Aiseya 34 - DAWAN BÎLA AISKA

Gâd kupia baiwanka Edom purara

¹ Nisan nani sut, man nani lamara bal, sturi na wals; man nani sut asla taki sturi na wals. Tasba walbia, baha bilara bâra ba sin.

² Kan Dawan ba nisan nani sut mapara lawisa, ai lawanka ba war aiklaklabra nani ailalka ba mapara lawisa, pât ban kaia ra ba ra sauhki tikaia ra lulkan sa.

³ Bara witin nani ai pruanka nani ba lulki swin kabia, bara ai wîna tara nani ba bisbaya bukbia; bara il nani bâk witin nani ai tâlia ba awala baku aubi kabia.

⁴ Bara kasbrika purara slilma nani ba sut sin plapi kabia, sim wauhtaya karbi baku karbia; bara ai lampka nani sut ba ingnika daskbia apia, wain kiwka wina wahia lâwan nani kauhi ba baku, kwah damni dusa wina wahia kauhi ba baku sin.

⁵ Âu, kaiks Dawan sordka ba kasbrika purara bal param takisa bara Edom purara bal kauhaisa, pruaia pâtka ra lakan uplika nani ba.

⁶ Dawan sordka ba, tala bara batanka nani ni aibanhbia, sîp bara guts wainhka nani sakripais daukaia ikan baku; Dawan Bosrá ra sakripais nani daukaia brisa, bara upla ailal ikbia Edom tasbaya ra.

⁷ Witin nani bîp wail nani ikan baku kabia, bîp wainhka tara nani bara bîp wainhka sirpi nani pruan baku; bara witin nani ai tasbaya ba tala man buswan kabia, bara tasba yuyaka ba bîp batanka man takbia.

⁸ Baha Dawan mita pana munaia yua ba aimakbia, Saion tâwan aisaia manka alkan.

⁹ Tingnika nani laya ba târ klaswan baku takbia, ai tasbaya yuyaka ba sulpa baku, bara ai tasbaya ba târ lapta slilwi baku kabia.

¹⁰ Tihmia ra, kakna ra sin baha dasbia apia. Ban kaia ra ai kiasmika ba uli kabia. Kiamka kum wina ban kiamka wala nani sut piua ra baku lulki swin kabia, upla kumi sin kli bahak lui wabia apia ban kaia ra.

¹¹ Kaku, sikiski taya kiaikira nani ba, witin ai dawanka takbia, iskri bara kuskuspiram nani witin ra iwbia, bîla man swin kabia kuntrika tasbaya ba.

¹² Witin nani kli king bribia apia ai tilara wihta aimakaia, wihta nani ba sut lap tiwbia.

¹³ Kingka watla nani ra kiaya pâwbia, wahia kiaikira dusa nani sin pâwbia ai kan kahbaika pliska nani ra; bara yul wail nani iwaika watla kabia, bara daiwan pâlras tara nani luhpia watla latka kabia.

¹⁴ Pûs wail nani yakal tara nani wal ai yula kahbi kabia, guts wail nani sin ai walka nani ra pana pana wini kabia. Bahara pirit saura ba iwi kabia, tihmia ra sirang iki ba ai watla sâkbia bara ris briaia sip kabia.

¹⁵ Bahara iskri ai watla mâkbia, ai mahbra nani âpbia, ai luhpia nani baikbia, baha nani ai tnawa nani munhtara asla daukbia. Usus sâtka nani kumi bani ai wainhkika bara mairka nani sin bahara asla takbia ai maya nani wal.

¹⁶ Dawan wauhkataya ra pliki kaiks, bara aisi kaiks witin nani kumi nina mâkras swi luan sa sapa; kumi sin ai maya briras ba âpu sa; kan witin ai bîla aisin, adar yan; bara baha nani sut ba ai spiritka ni asla daukbia.

¹⁷ Bara witin baha nani kumi bani tasbaya yan, Dawan mita daiwan bani takaskaia pliska ba daukan, baha nani ai tasbaya ba ban kaia ra baku bri kabia, kiamka wina kiamka nani sut ra, witin nani bahara iwbia.