Aiseya 29 - DAWAN BÎLA AISKA

Ariel ai waihla nani ba wal

¹ ¡Saura pali kabia Ariel mapara, Ariel, baha tawanka tara ra Debit ai kiampka bapan ba! Kau mani kum kum witin ai liliaka dauki ba piua lubia ba ra,

² Ariel purara pât saura nani brih balaia sna, bara ini yahwi mamna lulkanka nani man kabia bara yang maipara Ariel ba masku aswi baku kabia.

³ Man mampara tnamya kir waihlam nani bapamna, kan kahbaika pliska nani wal mai kutbamna, tnamya kir yukuwi mampara aiklabaia nani ba blikamna.

⁴ Bara man ba mâyara mai ikan kabia, tasba kat mai batakbia; bara man bîlam baikra ba lasa kum aisi ba baku kabia, aisinkam ba yuya ba wina pusbi aisi baku kabia.

^5-6 Sakuna istikira, wan nakra klipan kumi ra karnika sut bri Dawanka ai waihla nani ra klala yabia. Witin balbia alwani nani wal, tasba nikbi bin tara nani kira sin, skwal pâsa saura bara pauta klauhan sauhki tatikra kira. Waihlam ailal tasba yuya man takbia, ninam blablikra nani ba twi lâwan baku raski bri wabia.

⁷ Waihlam nani kwâra tara Ariel mapara aiklabi ba sut tihmia ra yaprisauhkan ra baku kangbi sakan kabia, baha nani sut witin mapara aiklabi ba, baha sut witin ra taiban lâka ra mangki ba sin.

⁸ Witin nani ba, upla plun dauki kan yapi yaprisauhkan kaiki ba baku kabia, witin lukisa plun pîsa, sakuna rawi bara ai biara bîla man sa; diran dauki kan yapi yaprisauhkan kaiki ba baku kabia, witin daukisa ai kârma ba sin lâwan sa. Bara baha tawanka ailal sip kulki sakras Saion mapara aiklabi nani ba sut baku kabia.

⁹ ¡Man nani lamla karna bas, diara walras! ¡Man nani blain ban bas, diara kumi sin kaikras! ¡Wain di bla takram ba baku pirwi bas, ban kra wain piawi takan ba diras kama sin!

¹⁰ Kan man nani puramra upaia spiritka laikan, man nani prapit nani ba sika namkra nani, sakuna Dawan mita lal purara kwala prakan.

¹¹ Man nani namkra ra lilka nani kaikisma ba sut pura prakan; wauhtaya kum ulbi karbi praki swin ba baku. Bara aisi kakaira kum ra witin nani aisi kaiki yabia, bara witin ra wibia: “Nanara naha aisi kaiks”, bara pana wibia: “Yang sip kaikras, kan naha na sîl prakan ba mita.”

¹² Bara baku wauhkataya ba, aisi kakaira apia ba ra yabia kaka, bara witin ra wibia: “Nanara man naha na aisi kaiks”, witin sin wibia: “Yang wauhkataya aisi kakaira apia sni.”

¹³ Dawan bui ai win: “Dîa muni naha uplika nani ai aisinka ni baman laimara balisa, ai un nani ni, yamni kulkan lâka aikisa, sakuna witin nani ai kupia ba yang wina laihura sa, mayunra dauki ba waitna nani ai lâka kum kulkaia smalki yan ba kulki ba baku daukisa, ai sinska kat lan taki muni.

¹⁴ Baha ba mita, kaiks naha uplika nani kli munrika sirang iwi mita taki wabia, kli diara aihka tara dauki sirang ikamni, baha sinskirka nani sinska lâka ba lap tiwbia, bara diara tânka kaikaia sinska lâka bri ba âpu takbia.”

¹⁵ ¡Saura pali kabia baha nani ra, Dawan wina yukuwi ba witin nani dîa daukaia aisi ba yukukisa, ai watawika nani yukuwi dauki ba bara witin nani wisa: “Upla wan kaikras. Upla wala nu âpu sa”!

¹⁶ ¡Diara daukaia nani ba sut makupisa! Slaubla ni diara papaskra uplika ba baha slaublika wal baku kan sât. Dukia kum ba mita, ai papaskra ra sip wibia apia: “Man bui yang ai paskras”, lî watla kum ba mita sin ai papaskra ra wibia ki: “Man dîa daukisma ba tânka briras sma”.

Israel swaki sakan kabia win ba

¹⁷ Nanara wina kau wihka apia bara unta tara nani pâwan ba saumuk mangkaia tasbaya daukan kabia bara saumuk mangkaia tasbaya nani ba sin unta tara nani pâwbia.

¹⁸ Baha piua ra kiama prawan nani ba baha wauhkataya bîla aisi kaiki ba walbia, blain nani sin kaikaia sip sa, pukni bara tihmu ba wina.

¹⁹ Bâra mika bawikira nani ba ailal lilia lâka ra Dawan ra kasak lukbia, upla nani kau umpira pali ba sin Israel Gâdka Holikira ba wal lilia bribia.

²⁰ Upla tataibra nani ba âpu daukan kabia, lawaska kakikra ba sin âpu tikan kabia; bara âpu tiwan kabia saura daukaia luki uplika nani ba.

²¹ Baha nani mita upla wala ra upla âikra wisi dahra saki ba, bara lâ wihta nani ra mina ra wilkaika kiwka nani mangki ba. Bara pâtkas nani ra kunin lâka ni raitka yaras kan.

²² Baha mita, Dawan, Israel Gâdka ba, Ebraham kli atki sakan ba, witin naku wisa: “Nanara wina Jekob kli swira daukan kabia apia, ai mawan sin kli ami pauni takbia apia.

²³ Kan ai luhpia nani ba kaikbia yang mihti warkka ba, witin nani ai tilara daukri ba, witin nani bui yang nini ba holikira kulkan kabia, witin nani Israel Gâdka sibrinka bribia.

²⁴ Aimawahkan nani ba sins briaia lan takbia, rarangbra nani ba sin lâ smalki yan ba witin nani lan takbia.”