Blasi Sturka 22 - DAWAN BÎLA AISKA

Aisak ba sakripais daukbia win

¹ Baha diara nani taki luan ba ningkara, Dawan ba Ebraham kasakka lukanka lâka ba kaikaia mata, traika kaikanka kum daukan. Witin ai nina mâki winan, bara Ebraham pana witin ra win: —Yang nâra sna.

² Bara Gâd bui witin ra win: —Man luhpiam waitna Aisak ba bris, luhpiam unhsak ba, man bui witin ra latwan pali kaikisma ba, bara Moria tasbaya ra taki was. Bahara wama ba ra, yang il kum mamrikamna, bara man baha ilka ra luhpiam ba angki sakripais dauki aik.

³ Bara Ebraham titan pali buan, mahka ai birikuka ba satil mangkan. Sakripais daukaia pâta nani ba baikan, bara Gâd mita witin ra marikaia win yaba tasbaya kaikaia taki wan. Ai luhpia Aisak ba brin bara ai albika nani wina sin wâl aikuki brih wan.

⁴ Witin nani yu yumhpa yabal ra impakan, baha ningkara kau laih wina ai lal buki pliska ba kaikan.

⁵ Bara Ebraham ai albika nani ra win: —Man nani biriku nani ba wal takaski nâra bas bara yang luhpi na wal kau kainamra wamna, bahara Gâd ra mayuni si yang nani kli man nani ra balamna.

⁶ Bara sakripais angki daukaia pautika nani bri balan ba, Ebraham alki buki Aisak pahpaya ra sunan; bara witin ai mihta ra skiru bara pauta klauhan ba brin, bara witin nani wâl mahka wan.

⁷ Wal wiria wapi wan ba ra, Aisak ai papika ra makabi walan: —¡Aisiki! Ebraham pana winan: —Luhpi, yang nâra sna, ¿dîa brin mai daukisa? Aisak bila: —Kaiks yawan nâra pauta klauhan bara pauta ba sin brisa, ¿sakuna sîpka ba anira sa, baha wîna aiska angki sakripais daukaia ba?

⁸ Bara Ebraham pana witin ra win: —Yang luhpi, Gâd mita sîpka ba sâkbia, baha wîna aiska angki sakripais daukaia dukia ba. Bara witin nani wâl ban mahka wapi wan.

⁹ Bara Gâd mita marikaia win yaba tasbaya kat wan ba ra, Ebraham altar kum paskan bara pauta nani ba baha purara kahban. Baha ningkara ai luhpia Aisak ba priskan, bara altar ra pauta ba purara sunan.

¹⁰ Ebraham mahka sakripais daukaia ai mihta sakbi skiru ba alkan ba ra,

¹¹ Dawan insalka ba kasbrika pura wina witin ra winan: —¡Ebraham! ¡Ebraham! Witin pana win: —Yang nâra sna.

¹² Insal ba witin ra win: —Tukta ba ikaia mihtam bukpara, kan nanara yang pat mai kaikisna man lika Gâd ra sibrin lukisma ba, man luhpiam unhsak ba Dawan ra yabaia apia wiras sma bamna.

¹³ Bara Ebraham ai lal bukan bara ai ninara tawi kaikan, bara kaiks sîp wainhka kum kiaya tilara bâra sa, aringka ra kiwa ni aiblakwan; Ebraham wan bara sîpka ba alkan, bara baha wîna ni aiska angki dauki yabaia sakripaiska ba daukan, ai luhpia watlika ra.

¹⁴ Bara Ebraham baha ilka ba nina ba “Brin wan dauki ba, Dawan wina wankisa” mâkan. Baha mita baha yua wina naiwa kat kau ban baha ilka nina baku mâkisa: “Diara brin wan dauki ba, Dawan wina wankisa.”

¹⁵ Dawan insalka ba aima wala ra kasbrika pura wina Ebraham ra winan,

¹⁶ bara witin ra win: —Dawan wisa: ‘Man baha daukram ba, luhpiam unhsak ba yang ra aikaia apia wiras, man bui witin ba alki takaskras kapram bamna, yang nini mâki man ra swer takisna:

¹⁷ kasak pali yang yamni mai munamna, kiamkam ba slilma ailalka kasbrika purara bâra ba baku, ailal pali daukamna, kabu sin auhika ailal kabu un ra ba baku daukamna. Baha purkara, witin nani mita ai waihla nani sut pura lubia,

¹⁸ bara man kiamkam ra praki nisan wala nani sut tasba aiska ra bâra ba sin yamnika yan kabia, man bui yang bîli wali daukram ba mita.’

¹⁹ Baha ningkara Ebraham kli tawi wan ai albika nani ra. Bara kli witin nani aikuki asla taki si, baha wina mahka Beerseba ra impakan. Ebraham Beerseba ra takaski bahara iwan.

Nahor luhpia nani ba

²⁰ Baha wina piua nani wiria luan ba ra, Ebraham sturi walan Milcá bui sin ai muihni Nahor luhpia nani baikan.

²¹ Tawahkia baikan ba nina Us mâkan; ningkara baikan ba nina Buz, bara yumhpika baikan ba nina Quemuel mâkan, Quemuel sika Aram aisika.

²² Baha ningkara ai luhpia wala nani sin kau ailal baikan, nina nani ba: Quésed, Hazó, Pildás, Idlaf, bara Betuel.

²³ Betuel sika Rebeca aisika. Nahor Ebraham muihnika ba ai maya Milcá wal ai luhpia nani 8 baikan.

²⁴ Baha purkara Nahor ai luhpia wala nani sin bri kan ai maya wala Reumá wal baikan nani ba: Teba, Gáham, Tahas, bara Maacá.