Aiseya 3 - DAWAN BÎLA AISKA

Jerusalem Juda wal klala bribia ba

¹ ¡Man nani pain kaiks! Karnika sut bri Dawanka ba daukbia, Jerusalem bara Juda wal ra diara sât ailal ni tâ baiki ba, plun lî sin yabi ba takaskbia.

² Kupia sibrin âpu aiklabi nani ba, wihta nani, prapit ba, diara tânka kakaira ba, almuk nani ba,

³ kapitang ba, tara kulkan uplika ba, lâ tânka smasmalkra ba, sinskira aihwa diara dauki ba, âuya mâira aisika ba sut âpu daukbia;

⁴ bara wahma nani ba, witin nani wihtka kabia, tuktan nani mita tawan ba tâ bribia.

⁵ Lâ krikanka nani uya daukbia, upla nani, upla wala mapara, witin nani ai uplika nani pali mapara. Wahma nani ba, almuk nani ba mapara bubia, saura kulkan nani ba yamni nani ba mapara bubia.

⁶ Upla kum ai muihni mihta wina alkbia, ai aisika watla bilara, bara witin ra wibia: “Man kwala dimaia brisma; man ba yawan wan wihtka aimaks, bara naha sauhki tikanka na mihtam ra bris.”

⁷ Bara walka ba wibia: “Yang baha wirhika ba sip brimna apia, kan yang waitla ra sin plun âpu, kwala dimaia sin âpu. Tawan kingka ai mangkpara.”

⁸ Jerusalem ba sut aisawan sa, Juda sin kauhan; witin nani aisi ba ai warkka nani daukan ba sin Dawan mapara sa, ai kingka kupia sauhki ba dukia daukisa

⁹ Witin nani ai swira âpu tâka mita ai saurka ba yukukras witin nani ai witnis aisisa; Sodoma baku ai saurka dahra tasba aiska ra maisa pakisa, yukukras. ¡Witin nani ra saura pali kabia, kan silp daukisa, klala briaia ba!

¹⁰ Kasakkira nani ba, witin nani lilia pali kabia, ai mihta warkka mâ nani pibia bamna.

¹¹ ¡Saura pali kabia watawikira ba dukiara, witin nani saura ra wabia! Ai mihta warkka nani mana ba praiska kat, Gâd bui witin nani ra aibapan kabia.

¹² Upliki nani, tataibra ba wahma lupia kum sa; mairin nani wihta tara aimakan sa. Man nani upliki nani, tâm bri nani ba mita kunin mai munisa, yabal wala bâk mai bri auya.

¹³ Dawan ridi taki buisa lâ aisaia dukiara, bâra sa ai uplika nani lâka daukaia.

¹⁴ Dawan bal upla lâ ra paiwbia, tawan almukka nani ra, wihta nani ra wibia: “Man nani sika wainki nasla ba âpu daukisma; bara umpira nani dukia ba implikram, baha dukia nani ba wamtla nani ra dingki main kaikisma.

¹⁵ ¿Man nani raitkam ani wina bri upliki nani yuskisma, bara umpira nani mawan ra taibisma?” Karnika sut bri Dawanka witin aisisa.

Saion luhpia mairin nani klala bribia

¹⁶ Baku sin Dawan aisisa: “Saion mairka nani ra, witin nani baman sa luki ba, ai nana dusa nani ba wapni pura kat kaiki wapisa, upla wala nani ra kaiki ba kulkanka âpu, wapi tauki bara ai mina ba klutka lulki wapisa, bara ai mina nani ra sakahki dukia bin daukisa,

¹⁷ baha ba mita, Dawan bui Saion mairka lal tâwa nani ba kusbi sâkbia, ai swira lâka nani ba param ra sâkbia.”

¹⁸ Baha yua ra Dawan mita naha prana nani sakahkan ba sut lap tikbia, ai sûska prana nani ba, tâwa pitbanka nani ba, kati lupia prana nani ba sut,

¹⁹ lilura nani ba, kiama lula nani ba, bara bangkilka nani ba sin tikbia,

²⁰ lal mangkaika nani ba, mina ra sîn lupia nani ba, maisa wilkaika nani, kîa yamni batilka lupia nani ba, bara tup nani ba sin âpu daukbia,

²¹ mihtadingka nani ba, kakma ra dingkaika nani ba,

²² kwala pranakira nani ba, angsar tara nani ba, pahpaya prakaia kwalka nani ba, sakbat nani ba sin âpu daukbia,

²³ wan mawan kaikaia glaska nani, linin painkira, prâk pura dimaika nani ba, bara mawan pura prakaika nani sin âpu daukbia.

²⁴ Kîa yamni watlika ra bisbaya balbia; maisa wilkaika watlika ra, rup; tâwa pain pitbanka watlika ra lal ba kusban kabia; kwala pranakira ni ai maisa wilkaia watlika ra, krukus ni wilkbia, bara prana painkira kaia ba watlika ra, ayan ni mark kum pauta klauhi baku kabia.

²⁵ Waitna nani ba sord ra kauhbia, war aiklaklabrikam nani ba war ra prubia.

²⁶ Tawan getka nani ba, sari bribia bara inbia, bara witin nani, lulki bîla man swibia.