Blasi Sturka 13 - DAWAN BÎLA AISKA

Ebram Lot wina dakwi takisa

¹ Ebram Idsip wina taki kli Négueb tasbaya tani ra tawi wan. Witin ai maya, ai dukia nani sut bara Lot sin aikuki brih wan.

² Ebram yuyakira pali takan, daiwan ailal brin, silbar bara gul sin manis.

³ Bara witin kli ai ninara tawi Négueb wina tawa impaki kan ban Betel tawanka diman ba kat. Baha wina Betel bara Ai tawanka wal lilapas ra taki wan ai tintka watla ra, witin pat mâki swin kan ba ra.

⁴ Baha tasbaya ra witin altar kum paskan kan ya ba ra, bahara Ebram Dawan ra ai pura suni mayunan.

⁵ Lot sin yuyakira pali kan, ai tahtika Ebram wal baku witin sin sîp bara bîp nani ailal bri kan, upla nani sin witin wal tauki kan;

⁶ sakuna tasbaya witin nani wal iwi kan ba, aitani tara apia kan witin nani ban bâra iwi baha daiwan ailalka nani sut ba pata dakaki kaia. Bamna witin asla ban kaia sip apia kan,

⁷ unsaban bâra kan: Ebram daiwra main kakaira nani ba bara Lot daiwra main kakaira nani ba wal. Bara baha purkara Kenan uplika nani bara ferezeo nani sin pliska ba ra iwi kan.

⁸ Bamna yu kumi Ebram bila Lot ra win: “Man ba yawan wal wan taya sa, bara yamni apia sa wan tilara unsaban bri kaia, man daiwram main kakaira nani ba bara yang daiwri main kakaira nani ba wal.

⁹ Naha tasbaya aiska na man mamwanra bâra sa man dukiam briaia; bamna mamkabisni yang wina dakwi taks. Man yahbra tani ra wama kaka, yang waupasa tani ra wamna, man waupasa tani ra wama kaka, yang yahbra tani ra wamna.”

¹⁰ Bara Lot Jordan twiya aiska ba tawi kaikan, ban Sóar tawanka sirpi ba kat. Awalka un ba lî ailal bâra sa, giadin tara kum baku. Idsip tasbaya talia kan. (Sodoma Gomora wal Dawan mita kau sauhkras kan ba piua ra kan baku kan.)

¹¹ Bara Jordan ilka bîla aiska ba Lot bâk saki witin ai dukia brin. Bamna witin nani bâra kan ba tasbaya wina lalma tani ra tawi wan, bara baku Ebram Lot wal dakwi takan.

¹² Ebram Kenan tasbaya ra takaskan bara Lot taki wan, Sodoma tawanka tara ba tani ra, il bîla tawanka nani ba lamara iwaia.

¹³ Ban sakuna, Sodoma uplika nani ba upla saura pali kan, saurka lâka tara nani Dawan mapara dauki kan.

¹⁴ Lot taki wan ba ningkara, Dawan Ebram ra win: “Nanara man bâra sma ba tasbaya wina namkra buki pain laki kaiks, yahbra tani ra bara waupasa tani ra, lalma tani ra bara muna tani ra sin.

¹⁵ Tasbaya aiska man kaikisma na, man dukiam bara kiamkam nani dukia maikisna ban kaia ra.

¹⁶ Man kiamkam ba tasba puknika ba baku ailal daukamni. Tasba puknika lupia bani upla sip kulki sakras ba baku, man kiamkam sin upla sip kulki sâkbia apia.

¹⁷ ¡Nanara, bus bara tasbaya aiska yarika bara bîla yahpika nani ba sut wapi kaiks, kan yang bui man ra maikaisna bamna!”

¹⁸ Bamna Ebram, ai tintka watla kum bukan, bara Hebrón tawanka tara lamara usupum dusa manis pâwi kan ba tasbaya ra waitna kum nina Mamré mâki kan ba bâra iwi kan, bara baha lamara wih iwan. Bahara Ebram altar kum paskan Dawan dukia.