Aiseya 17 - DAWAN BÎLA AISKA

Damaskus mapara dahra aisin ba

¹ Damaskus mapara dahra aisin ba: Damaskus tawan tara ba, swika baku ban kabia apia; sauhki tikan yuyaka nani baman kabia.

² Tawanka tara ba lulki swin ban kabia, sîp nani prawaika takbia; witin nani bâra yapi kabia, ya witin nani ra sakaia, sirang ikaia sin âpu kabia.

³ Efraín ai yukuwaika watla ba wina sakan kabia, Damaskus kingka tasbaya ba wina sin; Siria wina upla kau takaskuya ba sin; king tasbaya âpu kabia. Karnika sut bri Dawanka ba aisisa.

Israel ra lawi daukan ba

⁴ Baha piua ra Sameria Jekob prana ba karnika âpu takbia, bara pâwanka tara ba âpu tiwbia.

⁵ Witin ba insla dâkan baku mâ krakrikra nani bal klaki wahban ba baku Refaim langnika ra plawar nasla mâ klakaia wahban ba baku takbia.

⁶ Diara maura baman bâra swin kabia; Oliv dusa yahbi swin ba baku; tnawa ra kau mâ wâl kra, apia kaka mâ yumhpa kra kau swin baku; tnawa kau mâyara ba ra, ban kra walhwal, apia matsip kra kau bâra kabia. Dawan Israel Gâdka baku wisa.

⁷ Baha yua ra upla ba ai Papaskra ra tawi kaikbia, ai nakra nani ba Israel Gâdka Holikira ra luki kira kaikbia.

⁸ Bara altar nani paskan ba ra kli tawi kaikbia apia, diara wala nani upla ai mihta ni paskan dus plamaya holikira nani ba ra sin kaikbia apia, baha altarka nani ra kîa yamni angki gâd nani ra yabi ba ra sin kaikbia apia.

⁹ Baha yua ra ai tawanka tara karnakira nani ba mâ lulki swin kabia, heveo nani, amorreo nani ba lulki swin ba baku, Israel luhpia nani ra sibri ba tâka mita; upla âpu bîla baman swin kabia.

¹⁰ Kan mai swaki mai sakan Gâdka ba man âmya tikram ba mita, man yukuwaikam walpaya ba dukiara kupiam kraukras kapram ba mita. Kiamka painkira mangkram giadin pranakira, bara Gâd tringsar kum ra pain kulkanka yabaia warkka daukram.

¹¹ Baha yua dîa sut mangkram ba, sut pâwbia, titan ra witin nani ai mâ sâkbia; sakuna sikniska kli rakaia apia ba balbia piua ra pata mâ nani ba sut tiwbia.

¹² ¡Man nani wals upla kwâra alwani bin tara dauki baku dauki ba, bin tara kabu bin dauki ba baku! Baha sika nisan nani brukwi rangbi, ba binka takisa, lî kârma aubi ba binka ba baku.

¹³ Sakuna Gâd mita witin nani ra lawi daukbia, bara witin nani laihura plapbia, munka plapbia, kapan taya nani pâsa ra pâli ba baku, pukpuka nani prari bri pâli ba baku sin.

¹⁴ Tutni piua ra, kaiks kupia turbaia lâka baman kabia, sakuna kau yu baiwras ba ra, waihla ba ban bâra âpu sa. Naha sika wan taibi bri nani ba, wan dukia nani dakbi bri ba sin, witin nani rau wan sauhki ba lap tiwbia.