Aiseya 16 - DAWAN BÎLA AISKA

Moab uplika nani Juda ra wih yukuwan ba

¹ Selá upla iwras tasbaya ba wina Saion luhpia mairin tasbaya ilka kat dawanka ra prisantka, sîp nani blikisa.

² Tnawira sirang iwi ai watla wina taki pâli ba baku, Moab luhpia mairin nani sin taki plapbia Arnón tingnika luaika ra.

³ Saion ra aisi wisa: “Daukaia lukanka bri nani ba dauks, kan kahbaia dukiara yang nani tâiwan aiklabaia ba man bris. Distikam ba lapta lila kat mangks, tihmia ra baku; ai tasbaya wina kangban nani ba yukuks, ai yabalka tiki tauki nani ba, waihla mihta ra mangkpara.

⁴ Moab uplika nani ai tasbaya wina kangban ba swis man nani wal iwi kabia, witin nani yukuwaika aimaki bas, sauhki tatikra aula ba mawanra.” Saura mamunra ba ai warkka sut daukbia, bara sasauhkra ba yu kum luan kabia ba ra, upla ra ai mina ra tataibra ba sin tasbaya na wina mahka waia.

⁵ King iwaika ra Debit kiamka wina kum iwbia. Wihta kasak kabia witin bui upla lâka dauki ba ra, lâ kasak daukbia tânka sin pliki, bara kasakka lâka ba daukbia aihni sin lâ nani ba dauki kabia.

⁶ Yawan kakaira sa Moab prautka lâka ba, ai prautka lâka ba tara pali sa, ai wîna tara kulkanka brisa, ai nakra prautka nani bara sin bahki sturi aisi ba.

⁷ Baha mita, Moab ai uplika nani pura mata inbia; man nani mamna lulkanka tara brima, kupiam kriwanka nani sin, Quir-haréset waitnika nani dukiara kupiam krauki luki kama.

⁸ Hesbón wainka nasla nani, bara Sebná wainka nani ba sut ba srawi luan; Nisan nani dawanka ba mita wain kiwka mâirira nani ba klaki ai mina ra taiban; ai tnawa nani ba pâwi ban Jazer kat wata, baha wina upla iwras tasbaya sut purara lalaman, ban kabu baila wala kat.

⁹ Baha mita inisna Sebná wainka nasla nani ra luki, Jazer ra sin luki, Hesbón, Elalé dukiara naikra laya laikisna, mâ tilwan nani dâkaia bri kata ba purara war aiklaban bamna.

¹⁰ Bin tara bara lilia lâka nani insla bilara sâp takan kabia; kli bin bara lilia lâka âpu kabia, insla ra lawana aiwanaia ba sin âpu kabia. Kau sin wain mâ ba taki kabia apia, wain laya sakaia wisi. Bin nani ba sin danh takan.

¹¹ Baha mita yang kupi ba arp baku tatatwi kabia, Moab ra luki ini kabia, yang kupi ba Quir-haréset ra sin luki kabia.

¹² Nahki kat Moab uplika il ra wabia sin, bara bahara swer taki makabi swapbia ba kat, nahki kat tempel ra wih ai pura sunbia ni sin, hilp kumi sin bribia apia.

¹³ Naha bîla sika Dawan mita aisin Moab mapara baha ba pat piu ailal sa.

¹⁴ Nanara Dawan aisisa: “Mani yumhpa bilka ra, wark tatakra kum ai mana brih kulki kaiki ba baku, Moab, kulkanka lâka tara bri ba âpu takbia, upla ailal pali brisa sakuna maura lupia takbia sirpi, karnika âpu.”