Blasi Sturka 32 - DAWAN BÎLA AISKA

Jekob Isau wal prawan ba

¹ Jekob sin ai yabalka ra wan, bara Gâd insalka nani yabal ra witin wal prawan.

² Jekob witin nani ba kaikan bara witin naku aisin: “Naha uplika nani na Gâd uplika kwâra kum sa.” Bamna witin baha pliska nina ba Mahanaim mâkan.

³ Bara Jekob uplika nani ba wal ai muihni ra ai bîla smalki, Seír tawanka ra blikan wan. Baha lika Edom tasbaya ra, ai muihni Isau ra ai bîla blikan wan, witin kaikaia aula ba dukiara.

⁴ Bara witin nani ra, ai bîla naku smalkan: “Man nani muihki Isau ra wis: ‘Muihkam Jekob, naha bîla nani yang nani ra ai win, bal man ra mai wiaia: Yang naha piua nani sut ba Labán wal takaski kapri;

⁵ nanara yang bîp, biriku, albiki waitna, albiki mairin nani sin brisna. Bamna yang naha bîla na dawanki ra blikisna bara brin ai daukisa witin nanara yang ra yamni ai lukbia.’ ”

⁶ Jekob bîla twatwilkra nani ba wih kli balan, bara witin nani Jekob ra naku win: —Muihkam Isau kaikaia yang nani wari, bîlam blikram ba wîri. Nanara witin sin waitna 400 brih aula man wal prawi lamkula daukaia.

⁷ Jekob baha bîla walan bara sibrin pali daukan, kasak ai kupia wal aisin. Bara witin ai uplika nani ba daknika wâl daukan, sîp nani, bîp, bara kiamil nani ba sin sut daknika wâl daukan.

⁸ Witin naku luki kaikan: “Isau daknika kum na mapara bal sauhkbia kaka, daknika wala ba pan yukuwi swak takbia.”

⁹ Bara baha luki Jekob mahka ai pura sunan: “Gâd, damiki Ebraham, aisiki Aisak Gâdka, man ai wiram yang taiya nani tilara, tasbayi ra kli tawi wamna kaka man mita daukma yabalki ra diara nani sut yamni man takaia.

¹⁰ Kupiam yamnika, kupiam pihni lâka nani sut man bui yang ra daukram ba, baha yamnika nani ba yang briaia aitani apia sna. Jordan awala na yang lui wari, bara brih waia dus kumi baman mihti ra bri katna. Bara nanara yang luhpi nani ailal pali, kiamp wâl pitka kat brisna.

¹¹ Mamkabisni, Dawanki, muihki Isau mihta wina ai dakbi ai sâks. Sibrin ai daukisa witin bal yang wal aiklabi ai ikbia, mayi nani sin ikbia bara luhpi nani sin sut iki tikbia.

¹² Kan man param pali ai wiram bamna, man bui diara sut daukma ba yang dukira, yamni baman takbia; bara yang kiamki nani ba ailal pali aihwa takbia kabu un ra auhya ailalka nani sip kulki sakras ba baku.”

¹³ Baha tihmika Jekob bahara yapan, bara ai mihta ra dîa bri kan ba wina ai muihni Isau ra prisantka nani yabaia daiwra nani bâk sakan nani ba naku kata:

¹⁴ guts mairin 200, 20 guts wainhka, 200 sîp mairin, 20 sîp wainhka,

¹⁵ kiamil 30 luhpia sirpi nani tnaya ra, 40 bîp mairin, bîp wainhka matawalsip, 20 biriku mairin bara biriku wainhka matawalsip.

¹⁶ Baha kulki sakan ba ningkara, daiwra daknika kumi bani ba ai albika bani mihta ra mangkan, bara witin nani ra win: —Man nani tâura waps, sakuna asla lika apia, kumi bani daknikam kat ilihwi wapi bas.

¹⁷ Tâura blikan ba albika ra win: —Man muihki Isau wal prawma ba ra, witin mamkabi walbia, man dawankam ba ya, bara man anira auma, daiwan nani ba ya dukia brih auma,

¹⁸ bara man pana witin ra wis: ‘Dawanki, Isau bui naha na man prisantkam, Jekob dukiam dadaukra ba wina naha man ra blikan. Bara witin sin yang nani ninira aula sa.’

¹⁹ Bara baku witin ai albika wala ba ra, yumhpika ra, wala nani sut ba ra sin baku daukbia win: —Man nani sin Isau wal prawma ba ra, tâura dîa aisin baku aisas,

²⁰ bara man nani sin witin ra wis: ‘Jekob dukiam dadaukra ba witin sin yang nani ninira aula sa.’ Kan Jekob ai kupia ra naku lukan: “Ai prisantka nani ba pas yang tâiura blikamna kaka, bara baha ni witin ai kupia baiwanka ba lilia daukamna, bara baha ningkara yang mawan kaikamna kaka, ban kra witin yamni ai bribia.”

²¹ Bara baku, baha prisantka nani pas witin ai tâura ai kanra bliki si, witin lika kiamp ra takaski tihmia bahara yapan.

Insal kum Jekob wal aitwakan

²² Baha tihmika Jekob buan, bara ai maya wâl ba, ai albika mairin wâl ba, ai luhpia nani 11 ba sut ai lamara brin bara Jaboc awala puswi luaika bâk puswi lui awala baila wala ra baha nani ba bri si swin.

²³ Ai dukia nani bâra bri kan ba sin sut awala baila wala ra lukan.

²⁴ Jekob witin yakan kiamp ra takaskan bara baha tihmika waitna kumi witin ra balan bara witin ra alki wal aitwaki kan, ban lalma kahbaia kat.

²⁵ Bara waitna ba kaikan Jekob kau karna, witin mita sip pura luras kan, bara Jekob kilka dusa ra prukan, bara ai kuhma dusa dingkanka ba kat snikwan.

²⁶ Bara waitnika bui witin ra win: —Ai swis, pat lalma kahban bamna. Sakuna Jekob pana witin ra win: —Yang mai swimna apia, man yamnikam aikras sma kaka.

²⁷ Waitna ba witin ra makabi walan: —¿Man ninam ba dîa? Jekob pana win: —Yang nini Jekob.

²⁸ —Ninam Jekob ba, ban baku mâki kabia apia. Nanara wina man ninam ba Israel mâkan kabia, kan Gâd wal bara upla wal sin aitwaki man ban pura luram bamna.

²⁹ Bara Jekob pana witin ra makabi walan: —Nanara man sin ninam ba ai wis. Sakuna waitna ba pana witin ra win: —¿Dîa muni man bui yang nini makabi walisma? Bara baha kat waitna ba Jekob ra ai yamnika ba yaban.

³⁰ Bara Jekob baha tasbaya nina ba Penuel mâkan. Witin win: “Yang lika Gâd mawan ba laima kat kaikri, ban sakuna, yang kan pruras kau raya sna.”

³¹ Yu kalwi ulan ba ra, Jekob Penuel wina taki wan; sakuna ai kilka dusa latwan bri kan bamna, prutwi wan.

³² Baha mita Israel luhpia nani ba, baha piua wina ban naiwa kat, daiwan kilka dusa wakia nani ba piras, Jekob ra kilka dusa kat pruki latwan yaban bamna.