Aiseya 39 - DAWAN BÎLA AISKA

Babilon wina blikan nani ba Ezequías brin

¹ Baha piua ra Merodac-baladán, Baladán luhpia waitna Babilon kingka ba, walan kan Ezequías siknis ba, sakuna pat sin rawan kan ai sikniska wina, bara wauhkataya twatwilkra tila aikuki wauhkataya ulban, bara prisantka blikan.

² Ezequías witin nani wal lilia takan, bara witin ai watla ra ai dukia kukanka nani ba baha nani ra marikan, silbar, gul, diara sâtka wala nani sut, bara batana manakira nani sin, war aiklabaia dukia nani kukanka bâra kan ba; ai watla bîla aiska ra diara nani bâra kan ba king tasbaya ra kan ba sin sut pali marikan baha nani ra. Ezequías witin nani ra diara marikras kan dukia ba kumi sin swiras kan.

³ Bara prapit Aiseya ba, king Ezequías ra balan bara makabi walan: —¿Baha waitnika nani ba ani wina balan, bara dîa sin mai win? Bara Ezequías pana aisi, win: —Plis laih wina balan, Babilon tasbaya wina.

⁴ Aiseya witin ra makabi walan: —¿Bara king, man wamtla ra dîa kaiki banhwan? Bara Ezequías pana win: —Dîa dîa bâra ba sut pali kaikan, kaikras ba kumi sin luras sut kaikan.

⁵ Bara Aiseya mita Ezequías ra win: —Wals karnika sut bri Dawanka ba bîla:

⁶ ‘Yua kumi balbia wamtla bilara diara nani uya bâra ba, bara diara nani sut pali man damikam nani mita kukan ba naiwa yua kat, baha nani aiska ba Babilon ra brih wan kabia, bara diara kumi sin swin kabia apia.

⁷ Bara man luhpiam nani man wina takbia kiamka nani tila wina sut ba, Babilon ra bri si wîna krukmika ba saki, king watla ra alba bri kabia.’

⁸ Bara Ezequías mita Aiseya ra win: —Dawan bîla man aisaram ba kasak pali sa. Ba ningkara win: “Yang yui nani ra kupia kumi sibrin luha pan lika bâra kabia.”