Aiseya 44 - DAWAN BÎLA AISKA

Dawan kumi baman ba liliaka

¹ “Israel, nanara, ai wals, Jekob uplika nani yang duki dadaukra, bâk sakri ba.

² Yang sika Dawan, man mai Papaskra, kau aisubi takras kapram piua ra pat mai paskan kan, bara hilp mai muni ba. Si bripara, Jesurún, Jekob uplika nani, upla dukia dadaukra sakri ba,

³ kan upla iwras tasbaya ra yarka lî plapbia, awala nani daukamni, tasba lâwan diara pâwras pliska nani ra. Kiamkam nani purara, yang rayaka raya yabamni, bara yang yamniki nani blikamni.

⁴ Bara inma baku pâwbia, yasu dusa nani sâtka baku lî nani lamara, sauhka purara sin pâwbia.

⁵ Bara tila wina kum wibia: ‘Yang sika Dawan uplika sna’; wala wibia: ‘Yang nani Jekob kiamka sna’, bara wala nani ba ai mihta ra ulbia: ‘Yang Dawan prapatika sna’, bara wala nani ba ai nina Israel mâkbia.”

⁶ Dawan, Israel kingka witin ra swaki saki ba, Dawan karnika sut bri ba, witin aisisa: “Yang sika diara sut tâura sna, ningkara sin yang bâra sna ba. Yang tnaiya ra Gâd wala âpu sa.

⁷ ¿Ya wala yang wal baku bâra sa? Witin aisi tânka param saki ai wibia. ¿Ya sip kan upla ra wiaia, blasi pali ra bâra kan ba, bara naika ra kli dîa takaia ba aisaia?

⁸ ¡Man nani si bripara, man nani sin tâ iwpara! ¿Blasi pali kankika ba piua wina, maikri man nani walram bara sin mai wîri kan apia? Man nani ba sika yang witniski nani sma. Gâd wala âpu, yang baman; yukuwaia watla wala âpu; kaikras sna wala kra.”

Aidul lâka ba mapara

⁹ Aidul lilka papaskra nani kumi sin diara apia sa, witin nani aidul ra kulkanka tara yabi ba bahki baman. Ya bahara ai pura suni ba blain banhwisa bara sin sinskas, ba mita swira lâka ra takaskbia.

¹⁰ Upla kum diara slilki aidul paski, bahara ai pura suni ba gâd kum ra baku, ai taimka ba bahki ra tikisa.

¹¹ Upla sut mayunbia ba, swira lâka ra takaskbia. Aidul paski uplika ba waitna sa. Upla sut ba asla takbia kaka lâ pliska ra swira lâka ra takaskbia, bara sibrin ni banhwan kabia.

¹² Yawan kaikpi ayan ni diara papaskra ba, nahki dauki ba: ayan klakaika ba ni alkisa, lapta dauki bara amar ni pruki wîna daukra ba daukisa. Ai klahkla karnika ni baha warkka takisa; witin tisku plun daukisa, piras sa kaka ai karnika nani sin âpu takisa, lî diras bara mahka swapni takuya.

¹³ Yawan kaikpi dus ni diara papaskra ba: kulkaika dukia ba ni, dus ra praki kulki kaikisa, lilka ba ulbisa dus ra, baha ningkara klakaika ba ni klaki upla lilka painkira kum daukisa, upla wîna daukra lilkika paskisa, upla pranakira lilka ba, bara tempel bilara suni swisa.

¹⁴ Apia kaka upla kum kra, yalam dusa ba mangkisa bara lî auhi ba wal pâwisa; baha ningkara bri kabia yalam dusa klakaia, apia kaka saiprus dusa, apia kaka usupum dusa, unta ra main kaiki yaban tara nuhwan kat.

¹⁵ Baha wina upla hilpka takisa, angkaia dukia bara pauta ailahkaia; kubus ra sin mukisa, bara plun nani sin piakisa; baha purkara sin baha wina gâd bahki kum lilka daukisa, bara bahara mayunisa; aidul kum paskisa, bara witin mawanra ai lula krikisa.

¹⁶ Dus klakan ba wina mânka kum ba, pauta klauhan ra mukisa; mânka wala ba wîna angki pîsa, wîna angkan kum ridi daukisa, baha pi aibanhwisa. Baha ningkara pauta ra ailahki, bara wisa: “¡Âu, nanara yang lapta takri, pauta klauhan ba yang kaikri!”

¹⁷ Bara tâka kau swin ba wina gâd bahki lilka kum daukisa, baha mawanra bawisa, bara mayunisa bara witin ra ai pura suni wisa: “¡Pri ai sâks, kan man sika yang gâdki!”

¹⁸ Baha uplika diara nu âpu, tânka sin briras; kan ai nakra nani ba sut blain sa, ai kupia sin baku sa diara tânka briaia.

¹⁹ Man nani luki kaikras sma, sins lâka âpu, diara tânka aisaia: “Naha wina mânka kum pauta ra piakri, ai maskuka purara plun angkri, wîna angkri, bara baha piri; bara kau witin mânka wala ba wina diara saura pali kum daukri, dus klakan praiska kum dauki bahara puri sunisna.”

²⁰ Kasak pali sika, yamhpus piaia baku, lukanka bahki ni ai kupia ra kunin munan baha uplika nani sip swak takras kabia. Sip ai dahra wali luki kaikras, ai mihta ra alki ba diara bahki ba.

Dawan lika Israel pâtka kulkras, swaki sakisa

²¹ “Naha diara nani dukiara kupiam krauks, Israel man, Jekob tawanka, kan man ba, yang duki dadaukra sma; yang mai daukri, man ba yang duki dadaukra sma; Israel, yang ra âmya ai tikpara.

²² Maipara buanka nani man daukram ba sut yang slingbi tikri, mukus kum awi tiwi ba baku. Kli yang ra tawi bal, kan yang atki mai sakri bamna.”

²³ ¡Kasbrika pura, liliakira wins Dawan daukan ba dukiara! ¡Wins raya sa, tasba tihuka nani pali ba! ¡Il nani bara unta ra dus tara nani sin, liliakira wini banhs; kan Dawan ai prana ba marikan, Israel luhpia nani ba swaki sakan bamna Jekob uplika nani ba!

²⁴ Naku Dawan aisisa, man sasakra, witin pat mai paskan kan, kau mai baikras kan ba ra: “Yang sika Dawan, diara sut ba paskisna, yang yakan kasbrika pura nani ba yakabisna, tasba ba sin drabisna, wala hilpka briras kira.

²⁵ Yang swiras, prapit kuninkira nani diara aisan ba kat aimakbia; yang daukisna smaya kakaira nani ba, ai raitka ba tikbia. Yang sinskira nani ba yâri kli ai walka mapara aisisa bara sinska lâka ba, diara tânkas ra lakisna.

²⁶ Sakuna yang duki dadaukra aisan ba, yabri daukisa bara bâk saki briri uplika ba lukanka nani ba pain baman takbia. Yang param sakisna, Jerusalem ba kli upla iwan kabia, bara Juda tawanka nani ra sin. Yang daukamni, kli bukan kabia slingwanka nani ba wina.

²⁷ Yang sip sna kabu tihuka tara ra wiaia lâwbia, bara ai laya ba lâwan kaia.

²⁸ Ciro ra yang wisna: ‘Man ba yang sepadki kama, man daukma yang dîa daukaia want sna ba sut’; yang bui Jerusalem ra wisna: ‘Man ba kli mai paskan kabia’; Bara tempel ra sin wisna: ‘Man ra playa tara nani kli bapbia.’ ”