Aiseya 50 - DAWAN BÎLA AISKA

¹ Dawan aisisa: “¡Man nani lukpara waitna ai maya lulki swi ba baku, yang, Israel ba lulki swiri, apia kaka witin nani alba baku man nani ra atkri, witin nani ba yang wal tras diman aibapras ba tâwan! Wals man nani watawikam lâka ba mita sika mai atkan ba; man nani maipara buaia lâka brisma ba mita sika yaptikam Israel mita mai lulki mai swin ba.

² Yang balri piua, ¿dîa muni upla kumi sin âpu kan ba? ¿Yang bal winri bara dîa muni upla kum sin uni kahbras kan ba? ¿Dîa witin nani lukan yang na sip apia sna witin nani pât ra ba wina pri sakaia? ¿Dîa witin nani lukan yang na witin nani ra pri sakaia sip apia sna? Aitani sa yang aisinki kumi ni, kabu ba lâwaia bara awala nani ba tasba lâwan takaia; bara inska nani ba diran bla pruaia bara lî âpu ba mita sukwaia.

³ Kasbrika pura ba tihmia tara sari prâka ni dingkisna, bara ai pura prakaika ba krukus kwalka baku daukisna.”

Napakan ba Dawan bîla wali daukisa

⁴ Dawan mita ai smalkan swapan nani ba yang mita maisa nihkaia, tasapaia bîla nani aisi. Titan bani lukanki ra ai munisa witin aisi ba pain wali kaia, swapni bani kira baku walaia dukiara.

⁵ Dawan ba yang kiaima aikan tânka param walaia, bara yang mapara babura apia kapri bara nini sin laki yaras kapri.

⁶ Yang nini ba ai praprukra nani ra yabri, ai wipan, yang maiwan nani ba sin wan unmaya dadaikra nani ra yabri, bara maiwan ba sin yukukras kapri saura aisi nani ba wina, yabalaya ni ai tuhbi kan ba sin.

⁷ Kan Dawan ba hilp ai munbia, baha mita swiri ai dauki ba, latwan aikras; baha mita yang maiwan ba walpa baku karna daukri, bara kaikaisni yang swiri daukan kabia apia ba.

⁸ Yang laima pali ra sa tâiwan aisi uplika ba: ¿Ya yang maipara diara brisa ki? ¡Kaisa yawan aikuki wihta ra waia! ¿Ya ba yang tâinka nani daihra sâkbia ki? ¡Wis bal ai wibia!

⁹ Nâra kaiks Dawan sika hilp ai munbia; ¿ya wala bâra kabia pât ra ai lulkaia sip ba? Kaiks waihli nani ba sut lap tiwbia kwala yula mita pi tiki ba baku.

¹⁰ Man nani bui Dawan ra kulkisma ba bara ai dukia dadaukra bîla walisma ba: tihmia tara ra wapma kaka, ingni lupia kumi sin âpu, Dawan ra kasak luks, Gâdkam ra tâ baiks.

¹¹ Sakuna baha nani sut pauta klauhan muki ba bara trisbaya nani aswi ba, ridi dauki ba witin nani baha pauta klauhan kat kli ambia, witin nani ai pata klauhan ba ra kli tawi kauhbia, man nani mihtam ni trisbaya nani pauta klauhan daukram ba munhtara. Baha klalka ba Dawan mita man nani ra blîkbia, bara baha pâsa saura lika prawi kama.