Aiseya 15 - DAWAN BÎLA AISKA

Moab mapara dahra aisin ba

¹ Moab, mapara dahra aisin ba: baha tihmia ra Ar ra sauhki kan ba ra, Moab tasbaya sin sauhki tikan sa. Tihmia ra Quir ba sauhki tikan bara Moab tasbaya sin sauhki tikan sa.

² Dibón uplika nani ba il ra uli wan tempel ra dimi inaia, Moab ra, Nebo bara Medebá pura mata inbia; ai tâwa ba irban kabia, ai unmaya sin sut irban kabia.

³ Upla ba tawan yabalka tara bâk auya sa, kwala siksa dimi; utla bahna ra uli, ai bîla karna wini inisa uba latwan ba mita, tawan bilara asla taki pliska ba ra upla sut inisa, ai nakra laya nani uba sakisa.

⁴ Hesbón, Elalé uplika nani hilp makabisa; Jahas kat bîla baikra ba walisa. Baha mita Moab war aiklaklabrika nani sirang iwi sasibrira takisa, bara sibrin lâka ni banhwan atia sa.

⁵ Yang kupi ba Moab pura mata hilp makabia; ai tawanka wina plapi ban, Sóar kat wabia, ban sin Eglat-selisiya kat. Luhit ilka tnaya witnika bâk ini uli wabia; sauhki tikan lâka ba dukiara, karna ini Horonaim yabalka bâk impaki wabia.

⁶ Nimrim layawanhta nani sut ba lâwan kabia, twi nani ba sin srawbia, inma wahia nani ba sut prubia, inma wahia kumi sin sangni kabia apia.

⁷ Baha mita, upla nani ba ai yuyaka nani ailal kukan sa, baha nani sut ba Yasu nani tingnika ra bri si yukukbia.

⁸ Bara inanka nani ba Moab tasbaya kir kutban kabia Eglaim kat, Beer-elim kat sin witin nani inanka tara winanka ba walan kabia.

⁹ Dibón ra lî nani sut ba tala man kabia, Dibón purara saurka kau tara nani ba yang bri balamna; Moab wina plapi swak takbia nani ba purara layan bal takbia, tasba ra pruras swak takan nani ba purara sin.