Aiseya 22 - DAWAN BÎLA AISKA

Jerusalem dahra aisin ba

¹ Lilka kaiki ba ilka langnika ba dahra aisisa: ¿Dîa takisa, upla sut utla bahna ra uli ba?

² Man nani, mai turban sa, tawan tara unsaban binka pali man ba, tawan tâura, lilia nani pânika ba, pruankam nani ba sord malika pruras, war ra sin pruras kan.

³ Wihtkam tara nani sut trisba nani sîa plapan, sakuna alki silak ra mangkan; waitna kau tahplu nani bri kapram ba sut sin plapi laihura wan, sakuna baha nani sin alki priskan.

⁴ Baha mita yang wîri: Man nani ai swis, inanka tahplira ba inamni, maisi nihkaia wisi ai aisapara, tawanki luhpia mairin nani sauhki tikanka saura ba wina.

⁵ Kan Dawan karnika sut bri ba pat aisin kan, yu kum upla ra sirangki tara ikaia yua ba balbia, slingbaia bara munka plapaia lilika kaiki ba ilka langnika ra. Tawan kutbanka ba witin nani krikisa; upla nani kisbi ba il nani tila kat walisa.

⁶ Elam trisbaya pat ridi brisa, wagin araska nani, aras âiulra nani ba sin, bara Quir uplika nani ba ai kaina kahbi aiklabaia dukia ba brin.

⁷ Ilkam bîla pranakira ba wagin nani pali man banhwan sa bara aras ra uplika nani ba aiklabisa tawan karna ba ra.

⁸ Juda kan kahbi ba sip kan kahbras takan. Baha yua ra man nani kaikram, unta tara tani ra war aiklabaia dukia nani watla bâra ba.

⁹ Bara man nani kaikram Debit Tawanka kutbanka ra, bîla kwawanka nani bâra ba, bara baha wina man nani lî laikram; lî watla aibanhwan ba wina.

¹⁰ Bara man nani Jerusalem watla nani ba laki kaikram, bara utla nani ba batakram tawan kutbanka ba kau paski karna paskaia.

¹¹ Witin nani tawan kutbanka wâl ba lila bâk lî watla kum daukan lî watla almuk laya ba dukiara; sakuna baha paskan ba uplika ra lika witin nani kaikras kan, blasi pali wina witin baha paskan ba.

¹² Baha ba mita, karnika sut bri Dawanka ba mai paiwan naha yua ra; man nani inaia, sari briaia, tâmwa kusbaia bara sari kwalka dimaia sin.

¹³ Sakuna nanara, kaiks, lilia lâka baman sa, bîp nani ikaia, baku sin sîp nani, wîna piaia, wain diaia. Man nani aisaram: “Yawan nani plun pi kap bara sin di kap, kan yauhka yawan sut prubia bamna.”

¹⁴ Bâra sika karnika sut bri Dawanka ba, yang ra param taki bara kiaima kat ai aisan: “Naha saurka daukram na, man nani ra ban swih tikan kabia apia; bara man nani pas pruma.” Dawan karnika sut bri ba aisin bîla nani sa.

King watla pura kakaira ba mapara dahra aisanka

¹⁵ Karnika sut bri Dawanka ba naku ai win: “Man was baha king watla ra lalah âialkra Sebná, warkka nani sut pura kakaira ba ra, wis:

¹⁶ ‘¿Man nâra dîa warkka nani brisma, apia kaka ya mita raitkam maikan sa ki, nâra man dukiam raiti kum paskaia unta kum daukaia, plis kum purara ba ra bara man ris briaia pliska kum paskaia walpa tara tilara?

¹⁷ Nanara kaiks, Dawan naha wina laihura mai lulkbia, waitna karna kum dauki ba baku. Ai karnika ni mai alkbia.

¹⁸ Bâl lulkan karwi ba baku mai karbia, kuntri kau tara ra mai lulkbia. Man bahara pruma, war waginkam nani man pramna brisma ba sin bahara takaskbia; man Dawankam watla ba mawanra swira takma.

¹⁹ Iwaikam ba wina mai sakamni, warkkam ba wina sin mai sakamna.

²⁰ ‘Baha yua ra, yang warkki dadaukra Eliaquim, Hilquías luhpia ba, winamna;

²¹ man kwala nani dimisma kwalka ba, witin ra dimaia yabamna, maisam wilkaika ba, witin ra ai maisa ra wilkamni bara kulkanka sin yabamni, karnika brisma ba sin witin ai mihta ra mangkamni. Bara Jerusalem ra iwi nani ba aisika baku kabia Juda watla aiska ra sin.

²² Bara Debit watla kîka ba, witin ai pahpaya ra kahbamni; witin dur kwâkbia ba, upla kumi mita sin prakbia apia; witin dur prakbia ba, upla kumi mita sin kwâkbia apia.

²³ Witin ba king iwaika kum kulkanka bri ba baku kabia ai aisa watla bilara. Yang daukamni witin bahara bapi bûi kaia kitwaia apia, silak kum saban ba baku.

²⁴ Ai aisa watla prana, yamnika kulkanka lâka sut ba witin ra skahkbia, luhpia nani bara mulika nani sin, glas sirpi nani sut, ban kâp nani sut, diara mangkaika lupia nani ba sut.

²⁵ ‘Baha yua ra, silak diara karna ra saban ba, sakan kabia; baha wina kriwi bâra kauhan kabia; bara wirhika nani ai purara kahban ba sut lap tiwan kabia.’ ” Karnika sut bri Dawanka, witin aisisa.