Aiseya 41 - DAWAN BÎLA AISKA

Dawan bui Israel ra pri lâka yabaia pramis munisa

¹ “Man nani kabu un ra iwi uplika nani, sâp taki yang ra wals. Nisan nani aiklabaia dukia nani bri karnikam aiska ni, ridi taki banhs. Bali banhs bara kaisa wal aisi kaikaia naha tânka dukiara; kaisa asla taki sturi aisi kaikaia.

² ¿Ya mita lalma tanik yaban bal takan baha kingka piu bani ra pura lui ba? ¿Ya mita nisan nani ba yaban, bara king nani ba yan bawisa, baha ai sordka bara ai pantamangkaika ba inma wahia baku akbi tikamna bara sin baiki sakamna?

³ ¿Ya mita daukisa ki, witin nani ai nina bliki kaia bara ai kupia kumi impakbia sim yabal ba ai mina ni taibras kan baku?

⁴ ¿Ya mita naha warkka daukan sa? ¿Ya, blasi wina adar yaban kiamka nani sturka aisi aula? Yang sika Dawan, Gâd kumi baman ba, tâura bara natka ra ba sin.

⁵ Kabu un ra iwi uplika nani ba kaikan bara witin nani sibrin daukan; tasba tâ kum wina tâ wala kat, tâ iwan, tatatwan. Pat baila aula, pat aula.”

⁶ Diara papaskra kumi bani lamara iwi ba, ai walka nani ra tâ baikisa.

⁷ Diara nani lilka paski uplika ba mita, gul ni diara papaskra ra tâ baikisa; amar ni pruki lalalni dauki ba mita, ayan ra mangki pruki bara sin baku win, slilki prakanka ba pain pali sa; bara silak ni aidulka nani ba sabi karna daukan, kitwaia apia dukiara.

⁸ “Jekob tawanka Israel luhpia nani, wals, yang duki dadaukra bâk saki briri ba, Ebraham yang upliki pali kiamka ba wina:

⁹ Tasba paski takaskri ba wina mai paiwri, plis kau laihura pali ba wina, bara man ra mai wîri: ‘Man ba yang warkki dadaukra ba.’ Bâk mai sakri bara mai lulki lika mai swiras.

¹⁰ Si bripara, kan yang lika man wal sna; dring prupara, kan yang lika man Gâdkam sna. Karna mai daukisna, piua bani hilp mai munamna. Piu bani tâm baikamna mihti aihkika pura luan lâka bri ba wal.

¹¹ Baha nani sut misbara mai kaiki ba, witin nani ai swira daukan kabia, mâyara batakan kabia; man mampara banhwi ba witin nani diara apia baku kabia.

¹² Waihlam nani ra plikma, bara witin nani ba sâkma apia; mampara war aiklabi nani ba witin nani âpu pat pruan baku kabia.

¹³ Kan yang, Dawankam, yang sika man Gâdkam, yang sika man mihtam aihkika ra tâm baikisna ba, bara mai wîri sa: ‘Si bripara, yang hilp mai munisna.’ ”

¹⁴ Dawan wisa: “Israel, Jekob uplika nani, man nani maura lupia bara karnikas sma sakuna, yang lika man hilpkam sna; si bripara. Yang, Israel Gâdka Holikira, man sasakrikam sna.

¹⁵ Bara kaiks plawar taya sakaika watlika ra yang mai mangkamni, taya sasakra raya, napa nani pain pali; il nani ba taya sâkma bara akbi yuya daukma, bara kiuhsi nani ba taya man daukma.

¹⁶ Witin nani ba pâsa ra bukma, bara pâsa mita witin nani ba brih wabia, prari mita tanis yakabia. Bara man Dawan ra lilia kama, Israel Gâdka Holikira ba dukiara tara damra wali kama.

¹⁷ “Kupia kriwan umpira nani ba, lî plikisa, sakuna sip lî sakras. Diran daukan man ai twisa nani ba sut lâwan sa; sakuna yang, Dawan ba witin nani ra walamni, yang lika Israel Gâdka lulki swimna apia.

¹⁸ Il nani purara upla iwras tasbaya ba awala nani daukamna; upla iwras tasbaya ra ba drapapa tasbaya daukamna, tasba lâwan ba ra tingni nani daukamna, yabrika lî aubra bal takbia tasba lâwan wina.

¹⁹ Upla iwras tasbaya ra yalam nani mangkamna, tangni dusa nani bara oliv nani sin pâwbia; tasba lâwan ra yabrika awas sâtka dusa nani mangkamni, dus nani bara awas nani sin aikuki asla pâwbia,

²⁰ tasba ra upla sut baha kaiki tânka bribia dukiara, witin nani ai tânka bri kaia sa bara sut sin tânka bribia, yang Dawan sna na, baha sut ba karniki wal daukri ba. Yang, Israel Gâdka Holikira sna, baha ba paskri.”

Gâd bui upla mita paskan gâdka nani ra tânka kaikisa

²¹ Dawan, Jekob kingka witin aisisa: “Aidul nani, bal, man hilpkam aisas, dîa daukisma raitkam aisas.

²² Diara nani bal takaia ba dukiara man nani param wan wis, diara pat taki luan ba tânka ba sin wan wis yang nani aman wali kamna; bara diara nani naika takaia ba sin wan wis, ani kat takaskuya yang nani kaikaia;

²³ wan wis ningkara dîa takaika ba, wan mariks, witin nani ba rait gâd nani sapa; man nani dîa daukaia sip sma ba dauks, yamni kra, apia kra saura ba, baku diara kum sibrin wan dingki sibrin wan dauki wan mariks.

²⁴ Sakuna man nani sika diara apia, dîa daukaia sin sip apia. Saura kulkan kabia, baha uplika bâk saki mai brin nani ba.

²⁵ “Yang daukri waitna kum lalma ra takaia; witin nina kat mâki winri, bara yahbra tanik aula. Tawan wihtka nani ba slaubla ra baku ai mina ra taibisa; sumi papaskra baku ai mina ni slaubla ba akbisa.

²⁶ ¿Ya mita naha sturka na maisa pakan tâ pali wina, bara yawan tânka briaia kan? ¿Ya mita pat dahra aisin, bara yang nani witin ra raitka yabamna? Man nani kumi sin baha takaia sturka ba aisaras kapram, upla kumi sin bîla kumi pan aisaras kan.

²⁷ Yang sika pas baha tânka nani Saion ra marikri ba, bara ya mita blikan Jerusalem ra bîla twatwilkra kum witin nani ra wiaia upla nani ba pat pali kli tawi balbia.

²⁸ Kaikisna, bara gâd bahki wala nani kumi sin bal takras; upla kumi sin âpu kan lâ tânka wan smalkaia, upla kumi sin âpu sa makabanki ba ai wiaia.

²⁹ ¡Witin nani kumi sin diara apia sa! Diara kumi sin daukras; aidul lilka bahki nani baman.