Aiseya 28 - DAWAN BÎLA AISKA

Sameria ra maisa pakan ba

¹ ¡Alai pali kabia Sameria, Efraín prautka lâka bara kraunka ba, tangnika painkira pranakira ba srawan, baha il plahpia laih purara bâra kan ba, bara wain di lal saura takan ba!

² Kaiks Dawan nâra brisa, waitna kum karna pali, pâsa baku karnika brisa, lî diara sauhkaia auhi ba baku, kauhla pâsa krawi ba baku karna sa, lisamra dingkaia laya auhi ba baku sa, lisamra tara aubrika karna platukbi ba baku sa karnika ba wal tasba ba sauhkisa.

³ Bara ai mina ra taibia, praut lâka nani ra bara kraun ra, baha Efraín tawanka dadira nani ba.

⁴ Bara tangni srasrawra painkira baha il plahpia pura prana ba, tâura kwah mâ nani alkan ba baku kabia, ani uplika pas baha kaikuya ba, mahka ai mihta ra alki pibia.

⁵ Baha yua ra karnika sut bri Dawanka ba, ai uplika kau tâka swin ba kraunka pranakira aimakbia, yamni kulkan kraunka pranakira ba baku kabia;

⁶ lâ kasak daukaia spiritka yabia wihta nani lâ dauki bara suldiar nani ra sin kupia karna daukbia tawan ba kan kahbaia.

Jerusalem ra maisa paki pramis takan ba

⁷ Baha nani wain di pirwi tauki ba, wain karna piawi kisni taki ba di pirwi ai ninara wapi ba: prîs nani, prapit nani sin dih baku dauki ba; witin nani sut bla taki sinskas taki ba; wain karna di ai mina ra wapi ba, diara aihka kaikan ra sin pirwi kan bara bla sa, lâ daukan piua ra.

⁸ Ai tibilka purara aikaban tâskika wan âuya warbisa bara pliska kum sin klin âpu sa.

⁹ Witin nani ba yang wina walan wisi daihra aisi si, bara wisa: “¡Yawan ra aula smalkan wankaia, wan smalki wan marikaia! ¡Yawan na tuktan lupia bamna,

¹⁰ bara aisi kaikaia namika ra lan taki ba; a i u aisi kaiki ba baku!”

¹¹ Bamna aitani, witin nani ra un briras kabia kaka, bîla tringsar ra blaki aisinka baku kabia Gâd mita naha uplika nani ra baku aisabia.

¹² Gâd upla nani ra kainara pat win kan: “Nahara sa wan riska ba, swapan nani ba ris bribia.” Sakuna witin nani baha walaia apia win.

¹³ Baha mita Dawan bui witin nani ra aisabia tuktan sirpi nani ra baku, namika ra aisi kaikaia lan taki ba; witin nani wapbia bara kauhbia ba ra, insauhkan kabia, mina alkaika ra dimbia, bara bahara takaskbia.

¹⁴ Bahamna man nani kakikra, upla mina pruki nani Jerusalem ra uplika nani wihtka aimakisma ba, man nani bui Dawan bîla na wals.

¹⁵ Man nani lika naku aisisma: “Yang nani prura wal lâ daukri, prura kingka tasbaya wal sin lâ daukri sari lâka klalka balbia ba ra, yang nani ra ai alkbia apia; kumi lâka ra yukuwaia plikisni, kunin ai muni bara yukuwaiki daukri.”

¹⁶ Baha mita, Dawan ba naku wisa: “Saion ra walpa kum mangkamni, walpa kum mana tara pali bâk saki briri ba, walpa pas, sut wihtka ba, baha purara mâki kaia walpaya ba, ya witin ra kasak luki ba ai âuyapah kaia sip kabia.

¹⁷ Baha watla mâkaia lâka ba ni kulki kaikaia kiwka daukamni, watla mâkaia ba wapni mâkaia sakaia dukiara.” Kunin aisaia lâka ra, man nani yukuwaika wantka briram ba baha slingbamni, lî klaswan awi ba bara lî aubra mita yukuwaika watla ba aubi brih wabia.

¹⁸ Man nani prura wal lâ daukram ba bahki ra lakan kabia, bara man lâmka ba, prura kingka tasbaya ba wal bahki ra tawbia. Klala saura balbia bara man nani puramra taibia.

¹⁹ Aima an taim balbia sut witin nani ra raski brih wabia, titan bani bal lubia, kakna ra bara tihmia ra sin. Aula ba sturka baman wali bara pat tatatwi kabia.

²⁰ Krikri sirpi kum ra aitniki sip ai mina sakbras ba baku, pura bikaika bîla sirpi aiblakwaia sip apia ba baku.

²¹ Kan Dawan aiklabia Perasim ilka ra aiklaban ba baku, Gabaón ilka bîla ra aiklabi kan wih kaikan ba baku, ai warkka ba daukaia dukiara, ai warkka aihkakira ba, warkka daukaia win ba yaka daukaia, ai warkka aihkakira ba daukaia.

²² Bamna, ¡nanara man nani, upla mina praprukra lawaska kakikra nani kapara!, mai priskanka nani ba kau karna mai taibaia apia. Kan sauhki tikaia karnika sut bri Dawanka ba wina yang walri, pat luki kaikan sa kuntri aiska purara daukaia ba.

²³ Man nani wals: Yang bui man nani ra aisisna ba wals; bîli aisinka nani ba, man nani aman wals:

²⁴ Insla mamangkra kum mangkaia auya bara yu aiska ra tasba tukbi yu dimras, apia kaka tasba baiki, apia kaka tasba aubi.

²⁵ ¿Baku daukisa apia, tasba pura ba sut ridi daukan ba ra, eneldo saumukka ba mangkisa apia kaka kumin saumukka ba sin mangki, baha ningkara barli mâ nani ba sin lainka ra mangkuya, insla un ra utmil sin, saumuk wala nani sin mangkisa?

²⁶ Gâd mita smalkisa, witin ra sin marikisa nahki daukaia ba.

²⁷ Eneldo ba taya sakaika ra mangkras, karita wilwaika ba sin kumin mâ purak karbi lukras; ban sakuna dus kum ni eneldo ba drusban, kunin ba sin dakbaika dusa ni dakban.

²⁸ Plawar ba taya sakisa, sakuna takaskras taya saki kabia apia; ai karitika wilwaika ba ni mâ ba akbras, taya sakaika napa ba ni sin mâ ba krikras.

²⁹ Karnika sut bri Dawanka ba sin ai warkka ba baku daukisa. Witin ai warkka daukaia natka nani sut aihkakira nani brisa, sins tânka tara nani ni warkka nani ba sut daukisa.