamán, Ehi, Ros, Mupim, Hupim bara Ard.

²² Naha kat Raquel Jekob wal kiamka nani ba, 14 upla kulkan sa.

²³ Dan luhpia waitna ba: Husim.

²⁴ Neftalí luhpia waitna nani ba: Jahseel, Guní, Jezer bara Silem.

²⁵ Naha nani sin Jekob luhpia waitna nani Bilhá baikan ba. Bilhá ba sin Labán albika mairin kan, bara witin ai luhpia mairin Raquel ra prisant yaban, bara witin wina ai kiamka nani ba upla 7 sakan.

²⁶ Upla nani sut Jekob wal Idsip ra wan ba, witin ai tâlia wina ai kiamka nani sahwan kan ba baman 66. Ai luhpia waitna nani, maya nani ba lika naha nani tilara kulkras kan.

²⁷ Josep luhpia waitna nani ba wâl kan, baha nani Idsip ra kan ba piua ra baikan ba. Bamna baha nani sut ba ra lika 70 upla nani Jekob kiamka wina Idsip ra wan.

Jekob ai luhpia nani aikuki Idsip ra wan ba

²⁸ Jekob bui Juda ai kanra Josep ra blikan maisa pakaia, witin Gosen ra wabia, bara Josep witin wal bahara prawaia.

²⁹ Bara Josep ai albika nani ra win, ai waginka ridi daukbia witin ai aisika aula ba wal prawaia waia ba ra. Witin wih ki ai papika wal prawan ba ra, kiaubi alki brin ai pahpaya ra bara alki aihwa inan.

³⁰ Baha ningkara Israel ai luhpia Josep ra win: —Naiwa yang naikra ni mai kaikisna man kau raya sma ba, bamna nanara yang pruaia sip sna.

³¹ Bamna Josep ai muihni nani ra bara ai papika taika nani sut ra sin win: —Nanara yang lika king fero wal aisaia auna, naha sturka na wiaia. Yang bui witin ra wimna muihki nani, aisiki taika nani Kenan ra iwi kan ba, witin nani balan nahara yang wal takaskaia.

³² Bara witin nani ai sîpka mairin, ai bîpka mairin nani sin sut bri balan, ai dukia wala nani sin. Witin nani ai warkka ba sika sîp bara bîp nani sahwaia ba.

³³ Bahamna king fero man nani mai paiwi bara dîa warkka daukisma tânka walbia kaka,

³⁴ man nani bui witin ra wima, damikam nani ai warkka bri kan warkka ba ban daukisma: sîp nani main kaikisma. Baku wima ba ra man nani sip kama, Gosen tasbaya ra maikka iwaia. Idsip uplika nani sika, lâ brisa sepad nani aikuki asla iwaia ba saura kulkisa.