Aiseya 58 - DAWAN BÎLA AISKA

Kaiki plun wahwaia lâka pali aihwa ba

¹ Dawan bui ai win: “Sibrin âpu karnikam aiska ni wins, dîa wiaia sma ba alki takaskpara, trumpit baku bîlam baikra buks, bara yang upliki nani ra param wis witin nani maipara buan ba, bara Jekob watla uplika nani ra sin wis saura daukan ba dukiara.

² Witin nani yu bani ai plikisa, bara yabalki nani ba kaikaia brin daukisa wisa, wibia kaka upla kasakkira nani baku, ai Gâdka lâka ba sauhkras kan baku; witin nani lâika kasak ba sauhkras baku makabisa, bara brin daukisa yang laimara balaia.

³ Bara ban sakuna, witin nani wisa: ‘¿Yawan dîa muni kaiki plun wahwaia, Dawan tawi wan kaikras ba? ¿Yawan dîa muni mâyara bawi pât taki kaia, witin baha tânka sin briras ba?’ Sakuna damra wals, man nani kaiki plun piras sma ba yua ra, man nani brinkam ba kat hilpkam daukaia plikisma, bara warkkam tatakra nani ra diara dakbisma.

⁴ Kaiks man nani baha yua ra blahwi unsaban daukisma pana pana unsabaia mata, kaiki plun wahwisma, bara mihtam kruski watawi lâka ra uplikam ra prukaia dukiara sin. ¿Man nani lukisma baha sut kaiki plun wahwaia yua ra daukisma ba puram sunra ba walamna lukisma?

⁵ ¿Man nani lukisma kaiki plun wahwaia sari takisma ba, baha yang yamni kaikisna, lamla makupisma ba snati lapatwan baku, yamhpus tasba ra yakabi kwala siksa dimi baha purara aitnikisma ba? Baha ba man nani wisma: ‘¿Kaiki plun wahwisma ba tânka’, bara baha yua ba yang yamni kaikisna?

⁶ Baha apia sika. Kaiki plun wahwi tânka yang yamni kaikisna ba sika naha: kasak apia lâka ra silak ra priskan ba wina kriki sakisma ba, lal wilkaika dusa ra taibi wilkan ba wina lanhkisma ba; taiban uplika nani pri sakisma ba. Baku sin man tataibra nani ba âpu daukisma ba sika.

⁷ Plun wahwi nani ba wal, patam ba wina yuaia, umpira nani aimawahki tauki nani ba wamtla ra bris, kwala luha nani ba kaikma bara dimaika yama, bara man muihkam nani pât ra ba hilpka daukaia.

⁸ Bâra mika ingnikam ba bal takbia yu baiwi uluya ingnika ba baku, bara man insauhkankam ba, isti pali pain takma; bara kasakkam lâka ba kainamra wabia, bara yang praina ba man wal kabia.

⁹ Baha ningkara, man ai winma kaka, yang sin mai aisamna; man nani tilam wina hilp makabi winma kaka, yang pana mai wimna: ‘Yang nâra sma.’ Man mita yabrika taiban lâka ba sut tiwbia kaka, ai walka ra saura bîla nani aisi wiras kaka, bara nina sin aisaras kaka,

¹⁰ bara patam ba plun dauki nani ba ra yama kaka, upla sarka paskan ba swima kaka, bâra mika tihmia tara ra, ingnikam ba baiwi bal takbia, man distikam ba yu wan lal kat ingnika baku kabia.

¹¹ Yang mita piua bani ra tâm bri kamna, bara upla iwras tasbaya ra plun ailal maikamna, wînam aiska ra karnika maikamni bara sin tangni nani ailal pâwi pliska giadin baku, pain lî ni buskan kabia, lî nani kârma kum baku, baha laya nani ba sip lâwras ba baku.

¹² Uplikam nani ba tawan almuk sauhkanka nani ba paskbia; handat mani nani luan ra playka nani bapan ba kli karna daukbia, bara nina ba mâkan kabia ‘tawan kutbanka kauhanka papaskra nani ba’, ‘yabal aisawan nani ba kli papaskra, upla bahara iwaia dukiara.’

Ris yua kulkanka ba

¹³ “Ris yua kulki bas; baha yua man bisniskam daukpara, yang yui holi bamna. Man naha yua na lilia yua kum kulkma, Dawan yua holikira baku bara aitani witin ra aitani kulkaia; man bahara bisniskam nani daukras kira pain kulks, diara briaia dukiara apia.

¹⁴ Naha daukisma kaka, man bui yang ra liliakam sâkma, yang mai brih wamna, kuntri purara ba purak lui pura luanka briaia. Bara papikam Jekob prapatika ba wina liliakam briaia mai daukamni.” Dawan, naha kasak aisisa.