Blasi Sturka 17 - DAWAN BÎLA AISKA

Aisa sainka ba, Dawan lâ daukan ba tukinka

¹ Ebram 99 mani bri kan, Dawan ba witin ra bal taki, sturi aisin: —Yang sika Dawan, karnika sut brisna ba; rayakam ba yang maiwanra sunu iwi bas.

² Bara yang lika man wal lâ kum daukamni: maikrika kiamkam ailal pali bri kama.

³ Bara Ebram ai mawan ra tasba kat prawan, bara Dawan bui witin ra kau ban aisi, win:

⁴ —Naha lâka na yang bui man wal daukisna: Man lika nisan nani ailal pali aisika kama,

⁵ bamna nanara ninam ba ban Ebram mâki kabia apia, sakuna nanara wina man ninam ba Ebraham mâkan kabia. Kan nanara yang bui man ba nisan nani ailal pali aisika mai daukamni.

⁶ Man kiamkam ba ailal pali daukamni, man wina nisan nani ailal pali bal takbia, king nani sin man wina bal takbia.

⁷ Man wal lâika daukisna na, man kiamkam nani wal sin yang lâ daukamni. Yang lika man Gâdkam ban kamna, witin nani ai Gâdka sin.

⁸ Kenan tasbaya ba man ra maikamna bara witin nani ra sin yabamna. Nanara man bâra iwisma tasbaya ba man prapatikam ban kabia; bara yang lika witin nani ai Gâdka kamna.

⁹ Baha purkara, Gâd bui Ebraham ra win: —Sakuna man lika yang lâika mai wîri ba daukma, man bara kiamkam nani sut sin baku daukbia.

¹⁰ Naha sika lâika ba man nani wal yang daukisna ba, man nani bara kiamkam nani sut lâika na daukaia sma: Waitna bani man nani tilamra bâra ba, Aisa sainka ba klaki kaia sa.

¹¹ Man nani wînam taya ba klaki param sakaia sma, bara baha ba man nani wal yang lâ daukisna ba tukinka kabia.

¹² Naiwa wina man nani naku dauki kama: luhpiam waitna kumi bani man nani wamtla bilara aisubi taki ba, man nani wal yang lâ daukisna ba ni ai wîna ra klaki kabia yu 8 alkbia ra, bara albikam man nani kiamkam apia, upla sât wala wina atki briram ba, baha nani sin lâ daukan na ba ai wîna ra klaki kaia sa.

¹³ Wamtla bilara aisubi takan ba, lalah mana atkram ba sut, aikuki baku yang lâika ba wîna ra klaki mangkram kaia sa; baku yang lâika ba man nani wînam ra mark daukan bri kama, lâ daukanka kum rayakam aiska ra.

¹⁴ Ya Gâd sainka klaki mangkras nani ba tilam wina kangbi sakan kaia sa, kan yang lâ daukri ba witin kulkras ba mita.

¹⁵ Bara Gâd kau ban aisi, Ebraham ra win: —Man mayam Sarai nina ba sin kau ban Sarai mâki kabia apia, sakuna nanara wina ai nina ba Sara mâki kabia.

¹⁶ Witin ra sin yamni munamna, bara witin wina luhpiam waitna kum maikamna, âu, yang bui witin ra yamni munamna, bara witin ba nisan nani ailal yaptika takbia. Ai kiamka nani tila wina king nani sin bal takbia.

¹⁷ Ebraham ai mawanra tasba kat prawi, kikan bara ai kupia ra lukan: “¿Waitna kum pat 100 mani alkan ba kau luhpa baikaia sip kabia ki? ¿Bara Sara sin pat 90 mani alkan ba, sip sa ki kwihra tiwaia?”

¹⁸ Bara Ebraham bui Gâd ra win: —¡Baku pan takaia si, bara Ismael man mamwanra yamnikam ba wal iwi kabia!

¹⁹ Gâd pana witin ra win: —Yang mai wîri ba lika, man mayam Sara luhpiam waitna kum baiki maikbia, bara man bui witin ai nina ba Aisak mâkma. Bara witin wal yang lâika ban kaia ba daukamni, ai kiamka nani ai ninara aula ba aikuki sin lâ daukamni.

²⁰ Ismael dukiara aisaram ba sin yang walri, witin ra sin yamni munamna; ai luhpia nani ailal bara ai kiamka sin tara takaia daukamna. Ismael ba wihta tara nani 12 aisika takbia, bara kiamka ba wina nisan tara daukamni.

²¹ Ban sakuna yang lâika ba Aisak wal daukamni, luhpiam waitna Sara baiki maikbia ba mani kum alkbia ba ra, mani wala naha piua praiska ra.

²² Bara Gâd lika Ebraham wal aisi swin ba ra, witin baha wina mahka wan.

²³ Bara baha yua pali Ebraham mahka buan, ai luhpia Ismael brin, ai albika nani ai watla bilara baikan nani ba sin, bara ai albika nani lalah ni atki brin nani ba, bara baku sin waitna wala nani ai watla ra iwi ai dukia dauki nani kan ba sut wîna ra, Gâd sainka ba baha nani wîna ra klakan, lâka ba nahki dauki mangkaia Gâd mita win ba baku daukan.

^24-25 Ebraham 99 mani bri kan. Ismael mani 13 bri kan witin nani ai wîna ra Gâd sainka mangkan ba kat.

²⁶ Ebraham ai luhpia Ismael wâlsut baha yua Gâd sainka ba ai wîna ra klakan.

²⁷ Ai watla ra iwi kan nani ba sin sut baku daukan, albika nani luhpia nani bara alba nani atki brin nani ba sin sut wîna ra, baha yua Aisa sainka ba klakan.