Blasi Sturka 21 - DAWAN BÎLA AISKA

Aisak aisubi takan ba

¹ Dawan ai bîla win ba baku, witin Sara ra bal kaikan, bara witin ai bîla aisin ba kat sin Sara ra daukan.

² Bara baku Sara kwihra tiwan, Ebraham pat almuk pali takan kan ba ra, witin ra ai luhpia waitna kumi baiki yaban. Tukta ba baikaia piua ba, Gâd mita win piua ba kat baikan.

³ Ebraham ai luhpia nina ba, Sara mita nina mâkaia win ba baku Aisak mâkan.

⁴ Bara Aisak yu 8 alkan ba ra, witin ai wîna ra Aisa sainka ba klakan, Gâd mita baku daukaia win ba lâka ba kat.

⁵ Aisak aisubi takan ba kat Ebraham pat mani 100 kum bri kan.

⁶ Bara Sara win: “Gâd mita yang ra ai munan kikri, bamna nanara upla wala nani sut yang sturki walbia, yang naha luhpia baikri na, witin nani sin yang wal kiki kabia.

⁷ ¿Ya mita Ebraham ra wiaia kan, yang na witin ra ai luhpia baiki yabaia sip sna? Ban sakuna, witin almuk pali takan bara yang bui witin ra ai luhpia waitna kum baiki yabri.”

Agar bara Ismael ba kangbi sakan

⁸ Tukta Aisak ba tara takan, bara tiala dakban. Witin tiala dakban yua ba, Ebraham lilia tara kum daukan.

⁹ Sakuna yu kum Sara kaikan, Agar Idsip mairka Ebraham luhpia baikan ba mita, Aisak lawaska kiki kan.

¹⁰ Baha lawaska kiki kan kaikan ba tâka wina, Sara Ebraham ra win: “¡Naha albika mairin na ai luhpia wal utla wina taki wabia! Alba mairin luhpia ba sip apia sa, yang luhpi Aisak wal baku man prapatikam dawanka takaia.”

¹¹ Baha aisinka ba Ebraham ra kasak latwan yaban, kan witin ai luhpia pali dukiara baku daukaia win bamna.

¹² Sakuna Gâd bui Ebraham ra win: “Man luhpiam bara albikam mairin dukiara sin ban kupiam kriwan pali takbiara. Sara dîa man ra makabi ba kat man dauks, kan Aisak ra praki sika man kiamkam ba bal takaisa bamna.

¹³ Man albikam mairin luhpia ba wina sin yang daukamna nisan tara kum bal takaia, kan witin sin man luhpiam sa bamna.”

¹⁴ Bara Ebraham baha yua wala titan pali ra buan, bamna plun bara lî sin brin sîp taya batilka ra, bara Agar ra yaban ai pahpaya ra sunan, bara tukta Ismael ba sin witin mihta ra yaban lakula dauki, bara witin nani taki wan, Beerseba upla iwras tasbaya ra. Anira auya ba ai tânka briras aimawahki tauki kan.

¹⁵ Lî bri kan ba danh takan kan, bara tukta ba dus sirpi nani distika ra bri si lulki swin.

¹⁶ Bara witin laihura taki wan, tukta ba pruka kaikaia apia dukiara. Sakuna witin wih iwan ba ra, tukta ba mahka inan.

¹⁷ Tukta ini kan bîla baikra ba Gâd walan; bara Gâd insalka kasbrika pura wina Agar ra aisin, bara win: “Agar, ¿man dîa pâtka brisma? ¡Si bripara! Tukta inanka ba Gâd walan, bara witin sin ani kat bâra ba sin kaikisa.

¹⁸ ¡Bus! Tukta ba pliki saki mihtam ra alki bris; swipara, witin ba wina sika yang nisan tara kum daukaisna bamna.”

¹⁹ Bara Gâd mita Agar nakra ilingkan bara anira liwanhta bâra ba witin kaikan; witin wan bara ai batilka ba banhki brin, bara tukta ra lî dakakan.

^20-21 Gâd tukta ba tâ baikan, witin pâwi tara takan bara Param twi langnika ra takaski iwan. Bahara witin trisbaya lalulkra pali takan, bara ai yaptika mita Idsip mairka kum wal maya baikan.

Ebraham Abimélec wal lâ kum daukan

²² Baha piua nani ba tilara Abimélec Ebraham wal sturi kum aisaia wan. Ficol sin witin wal wan, witin lika suldiar kiaptinka ba. Bara Abimélec bui Ebraham ra naku win: —Yang nani kaikisna man lika diara nani sut daukisma ba, Gâd bui tâm baikisa.

²³ Bahamna, nanara man Gâdkam nina ra luki yang ra swer taks luhpi nani, muli nani bara kiamki nani sut ra saura ai munaia apia. Yang ra swer taks yang kupi yamni lâka ni man ra yamni mai munri ba baku, man mita sin nanara pana naha tasbaya ra iwisma na, tasbaya uplika nani sut ra yamni munaia.

²⁴ Ebraham pana win: —Yang baku daukamna man ra swer takisna.

²⁵ Sakuna Ebraham bui Abimélec ra marikan liwanhta kum witin ai dukia kan ai mihta dakban ba. Liwanhta ba witin ai dukia kan bara Abimélec albika nani mita ai mihta dakbi brin.

²⁶ Bara Abimélec pana win: —Yang naiwa kat baha tânka ba waluna, ya pali mita baku daukan liwanhta ba man wina dakbi brin. Man sin baha tânka ba yang ra ai wiras kapram, naiwa kat ai wisma.

²⁷ Bara Ebraham, sîp bara bîp nani brin, bara Abimélec ra yaban; bara baha yua witin nani wâl ba lâ kum daukan.

²⁸ Sakuna Ebraham sîp mairin 7, ai sîpka daknika tila ba wina tnaya ra lakan,

²⁹ bara Abimélec witin ra makabi walan: —¿Baha dîa dukiara man sîp mairin nani 7 ba tnaya ra lakuma ba?

³⁰ Ebraham bila win: —Naha sîpka mairin nani 7 na man ra maikisna; baku mamrikisna baha nani yang witniski kabia, naha liwanhta na yang mita salhkri ba dukiara.

³¹ Baha lâka nani daukan ba mita witin nani baha tasbaya nina ba Beerseba mâkan, witin nani wâlsut bahara pana pana swer taki aisin ba tâwan.

³² Witin nani baku, Beerseba ra wal lâ daukan ba ningkara Abimélec, Ficol wal kli mahka filisteo tasbaya ra tawi wan.

³³ Bâra Ebraham bui Beerseba ra tamaris dusa kum mangki, bara witin Dawan Gâd rayakira ra ai pura sunan.

³⁴ Bara Ebraham piu wihka filisteo nani tasbaya ra iwan.