Aiseya 21 - DAWAN BÎLA AISKA

Babilon karnika ba krikan kabia dahra aisin

¹ Upla iwras tasbaya ba dahra aisinka: Prari nani baku waupasa wina aula, upla iwras tasbaya wina aula sirang iki pliska ba.

² Diara aihka saura karna pali kan Dawan mairikan ba pât ra dadingkra ba, upla pât dingkisa, sauhki tatikra ba sauhki tikisa. ¡Elam, bus! ¡Media uplika nani, dimi alks! ¡Brukwi ba kau walan ai daukras!

³ Yang wîni aiska na sirang iwan sa, latwan ba mita ini tasba ra aikarwi kapri, mairin tuktan baiki latwanka baku, sari ba mita aikan sturi walras, sibrin ba mita aikan sip kaikras.

⁴ Lukanki ba tanis brisna, sibrinka tara ba mita, sibrin ai dingkan; tutni kaulhka ba yang uba pain kaiki katna, nanara sibrinkira lâka yang ra takan.

⁵ Witin nani tibil ba pat bri sal mangkisa, diara maman dukia nani ba ni palkisa; bara pi, di banhwisa. ¡Kiaptin nani, man nani bus, war aiklabaika dukia kainam kahbaika ba lipni dauks!

⁶ Dawan bui yang ra naku ai win: “Was, aihwawakra kum mangks bara witin diara kaiki ba mai wibia.

⁷ Witin kaikisa aras wâl mita wagin kum raskisa, wagin kumi bani ra upla nani biriku ra ulisa, apia kaka kiamil ra uli baku sa, kau aman pali kaiki bas.”

⁸ Bara aihwaki kaiki kata ba kisban: “Dawan, yang na aihwawakra watla ra, pura wina kaikisni yu aiska, tihmia sin yang aihwaki kaikisna.

⁹ Bara nanara kaikisna aras wâl wagin kumi raski aula.” Bara upla kum aisi, win: “¡Kauhan, Babilon ba kauhan! Ai aidulka gâdka nani sut tasba ra kauhi kriwi yuya baman takan.”

¹⁰ Yang upliki nani, plawar ai mina ra taibi baku sma, karnika sut bri ba, dîa aisin walisna ba yang maisam pakisna.

Edom dukiara dahra aisin ba

¹¹ Edom mapara dahra aisin ba: Seír wina bîla baikra kum yang ra ai winisa: “Aihwawakra, ¿tihmia ba dîa awar sa? Aihwawakra, ¿tihmia ba dîa awar sa?”

¹² Bara aihwawakra pana wisa: “Pat ingwaia baila sa, sakuna tihmia ba kli aula. Kli walan mai daukisa kaka kli bal makabi wals.”

Upla iwras tasbaya ra dahra aisin ba

¹³ Upla iwras ba tasbaya ra dahra aisi ba: Dedán wina uplika kwâra ailal upla iwras tasbaya ra srikra nani tilara tihmia lalawisa,

¹⁴ taki was diran dauki uplika nani aula ba wal prawaia. Witin nani ra lî yas Temá kuntrika uplika nani, taki was plapi auya nani ba witin nani ra plun piaia yas.

¹⁵ Kan witin nani sord malika wina plapisa, sord napa mala daukan ba wina, pantamangka lulkaia aubi ba kaina wina, war aiklabi aula ba mawan wina sin.

¹⁶ Dawan bui ai win: “Naha wina kau mani kum kat, wark tatakra kum ai warkka wina ai mana bri ba, aisi ba baku, Quedar prana tara nani bri ba sut slingban kabia.

¹⁷ Bara Quedar luhpia nani, trisba lalulkra aiklaklabra nani ba, pantamangkika nani ba kulki lupia baman kabia.” Dawan, Israel Gâdka ba, baku aisin.