Aiseya 8 - DAWAN BÎLA AISKA

Aiseya luhpia nina ba wal upla ra smalkan

¹ Dawan bui ai win: “Ulbaia tatka tara kum bris, bara bahara uls ulbanka ba aisi kaikaia param kaia: ‘Maher-salal-hasbaz.’

² Bara baha wina was prîs Urías, bara Sakaraya Jerebequías luhpia waitna sin.”

³ Ba ningkara prapit mairin, yang mayi ba wal prawri, witin kwihra tiwan, luhpa waitna kum baikan. Bamna Dawan bui ai win: “Nina ba Maher-salal-hasbaz mâks.

⁴ Tukta ba kau ‘papiki’, ‘mamiki’ aisaras ba ra, Damaskus, Sameria wal dukia kukanka nani sut ba, Asiria kingka mita dakbi brih wan kabia.”

⁵ Aima wala ra Dawan kli yang ra aisi ai win:

⁶ “Naha uplika nani ra Resín sîa, Remalías luhpia waitna ba sîa, Siloé ra lî lamni aubi ba lulki swin bamna,

⁷ Bara Dawan mita witin nani ba Éufrates awala lisamra tara dingkan karna aubi ba ra dingkbia (baha wibia kaka Asiria kingka ai karnika sut bri ba mihta ra). Witin nani tnaya bani ra lisamra ba mita pura lubia, ai lamara nani ba sut,

⁸ lisamra ba Juda purak aubi kabia nana kat. Tnawira ai tnawa nani ilingki ba baku kabia, tasbayam ba, Imaniuel mita, kutbi bribia.”

⁹ Nisan nani, aidrubi asla taks, man nani tamyahkan sa; wals, man nani tasba wala wina nani sma ba sut: âu, man nani kau ridi taki balma sakuna, sirang mai ikan kabia.

¹⁰ Daukaia luki ba lilka dauks, kan baha ba sauhki tikan kabia; dîa lâka upla wala ra kabia want ba kat daukbia apia, kan Gâd ba yawan nani wal sa bamna.

Dawan ra sika sibri kaia ba

¹¹ Dawan ai karnika ra dutki ai alki bara ai win, naha uplika nani yabalka bâk wapamna apia. Sakuna ai win:

¹² “Mapara buanka lâka naha uplika nani aisi ba, man nani aisapara daukanka sut ba, mapara buanka lâka nani sa. Witin nani dîa sîa bri ba, baha sîa bripara, man nani sibrin sin mai daukbiara.

¹³ Karnika sut bri Dawanka ra man nani holikira kulks; man nani sibrinkam ba witin ra kabia; man nani bui witin ai mawan sîa bri bas.

¹⁴ Bara witin ba man nani minam alkaika baku kabia; baha walpaya ra sika man nani minam prukma, baha mita Israel kingka tasbaya wâl ba batakbia; wan mina alkaika baku kabia, Jerusalem uplika nani baha kiwka ra mina alki kauhbia.

¹⁵ Upla ailal ai mina prukbia, ailal sin kauhbia, ban sin prubia; upla mina bahara alkbia ban krikan kabia; aiblakwi priskan kabia.”

Aiseya ai uplika nani ra win ba

¹⁶ Naha bîla blikan na man nani pain wals; naha bîla nani mai wisna na, upla wala ra aisapara, yang mai smalkisna bîla nani ba.

¹⁷ Dawan ba Jekob uplika nani wina yukuwi kabia sin, yang lika witin ra kasak lukisna. Witin kat kaiki bîla kaikisna.

¹⁸ Yang, yang luhpi nani sin Dawan wina aikan ba, Israel luhpia nani ra sain aihkakira kaia ba dukiara sa, Dawan, karnika sut bri ba mita ai mangkan sa witin Saion ilka ra iwi ba.

¹⁹ Âu, upla nani bui man nani ra mai wibia sika: “Sukia nani ra wals, yapi kakaira nani ra sin makabi wals, pusbi aisi nani ra bâra aisi ba. ¿Upla nani ba ai gâdka nani ra makabi walaia apia sa ki, pruan nani bara walaia raya nani ba dukiara dîa aisabia ba,

²⁰ dîa daukaia bara dîa aisaia bîla kum wan wibia ba walaia?” Âu, witin nani baku aisabia sika, sakuna tanis lâka kabia.

²¹ Witin nani tasba kum wina tasba wala ra taiban lâka ra taki wabia, plun dauki kabia; plun dauki ba mita, ai kupia baiki kabia. Ai kingka ra, ai gâdka ra sin lahtubia. Witin ai mawan na purara tawi kaikbia

²² bara witin nani tasba ra kaikbia; bara kaiks pât tara, tihmia tara baman kaikbia, tihmia tara, pât wahwaia baman. Upla sut tihmia ra kabia. Pât wahwi taibi bri nani ba, swak takaia âpu kabia.