Aiseya 2 - DAWAN BÎLA AISKA

Dawan bui nisan nani tilara kupia kumi lâka dingkbia

¹ Naha sika dahra aisaia bîla nani Aiseya, Emus luhpia ra param marikan kaikan ba, Juda Jerusalem wal dukiara:

² Mani nani kau lui wabia ba ningkara, Dawan ra pura sunaia watla ilka ba lika, tara pali kabia. Il wala nani sut wal kau purara kabia, bara upla sâtka nani sut bahara aidrubi banhwi kabia;

³ upla sâtka nani ailal ba aisabia: “Bal, man nani, kaisa Dawan ilka ra uli waia, Jekob Gâdka ra pura sunaia watla ba kat; witin sin ai yabalka nani natka dukiara wan smalkbia, bara yawan, witin ai yabalka nani ra wapbia.” Kan Saion wina sika, Dawan lâka smalkanka nani ba bal takbia, Jerusalem wina ai bîla balbia.

⁴ Dawan mita nisan bani tilara lâ daukbia, upla ailal aiklabanka ba wapni daukbia. Aiklabaia sordka ba tasba tukbaika daukbia, ai langsika nani ba, plawar mâ klakaia sord buhla daukbia. Nisan kum, nisan wala mapara kli war aiklabaia lukbia apia, war aiklabaia lâka nani sin kli smalkbia apia.

⁵ ¡Jekob watla uplika, man nani bal, bara Dawan yabalka ingnika ra yawan wapi kap!

Prautkira nani klala bribia

⁶ Dawan, man bui Jekob watla uplika nani ba lulki swiram; tasbaya ba sukia nani banhwan, lalma tasbaya wina balan, filisteo nani tilara bâra ba baku, kiamka wala nani aikuki pain kaia lâka ba daukisa.

⁷ Kuntrika gul bara silbar banhwan sa, yuyaka tara ba; kuntrika ba aras ni banhwan sa bara war waginka ba kulki sip sakras kama.

⁸ ¡Sakuna aidul nani sin banhwan sa! Upla ai mihta ni paskan gâdka nani ra mayunisa, ai mihta sirpika nani ni paskan ba.

⁹ Witin nani paskan bara bawan, maya kat iwan. ¡Baha mita witin na pâtka ban swih tikpara!

¹⁰ Upla nani ba, walpa nani tilara dimbia, tasba untika nani ra sin; sibrinkira Dawan mawan wina yukuwi kabia, mawan ingnika ba wina sin.

¹¹ Witin nani baman sa praut luki, ai walka ra kaiki ba; mâyara batakan kabia; prautka lâka bri nani ba mâyara bawan kabia. Baha yua ra Dawan baman purara bukan kabia,

¹² baha yua karnika sut bri Dawanka ba, diara daukbia witin nani baman sa luki, tara takan nani ba mapara, purara uli nani ba sut, mâyara batakaia;

¹³ witin nani ba Líbano yalamka nani baku sa ai dara wali ba sut mapara sin, laih purara nani ba, apia kaka Basán usupumka nani ba sin;

¹⁴ witin nani ba il tara purara nani ba baku, ai dara walisa, kiuhsi nani purara bukan baku;

¹⁵ aihwakaia watla purara mâkan ba baku ai dara wali ba, tawan kutbanka karna pali baku;

¹⁶ Tarsis durka tara nani baku sa, apia kaka duri tara painkira nani baku.

¹⁷ Witin nani baman sa luki purara uli wan nani ba mâya pali kat batakan kabia. Baha yua ra Dawan mita, witin baman purara ba tânka marikbia,

¹⁸ bara aidulka nani ba sut âpu daukbia.

¹⁹ Dawan bal tasba aiska na sirang ikbia, bara walpa tara baiwanka nani ra upla nani ba dimbia, tasba untika nani ra sin; sibrinkira Dawan mawan wina yukuwbia, ai mawan ingnika ba wina sin.

²⁰ Upla nani gul ni bara silbar ni bahara mayuni kaia paskan ba, aidulka nani ba, baha yua ra, matis nani ra bara sakangki nani ra lulki yaban kabia.

²¹ Witin nani walpa tara baiwanka nani ra dimbia, walpa tara klukia ra, sibrin tara ba mita, Dawan mawan wina yukuwbia, ai mawan ingnika ba wina sin, witin bal tasba na sirang ikbia ba ra.

²² Man nani upla ra kasak lukpara, upla ba praprura sa. Rayaka ba wan wingka puhbra kumi baman sa.