Aiseya 7 - DAWAN BÎLA AISKA

Aiseya bui Ahaz ra pas ai bîla blikan ba

¹ Siria kingka Resín, bara Israel kingka Pécah Remalías luhpia ba wal, Jerusalem mapara aiklabaia wan, sakuna sip pura luras kan. Ahaz, Jotam luhpia, Ozías mulika ba, Juda kingka aimaki kan ba yua nani ra baha takan.

² Baha piua ra naha bîla na blikan, king Ahaz ra bara ai taya nani ra sin wih win: “Siria uplika nani ba, Efraín aikuki asla takan.” King ba ai uplika nani sin baha walan, tatatwi banhwan pâsa krawan unta ra dus nani wauhi ba baku.

³ Bara Dawan Aiseya ra win: “Man, luhpiam Sear-iasub wal taki was, lî plapaika laiwi madakura ba wina kau purara, bahara Ahaz wal prawaia, kwala tuskaika yabalka ba ra,

⁴ witin ra wis: ‘Aman kaiks, dring prupara; si bripara, sringkam sin bripara baha pauta klauhan lupia wâl kiasma taki ba dukiara, Resín, Siria ai uplika aikuki kupia baiwanka laptika ba, wala Remalías luhpia ba dukiara sin.

⁵ Siria uplika nani, Efraín uplika aikuki bara Remalías luhpia ba sin, aikuki lukanka saura brih man mampara daukisa, witin nani aisin:

⁶ Kaisa yawan Juda mapara waia sirang ikaia; yawan tasbaya ba, aiska dakbi briaia, bara Tabeel luhpia ba, king mangkaia.

⁷ Ban sakuna, Dawan naku wisa: ¡Baha baku ban takbia apia!

⁸ Damaskus sika Siria kiapitalka, bara Resín sika Damaskus kingka; Sameria ba Efraín kiapitalka, bara Remalías luhpia Sameria kingka;

⁹ sakuna mani 65 bilara Efraín ba kuntri apia kabia; man nani kasak lukan lâka ra bapi buras sma, man nani minam ba sin bapi bûi kama apia.’ ”

Imaniuel aisubi takbia dahra aisin

¹⁰ Dawan Ahaz ra kli aisin:

¹¹ “Dawan Gâdkam ra makas sain kum dauki mamrikaia, baha ba man ra tukin kum kaia, tihuka kau tihu ba wina, apia kaka kasbrika purara ba wih kau purara ba wina.”

¹² Bara Ahaz pana win: “Sain kum kaikaia makabamna apia, Dawan ra traika kaikamna apia.”

¹³ Bara Aiseya bui win: “Nanara man nani wals, Debit king watla bilara sma uplika nani. Man nani mampara diara saura sa, upla ra trabil muni swapni sakaia ba, ¿ban sakuna man nani, yang Gâdki ra sin baku munaia lukisma ki?

¹⁴ Bahamna Dawan witin bui, man nani ra sain kum mamrikbia: Kaiks tiara ba kwihra sa, bara ai luhpia waitna kum sâkbia, bara ai nina ba Imaniuel mâkan kabia.

¹⁵ Witin kau tuktan kabia ba piua ra, bîp tialka laya, kwahadu, nasma laya pi kabia.

¹⁶ Sakuna kau tukta ba ai tânka pain briras ba ra, baha kuntrika king wâl bri ba, sirang mai iki ba lulki swin kabia.

¹⁷ “Dawan mita daukbia man puramra balaia, uplikam nani purara, bara aisikam watla purara sin, Efraín, Juda wina dakwi takan yua sâtka nani takan ba baku ba.” (Naha sika Asiria kingka dukiara aisisa.)

¹⁸ Baha piua ra Dawan ba mita kukas nani baku yaka balbia, baha nani Idsip awalka ra laihura iwi nani ba ra. Asiria tasbaya ra iwi nani ra lika nasma yula nani baku yaka balbia.

¹⁹ Bara baha nani balbia, witin nani sut, twi saura tasbaya, il bîla nani ra takaskbia, walpa untika nani ra dimbia, kiaya dusa nani tilara daiwan lî diaika pliska nani ra sin.

²⁰ Baha yua ra, Dawan Asiria kingka ba alki bribia, Éufrates awala baila wala ra risar ayar munan baku, bara Israel luhpia nani tâwa, krusam tamaya nani, bara tamaya bâra pîska wala nani sut ba, kusbi sâkbia.

²¹ Naha piua ra, ya bîp mairin kum bara sîp mairin wâl pakbia kaka,

²² tialka laya manis bri kabia, baha mita kwahadu pibia, nasma laya sin dibia baha uplika pruras ban bahara takaskuya ba.

²³ Baha piua ra sin wain nasla kum wain dusa 1,000 mangkan ba, ai mana ba silbar mâ 1,000 kulki kan ba, nanara kiaya bara rahra wal pâwi kabia.

²⁴ Trisba bara pantamangka brih upla ba bahara waia sip sa daiwan wail ikaia, tawan aiska, kiaya man takbia.

²⁵ Asang ra insla nani, hu ni tukbi mangki kan ba, upla bahara wabia apia kiaya, rahra nani pâwan ba mita; bîp bara sîp nani piaika pliska takan sa.