Aiseya 33 - DAWAN BÎLA AISKA

Dawan ra bîla kaikanka bâra sa

¹ ¡Sasauhkra, man ra saura pali kabia, man ra lika mai sauhkras; pât ra dadingkra man ra lika pât mai dingkras! Sut sauhkma ba ra, man ra sin mai sauhkan kabia, sut pât ra lakma bara man ra sin pât ra mai lakan kabia.

² Dawan, yang nani ra umpira ai kaiks, yang nani lika man bîlam kaikisna. Man bui yang nani tâi baiki ai bris titan bani, wan trabil tara piua ra sin man wan swaki wan sakisma.

³ Wan sauhkaia aulma binka ba upla nani wali, plapisa, man wan tilara dimisma ba ra nisan nani ba turwi takisa;

⁴ ai waihla nani ba, kasbrika ra tristrisia nani ailal pali baku, witin nani purara kauhi diara bri ba sut mihta dakbisa.

⁵ Dawan yakan ai lâka daukisa, witinka ai iwaika ba laih purara ba ra iwisa; wapni lâka bara kasakka lâka witin Saion ra banhkan,

⁶ witin mita kaina kaiki ban kabia. Sins lâka ba bara diara tânka kaikaia tânka ba sin diara kukanka bara swaki wan sakisa; Dawan sibrinka lâka ba wan dukia kukanka kum sa.

⁷ ¡Kaiks witin nani kupia karnira nani ba, ai bîla baikra latara karna wini aisi ba, kupia kumi lâka daukaia, bîla twatwilkra nani ba tahpla pali inbia!

⁸ Yabal nani wapi kan ba swin sa, wawapra nani impaki kan ba takaskan. Wal lâ daukan kan lâka ba, bahki daukan; tawan tara nani ba misbara kaikan, upla nani ba diara bahki kulkan.

⁹ Tasba kwala siksa dimi sari sa; Líbano ai swira luki srawan; Sarón ilka bîla sin upla iwras tasbaya baku takan, Basán bara Carmelo ilka sin wahia nani âpu daukan.

¹⁰ Dawan ba aisisa: “Nanara yang buamni; nanara tâinka marikamni yang kulkanka tara brisma ba.

¹¹ Man nani diara daukaia lukram ba, wark nani sin daukaia lukram ba, dus wahia lâwan baku sa, dipasta baku; wingki puhbra kumi mita, pauta ami baku klakbia.

¹² Bara upla nani ba yamhpus aman baku kabia; kiaya nani klakan pauta ra angkan ba baku kabia.

¹³ Wals, man nani laihura sma ba baha warkka yang daukri nani ba; bara man nani sin baila ra sma ba, man nani bui yang karniki ba tânka kaiks bara aisas.”

¹⁴ Saion ra saura dadaukra nani ba sirang iwi tatatwisa, upla saura nani ba sirang iwi bal aisisa: “¿Ya yawan wan tila wina pauta klauhan wan sasauhkra bâra iwi ban kaia sip sa, pauta klauhan ban kaia ba?”

¹⁵ Witinka kasakka lâka kat wapni ba, wapni lâka kat sturi aisi ba, witinka lâ krikanka wina diara nani pura praki briaia misbara kaiki ba, witinka taiban lâka wina diara briras, bara prisant nani ni sin atkras ba, ya baha bîla walras upla ikaia ba dukiara, bara ai nakra prakisa saura ba kaikaia apia mata,

¹⁶ baha ba kasak iwbia, walpa tara nani ra ai kan kahbaika pliska kum bribia, witin ra ai pata yabia, ai laya briaia ba lika kasak pali brin kabia.

¹⁷ Man namkra nani king ba kaikbia, witin ai prana ra iwi ba; namkra nani baha tasbaya laihura ba kaikbia.

¹⁸ Sirang mai iki kan tilara iwi katma ba kupiam krawbia, bara man wima: “¿Anira sa lal mana nani kulki kata ba? ¿Anira sa paun ra atki kata ba? ¿Tawer nani kulki kaiki kata ba anira sa?”

¹⁹ Baha tawanka uplika nani ai uplika nani kulkras ba kli kaikma apia, uplika nani bîla aisi ba wali tânka briaia karna ba, twisa warbi aisi bîla nani upla ba tânka sip briras ba.

²⁰ Saion ba kaiks, yawan mani bani Dawan ra lilia tara dauki tawanka tara ba; man namkra nani Jerusalem ra kaiki kaikbia, sâp iwaia watla ba, tint watla kum slingbras kabia ba, dusa bapan ba sin daiki sâkbia apia, kiwka nani kumi sin dakban kabia apia.

²¹ Sakuna kasak pali bahara Dawan yawan wan karnika kabia, awala nani ra, tingni bîla tara nani na, bahak kwahi ni kaubi duri tara watauki kabia apia, bahak duri tara nani sin lubia apia.

^22-23 Baha dwarka tara nani kiwa bri ba mahka ba wilki sip alki takaskbia apia; kwalka ba sin witin nani sip sunras kabia. Wan waihla nani dukia kukan ba yawan dakbi bribia. Blain nani pali sin baha dukia wina ai dukia bribia. Bara skahwa nani ba sin impliki briaia warkka daukbia. Kan Dawan ba yawan wan wihtka sa, yawan wan lâka dadaukra, yawan wan kingka, Dawan swaki wan sâkbia.

²⁴ Bara iwi nani ba wibia apia: “Yang siknis sna.” Bahara iwi uplika nani watawanka nani ba Gâd mita ban swih tikan kabia.