Aiseya 42 - DAWAN BÎLA AISKA

Dawan napakanka ba

¹ “Nâra kaiks yang duki dadaukra ba, yang bui witin ba alki brisna, bâk sakri ba, witin ra yang sulki ba âiyapah sa. Spiritki ba yang bui witin ai purara mangkri; witin mita kasakka lâka ba nisan nani ra bri balaia.

² Yabal nani ra witin winbia apia, ai bîla sin bukbia apia, yabal tara nani ra ai bîla baikra binka sin walbia apia.

³ Yauhrus lâwan ba witin mita krikbia apia, lamp wîkka daswaia kiasma taki ba sin, daskbia apia. Wapni lâka daukanka ba kasakka lâka ba sin bri balbia.

⁴ Witin ris bribia apia, dring sin swapbia apia, tasba ra kasakka lâka ba bapbia ba kat; kabu un ra iwi nani ba, man lâmka ba bîla kaiki kabia.”

⁵ Dawan Gâd ba, kasbrika pura nani papaskra sa, witin sin baha nani slihbi saki ba; witin sika tasba ba paskan bara witinka ra sin pâwi ba, rayaka yabi bara wingka puhbra sin yabisa, upla nani iwi nani ra, ai dukia dadaukra ra wisa:

⁶ “Yang, Dawan, mai paiwri bara mihtam wina mai alkri, man ba upla swaki sakaia dukia kaia; yang mai paskri, yang want sna man baku kaia, yang lâika upla wal daukri ba sainka kaia, nisan nani ingnika.

⁷ Yang want sna nakra yama nakras nani ra bara silak uplika nani silak watla wina sâkma, tihmia tara tilara iwi ba.

⁸ Yang sika Dawan, baha ba yang nini sa, bara yang praina ba upla wala ra yabamna apia. Bara aidul nani ra sin sip mayunras yang sirki ra.

⁹ Kaiks nahki bal aimakan ba diara nani kanra aisari nani kata ba. Bara nanara diara raya nani takaia ba dukiara aisaisna, baha nani maikrika tânka brisma kau bal takras ba kainara.”

Dawan karnakira ba mita pri sakan ba mayunra

¹⁰ Aiwananka raya kum Dawan ra aiwani banhs; tasba tâ wala wina aiwans witin ai mayunra ba; man nani kabu ra bâra taukisma ba sin, kabu un nani ra iwisma ba sin, daiwan nani ba sin.

¹¹ Upla iwras tasbaya nani tawanka tara nani sin, man nani lilia bas, Quedar kiamka nani sin. Selá ra iwi uplika nani sin lilia mita aiwans, il nani bahna wina bîlam baikra binka tara dauks.

¹² Man nani bui Dawan ra mayunra yas, ai mayunra nani ba sturka man upla ra maisa paks kabu un nani ra.

¹³ Dawan bal takbia pura lalura tara baku, bara war aiklaklabra lapta baku, aiklabia ai bîla baikra tara ni, ai waihla nani pura lubia, karna takbia sin.

¹⁴ Dawan ba aisisa: “Piu wihka pali bîli praki sâp pali katna, bin daukras katna; sakuna nanara wina bin daukaisna mairin luhpa baikaia ra ini ba baku.

¹⁵ Il kiuhsi nani ba sauhkaisna, bara twi nani ba sut lâwaia daukamna; awala nani ba sin upla iwras tasbaya daukamna, bara lî mâ dakura nani ba sut lâkamni.

¹⁶ Bara blain nani ba witin nani kakaira apia, yabalka bâk tapahkamna, witin nani ai mawanra tihmia tara ba ingni daukamni, bara pruamni ba langni daukamna. Baha dîa daukaia aisisna ba kat daukamna.

¹⁷ Aidul nani ra ai kupia lukra mangki bri nani ba, witin nani ai gâdka nani wi ba: “Man nani ba yawan wan gâdka sma’, witin nani ba swira daukan, kitwi tnaya ra tawi wabia.

Lâ smalkan ba Israel sip lan takras

¹⁸ “Kiama prawan nani, man nani wals; blain nani, man nani kaiks.

¹⁹ Upla kumi sin blain bara kiama prawan wina wala âpu sa yang duki dadaukra, bâk saki briri ba baku, upla wala âpu sa kau blain bara kiama prawan yang bîli twatwilkra Dawan dukia dadaukra ba baku.

²⁰ Witin diara manis kaikisa, sakuna tânka nani ba kat sip alkras; binka nani ba walisa, sakuna tânka ba sip briras.

²¹ Dawan ba, Gâd kum upla swaki saki ba, witin smalki tânka ba, param mayunra tara daukaia want sa;

²² sakuna naha uplika nani dukia nani ba implikisa, ai mina ra taibisa, witin nani sut tasba unta ra priskan, silak watla nani ra yukuki mangki swin sa, bara upla kumi sin âpu sa, witin nani ba swaki sakaia.”

²³ ¿Sakuna ya man nani tilam wina naha na walbia? Naika diara nani aula ba dukiara, ¿ya man nani tilam wina aihwaki kabia?

²⁴ ¿Ya mita yan Jekob dukia nani ba dakbi brih waia, bara Israel ba taibi muni, dukia impliki waihla mihta ra mangkaia? Baha sika Dawan kata ba, yawan bui witin ai mapara saura dauki na. Witin nani ai yabalka nani ra impakaia brin wan daukras kan, ai lâka ba sin yawan nani walras kan.

²⁵ Baha mita, witin yawan wan purara ai kupia baiwanka ba laikan, bara war karnika ba sin; tnaya bani ra pauta klauhan mangkan, sakuna yawan tânka briras, witin âpu wan daukan, sakuna yawan baku sin kau ai bîla walras.