Blasi Sturka 30 - DAWAN BÎLA AISKA

¹ Raquel kaikan witin sip Jekob luhpia baikras kan, bara ai muihni Lea ra tuman lâka brin bara Jekob ra aisi kan: —Yang ra sin luhpi nani aik, apia kaka pruamna.

² Bara Jekob Raquel mapara ai kupia sauhki, aisi, win: —¿Dîa yang na Gâd? Witin sika man luhpiam nani maikras ba.

³ Bara Raquel witin ra win: —Kaiks yang albiki mairin Bilhá ba nâra sa. Man witin wal praws, bara ai luhpia nani baikbia ba ra, luhpia nani ba yang pali luhpi baikri baku kulkamna. Bara baku yang luhpi nani brimni.

⁴ Bara baku natka ra Raquel ai albika mairin ba ai maya Jekob ra yan wal briaia. Jekob witin wal prawan ba ra,

⁵ Bilhá kwihra tiwan bara Jekob luhpia waitna kum baikan.

⁶ Bara Raquel aisin: “Yang puri sunra ba Gâd walan, bara lâ wapni yang wal daukan, luhpi waitna kum aikan.” Bamna ai nina ba Dan mâkamna.

⁷ Bilhá kli kwihra tiwan bara Jekob luhpia waitna wala kum baikan,

⁸ bara Raquel win: “Naha tukta na nina Neftalí mâkan kabia, kan yang muihki wal blahwi karna aitwaki pura luri bamna.”

⁹ Lea kaikan witin kau luhpa baikras takaskan, bara ai napakan mairin Zilpá ba Jekob ra yan ai maya briaia.

¹⁰ Bara Lea albika mairin Zilpá Jekob luhpia waitna kum baikan ba ra,

¹¹ Lea aisin: “¡Naha lika luk pain sa! Ba mita ai nina ba Gad mâkan kabia.’’

¹² Baha ningkara Zilpá kli Jekob luhpia waitna wala baikan,

¹³ bara Lea aisin: “Yang lilia ai daukisa! Nanara mairin nani wibia yang lilia sna. Bamna tukta na nina Aser mâkan kabia.’’

¹⁴ Yu kumi Ruben plawar mâ krikaia piua ra, insla ra taki wan. Bara luhpa baikaia natka mâ nani sakan nina ba mandrak, bara witin dusa mâ ba ai yaptika Lea ra bri si yaban. Bara Raquel sin dusa mâ nani ba kaikan, bamna Lea ra win: —Luhpiam dus mâ nani bri balan ba wina pliskam yang ra sin mâ wâl aik.

¹⁵ Bara Lea pana witin ra win: —¿Man pat mayi ai dakbi brisma, bara witin wal aitani sma apia? ¿Bara nanara luhpi dus mâ sal aikan ba sin man kli ai dakbi briaia lukisma? Bara Raquel kli aisin: —Baha luhpa baikaia saika mâ nani luhpiam bri balan ba, yang ra sin aik bara baha mana man naha tihmia Jekob wal yaps.

¹⁶ Tutni mahka tihmia iwan ra, Jekob unta wina utla ra aula kan, Lea taki wan witin ai lakula daukaia bara witin ra win: —Na tihmia man ba yang wal yapaia sma, kan mairin luhpa baikaia saika luhpi bri balan ba mana yang pat mamna aibapri, man ba yang wal yapaia dukiara. Bara Jekob baha tihmia witin wal yapan.

¹⁷ Bara Lea kwihra tiwan, bamna ba kat witin Jekob luhpia waitna matsip baikan, Gâd bui witin ai pura sunra ba walan bamna.

¹⁸ Bara Lea aisin: “Gâd bui yang ra prisant kum aikan, baha lika yang albiki mairin ba ai mairka yabri ba dukiara”; baha mita ai luhpia nina ba Isacar mâkan.

¹⁹ Baha ningkara Lea kli kwihra tiwan, Jekob luhpia waitna wala baikan, bara naha kat ai luhpia 6 baikan.

²⁰ Bara Lea aisin: “Gâd mita yang ra prisantka tara pali aikan sa. Nanara mayi ba yang ra kau yamni ai kulkbia, kan yang bui witin ai luhpia nani 6 baikri bamna.” Naha tukta nina Zabulón mâkan kabia.

²¹ Baha sut ningkara Lea luhpa mairin kum baikan, ai nina ba Dina mâkan.

²² Bara Gâd Raquel dukiara ai kupia krawan, witin ai pura suni ba walan bara witin ra sin luhpia nani kau yabaia win.

²³ Witin kwihra tiwan, luhpa waitna kum baikan bara win: “Gâd na yang wina luhpa baikaia apia ai daukan, swira lâka ba yang wina sakan.

²⁴ Gâd ban ai wiaia pan si, man kau luhpa wala baikma.” Baku luki bara ai luhpia nina ba Josep mâkan.

Mina alkaika nani Jekob Labán wal mapara

²⁵ Bara ban kan, Raquel ai luhpia Josep baikan ba ra, Jekob mita Labán ra win: —Nanara ai swis, yang tawanki ra kli tawi wamna, yang tasbayi ra.

²⁶ Luhpi nani bara mayi nani ba sin aik, kan baha nani dukiara yang bui man warkkam daukri, bara nanara ai swis wamna. Man nu sma yang nahki prais warkkam daukri ba.

²⁷ Sakuna Labán pana win: —Apia pali, man mahka wapara, yang wal ban takaski bas. Yang aman luki kaikri, man nâra bal takaskram ba ra luki, Dawan bui yang ra yamni ai munan sa.

²⁸ Bamna nanara man ai wis mamna nahki prais brin mai dauki ba, yang aibapamna.

²⁹ Bara Jekob witin ra win: —Man nu sma nahki prais yang bui man dukiam daukri ba bara daiwan nani ba sin nahki main kaikri ba.

³⁰ Yang kau balras kapri ba ra man daiwram nani ba maura lupia baman bri kapram, sakuna nanara yang balri ba wina daiwan ailal sauhram sa. Bamna yang balri ba piua wina, Dawan bui man ra yamni mai munan; sakuna, ¿nanara yang ahkia mayi bara luhpi nani dukiara sin baku wark takamna?

³¹ Labán kli makabi walan: —¿Mamna nahki prais aibapamna brin mai daukisa? Jekob pana win: —Maina aibappara, swis, daiwan nani ba kli main kaikaisna, yang dîa want mai wimna ba aikaia wima kaka.

³² Aik yang naiwa daiwram nani ba tilak wapi wamna, bara sîp nani ba, guts nani taya bulni ba sut, daknika aihka lakma: siksa ba mânka, bulni ba mânka, puputni ba sin mânka. Baha daiwan mapla sâtka nani ba wal yang maina brimna.

³³ Bara baha daukamna ba ningkara, man wih kaikma yang maina dîa briri ba. Man baku kaikma yang kunin mai munras lâ kat daukri ba tânka. Man bui yang daiwri dakni ba tilara, daiwan bulni apia ba sâkma sapa, mapla sât sât ba sin; baku sâkma kaka, yang bui man daiwram nani ba implikri kabia.

³⁴ Bara Labán pana witin ra win: —Baku daukaia ba aitani sa, bamna man aisaram ba baku daukaia yang âu wisna.

³⁵ Sakuna baha yua, Labán ai gutska wainhka bara mairin nani, taya bulni bara puputni nani ba sut kangbi tnaya ra lakan, bara ai daiwra bulni nani ba sut ai luhpia ra yaban, main kaikaia.

³⁶ Bara luhpia ba ai aisika daiwra nani ba brih, Jekob bâra kan yaba pliska wina yu yumhpa wapan, bara laihura pali wan. Jekob lika Labán daiwra nani ba ban main kaiki kan.

³⁷ Bara Jekob dus sâtka yumhpa wina tnawa nani ba klaki brin, bara taya nani ba iwit kalki sakan bara dusa ba mapla bulni takan.

^38-39 Bara dusa nani taya ba baku kalki bulni daukan ba ra, daiwan nani lî diaika laya watla ba bilara mangki swin. Baha wainhka nani ba, dus bulni ba kaiki bara mairin nani ba taibi kan. Bara baku dus ba kaiki taibi kan ba mita, luhpia nani ba marsina, bulni puputni nani baman baiki kan.

⁴⁰ Bara baku Jekob ai daiwra daknika ba aihka saki kan, Labán daiwra marsina, siksa nani ba mawanra dus bulni ba mangki swi kan ba mita. Bara Jekob baku dauki, witin ai daiwra daknika ba saki kan, Labán daiwra daknika tila wina.

⁴¹ Daiwan kau batanira nani mairin nani ra taibi ba piua ra, Jekob baha dusa bulni ba, lî diaika ba ra mangki swi kan daiwan nani ba mawanra, baha dusa ba kaiki mairin ba taibi kaia dukiara;

⁴² Sakuna daiwan biawan nani ba bal, mairin nani ba taibi ba piua ra lika, dus bulni ba lî ba ra mangki swiras kan. Baha mita daiwan kau biawan nani ba sut Labán daiwra nani takan kan, batana nani ba Jekob daiwra nani takan.

⁴³ Bara Jekob baku dauki natka ra yuyakira pali takan. Witin sîp ailal bri kan, alba waitna nani ailal, alba mairin nani sin ailal, kiamil nani bara biriku nani sin ailal bri kan.