Blasi Sturka 11 - DAWAN BÎLA AISKA

Babel utla tara karnakira ba sturka

¹ Blasi piua ra tasba ra upla sut ba yapti bîla kumi baman aisi kan.

² Bara baku ban witin nani lalma tasbaya wina taki impakan, bara Sinar tasbaya kat wan twi langnika tara kum sakan, bara bahara witin nani takaski iwan.

³ Yu kum witin nani pana pana aisi kaikan: “Kaisa yawan slaubla ni blok nani paskaia, bara pauta ra angki karna daukpi.” Bara witin nani blok ba walpa watlika ra brin, baku târ ba sin tasba wina sakan, baha ba simint watlika ra brin.

⁴ Bara witin nani win ai walka nani ra: “Man nani bal, kaisa yawan tawan tara kum paskaia, bara utla karnakira purara pali sin kum mâkaia, watla bahna ba kasbrika alkaia praiska kat, bara baku natka ra yawan wan nina ba tara kulkan kabia, bara tasba mawanra sin yawan nani ba yakabrira baman tauki kabia apia.”

⁵ Sakuna Dawan bal iwan, baha tawanka tara ra utla karnakira purara pali upla nani mita mâki kan ba kaikaia.

⁶ Bara Dawan luki kaikan: “Kaiks naha uplika nani sut na upla kumi baman sa, ai bîla aisinka kumi baman aisisa, baha mita witin nani warkka na pat dauki tâ krikan sa. Diara kumi mita sin witin nani daukaia lukan ba takaskan kabia apia.

⁷ Yamni sa yawan iwi wih witin nani ai bîla aisi ba tanis turbaia, bara baku lika witin nani ai uplika nani wal pana pana dîa aisi ai tânka bri ba yabrika tânka bribia apia.”

⁸ Bara baku Dawan mita witin nani ba tanis turban tasba aiska ra, bara tawanka sin paskras mahka swin.

⁹ Baha tasbaya ra upla nani sut iwi kan ba, bîla aisinka nani ba tanis turban Dawan mita bara tasba aiska ra turwi taki wan. Baha tâka ba mita, tawanka nina ba Babel mâkan.

Sem kiamka nani ba

¹⁰ Naha nani sika Sem kiamka nani ba: witin 100 mani bri kan, bara ai luhpia Arfaxad baikan, mani wâl lisamra tara luan ba ningkara.

¹¹ Sem, Arfaxad baikan ba ningkara, 500 mani alkan. Baha ningkara kli luhpa waitna bara luhpa mairin nani kau ailal baikan.

¹² Arfaxad 35 mani alkan ba ningkara ai luhpia Sélah baikan.

¹³ Arfaxad 403 mani alkan ba ra, ai luhpia waitna bara mairin nani kau ailal baikan.

¹⁴ Sélah 30 mani alkan ba ra, ai luhpia waitna Éber baikan.

¹⁵ Baha ningkara Sélah 403 mani alkan ba ra, ai luhpia waitna bara mairin nani kau ailal baikan.

¹⁶ Éber 34 mani alkan ba ra ai luhpia Péleg baikan.

¹⁷ Baha ningkara Éber 430 mani alkan bara luhpa waitna bara luhpa mairin nani kau baikan.

¹⁸ Péleg 30 mani alkan ba ra ai luhpia waitna Reú baikan.

¹⁹ Baha ningkara Péleg 209 mani alkan, bara luhpa waitna an mairin nani kau baikan.

²⁰ Reú 32 mani alkan ba ra luhpia waitna Serug baikan.

²¹ Baha ningkara Reú 207 mani alkan bara luhpa waitna an mairin nani kau baikan.

²² Serug 30 mani alkan ba ra, ai luhpia Nahor baikan.

²³ Serug Nahor baikan ba ningkara 200 mani alkan ba ra, luhpa waitna an mairin nani kau baikan.

²⁴ Nahor 29 mani alkan ba ra, ai luhpia Térah baikan.

²⁵ Nahor Térah baikan 119 mani alkan bara luhpa waitna an mairin nani kau baikan.

²⁶ Térah 70 mani alkan ba ra, ai luhpia nani Ebram, Nahor bara Harán baikan.

Térah kiamka nani ba

²⁷ Naha nani sika Térah kiamka nani ba: Térah luhpia nani: Ebram, Nahor, Harán. Lot ba Harán luhpia.

²⁸ Harán Ur ra Caldea nani tasbaya ra aisubi takan. Witin sin bahara pruan, ai aisika Térah kau raya kan ba ra.

²⁹ Ebram bara Nahor wâlsut mairin brin; Ebram maya nina ba Sarai, Nahor maya nina Milcá, Harán luhpia Iscá wal ai muihnika kan.

³⁰ Sakuna Sarai ba biarapara, luhpias kan.

³¹ Bara Térah ai luhpia Ebram ba brin, ai mula Lot sin, Harán luhpia ba, ai luhpia Ebram maya Sarai, ai mula yapti ba sin. Baha nani aikuki Ur Caldea nani tasbaya wina takan, Kenan tasbaya ra waia dukiara. Ban sakuna, Harán tawanka kat wan taim, bahara witin nani takaskan.

³² Térah ai rayaka yua nani brin ba 205 mani, bara witin Harán kat pruan.