Aiseya 65 - DAWAN BÎLA AISKA

Gâd mapara bûi nani ba mapara aisanka

¹ Dawan aisisa: “Yang ra diara makabras uplika nani kata yang ra ai pliki balan; yang ra ai plikras kan uplika nani ba ai pliki ai sakan. Yang ra ai pura sunras kan uplika nani ba ra wîri: ‘Kaiks yang nâra sni.’

² Maipara babura uplika nani mawanra, yu aiska yang mihti sakbri, witin nani sika yabal yamni apia bâk impakisa, ai kupia lukanka saura nani ba ninara;

³ witin nani yu bani yang maiwanra watawi dauki kupi baiki kan; giadin nani ra sakripais dauki kan gâd nani ra, kîa pain nani ba walpa ni altar nani paski purara angki kan;

⁴ witin nani raiti nani ra takaskisa, bahara yukuwaia watla untika nani ra, tihmia ba luisa; kwirku wîna pîsa, ai dakawa nani ra pilalka ba sin, baha saura pali kulkan ba dukia nani ba brisa.

⁵ Witin nani wisa: ‘Man nani bâra takasks, yang laimara balpara; kan yang kau holi sna man ba wal. Baha uplika nani ba sika pauta klauhan aswi ban sa; ai munisa kiasma wan kakma ra kisni dauki ba baku.

⁶ Sakuna naha nani sut ba pat ulban bâra sa yang kaikisna, bara yang klaihkla kruski takaskamna apia; witin nani dîa briaia aitani ba yabaisna.

⁷ Witin nani lâ krikanka nani daukan ba aisika nani sin daukan ba baku. Kîa pain angki kan il nani purara, kiuhsi nani purara swiri dauki kan. Witin nani dîa daukan ba pas kulki kaikamna, witin nani dîa briaia aitani ba yabamna.” Baha Dawan aisin.

Dawan ai yamnika ba yabaia wisa

⁸ Dawan aisisa: “Wain mâ ba laya pain alkan bara upla baha swin aisawras, kan witin nani baha wina wain manis sakaia sip sa. Bara yang sin albiki nani ra latwan kaiki baku daukamna, nisan nani ba sut âpu daukamna apia.

⁹ Yang daukamna Jekob ai kiamka nani briaia bara Juda ra upla bâra kabia yang ilki nani ra iwaia, bara yang mita bâk sakri nani ba tasba ba ai dukia bribia, yang duki dadaukra nani ba bahara iwbia.

¹⁰ Bara Sarón ilka bîla ba sîp daknika nani klarka daukbia, Acor twaya bîla ba sin bîp nani wakabi piaika watla kabia, yang upliki nani yang ra ai pliki nani ba bribia.

¹¹ Sakuna Dawan wina man nani laihura dakwi takisma ba, yang ilki holikira âmya tikisma ba, Gad bara Mení ra man nani plun bara wain laya sin bri sal mayunisma, yuyaka nani dawanka ra.

¹² Diara saura man nani bîlam kaikisa: Man nani sord ra pruaia mai daukamna. Kan yang mai winri, sakuna man nani pana yang ra aisaras kapram bamna; man nani ra aisari, bara man nani ai walras kapram; yang aitani kulkras sna ba man nani daukram, yang laik apia sna ba man nani bâk saki briram.”

¹³ Baha mita, Dawan ba naku aisin: “Kaiks yang duki dadaukra bri kabia ai pata piaia, sakuna man nani lika plun wauhma; witin nani bri kabia dîa diaia, sakuna man nani lika diran mai dauki kabia; witin nani ai lilia takbia, sakuna man nani lika swira lâka ra takaskma.

¹⁴ Witin nani lika lilia mita aiwanan kabia, ai kupia lilika mita, sakuna man nani lika, wini bara ini kama sari bara kupia sarkira ini kama.

¹⁵ Bara man nani ninam ba mâki, yang upliki nani ba upla wala nani ra lahtubi kabia, bara Dawan mita ai dukia dadaukra nani ra nina wala ni mâki kabia.

¹⁶ Ya ya kabia naha tasba ra yamni munaia lâka plikbia ba, Gâd kasakkira ba mita yamni munan kabia; bara ya tasba ra swer taki aisin kabia ba, Gâd kasakkira ba nina ra swer takbia. Blasi sarka lâka bâra kata ba sut âuya tiwan kabia, baha nani sut nakra nani wina yukukan kabia.

Kasbrika nani raya bara tasba sin raya

¹⁷ “Man nani kaiks, yang kasbrika raya nani bara tasba sin raya paskamni, bara almuk kata ba dukiara kli wan kupia kraukbia apia, ba dukiara wan lukanka ra sin kli bal dimbia apia.

¹⁸ Man nani lilia, kupiam lilia man ban bas yang dîa paskaisna ba dukiara, kan Jerusalem ba lilia yang paskaisna, bara upla nani sin bahara ai âuyapah iwaia.

¹⁹ Bara yang pali sin, Jerusalem wal lilia takamni, yang upliki nani wal sin âiyapah kamni. Witin nani ai inanka bîla baikra ba kli walan kabia apia, ai winanka bîla baikra sin apia.

²⁰ Bara tuktan nani aisubi taki prui ba âpu kabia, almuk pali taki nani ba sin ai rayaka yua aiska alki prubia. Handat mani alki pruaia ba kau piua apia, bara kau handat mani alkras pruaia ba lahtuban kum.

²¹ Utla nani mâki ba, baha watla nani ra iwbia wain nasla nani mangkbia, bara baha mâ nani ba wina ai pata pibia.

²² Witin nani utla mâkbia apia, upla wala kra iwbia dukiara, witin nani sin mangkbia apia, upla wala baha wina pibia dukiara; kan dus nani rayaka yua bri ba baku, yang upliki nani rayaka yua sin yari bribia, yang upliki nani bâk saki briri ba ai mihta warkka nani liliaka ba bribia.

²³ Witin nani bahki ra wark takan kabia apia, ai luhpia nani sin piua kau aimakras prubia apia, kan witin nani ba, Dawan wina ai yamnika yan kiamka nani bamna, bara witin nani ai kiamka ba sut baku kabia.

²⁴ Witin nani mita kau ai winras ba ra, yang mita pat witin nani ra pana aisamna; witin nani kau ai aisaras ba ra, yang pat witin nani ra pana walri kabia.

²⁵ Yul wail ba sîp luhpia ba wal aikuki twi pi kabia, bara layan ba bîp wainhka ba wal asla twi pi kabia; piuta ba tasba yuya ba ai pata kabia. Yang ilki holikira ba, witin nani mita sarka paskbia apia, saura sin munbia apia.” Dawan baku aisin.