Aiseya 14 - DAWAN BÎLA AISKA

Priski brih wan nani ba kli tawi balbia

¹ Âu, Dawan Jekob ra umpira kaikbia, baha purkara Israel sin kli bâk saki bribia, bara yaka ai tasbaya ra ris bribia. Tringsar nani ba sin witin aikuki asla takbia, bara Jekob taika nani ra asla prakan kabia.

² Nisan nani ailal ba Israel luhpia nani ba bribia, ai tawanka ra sin bri balbia; Israel watla uplika nani ba mita, witin nani ba ai albika ai dukia dadaukra nani baku bribia Dawan tasbaya ra; witin nani, Israel luhpia nani ra priski brih wan ba, nanara pana baha nani ra priski brih balbia, Israel ra taiban ba nanara pana baha nani dawanka aimakbia.

Babilon kingka lawaska kikbia

³ Israel luhpia nani, Dawan mita man nani ra ris briaia maikbia, trabil saura takisma ba wina, sarkam tara brih banhwisma ba wina, bara sin alba lâka saura ra mai brih wankan ba wina sut pri mai sâkbia piua ra,

⁴ man nani naha sinska lâka nani aisi banhma, Babilon kingka lawaska kikaia dukiara: “¡Upla ra rausasauhkra kata ba kaiks ani kat bal takaskan ba! ¡Witin tara puli kata ba ani kat takaskan ba kaiks!

⁵ Dawan mita saurakira nani karnika ba bâk krikan, tataibra kingka dusa ba pîs ra man krikan,

⁶ witin ai kupia baiwanka wal upla nani ra klala yabi kan ba takaskras ban upla nani ba ra pruki kan, witin nani ai kupia baiwanka tara ni tawan nani ba taibi kan, ai kupia âpu nina bliki saura rausauhki kan.

⁷ Tasba aiska ba nanara ai laman lâka brisa bara kupia kumi sa; mayunra lawana nani karna aiwanisa.

⁸ Awas pauni nani bara yalam dusa nani Líbano ra bâra nani ba sin man dukiamra lilia taki banhbia: ‘Man lap tiwram yua ba wina wan klaki kan nani ba kumi sin bal wan klakras sa.’

⁹ Mâyara, pruan nani tilara, tatukbanka tara bâra sa bara mampara bal taki mai brisa. Pruan nani distika ba kli rawi buisa tasba wihtka tara nani sut sin, mampara taki mai brisa; nisan nani sut kingka nani ba sin ai iwaika wina buan kata.

¹⁰ Witin nani sut ai bîla baikra karna aisabia, bara mai wibia: ‘Man sin yawan wal baku swapni takram, man sin yang nani wal baku tawram sa.

¹¹ Naha kat prautkam lâka ba takaskan bara miusikkam, gitar tara binka ba sin. Man krikrikam ba uba umpira pali sa, man munhtampala ba, liwa nani sa.’

¹² ‘‘¡Nahki muni kasbrika purara wina kauhram, titan lakika tara! Tasba pali kat mai batakan, man sika kuntri nani ra pura lui katma ba.

¹³ Man kupiam ra wisatma: ‘Kasbrika purara uli wamna; waitla daukamna, Gâd slilma nani paskan ba tilara; iwaiki bahara paskamni, bara king baku iwamni, yahbra tani nani ra, baha ilka ra, gâd nani asla taki ba pliska ra.

¹⁴ Kasbrika nani ba wal kau purkara ulamni; bara Laih Purara bâra ba wal baku kamni.’

¹⁵ Ban sakuna, kasakka pali ba prura tasbaya kat iwram, albangka tihu pali kat ni waram,

¹⁶ baha nani mai kaiki ba mai kaiki ban sa, wînam kat kaiki si naku wisa: ‘¿Naha namna baha waitnika kata ba, tasba yan tatatwi kan ba, bara king tasbaya nani sut sin makupi kata ba,

¹⁷ tasba na, twi saura upla iwras tasbaya kum baku daukan, tawanka tara nani ba sut bîla man swin kan ba, silak ra mangkan nani ba sin durka sakras kan ba?’

¹⁸ Nisan nani sut kingka ba, witin nani ba, kulkanka tara wal ai ris bri ai raitika ra prawisa;

¹⁹ sakuna man lika raiti wina mai saki lulkan kabia, tâski sirpi kum, saura aisawan ba baku, pruan nani upla baha purara taibi baku, upla âikra nani tilara nana dakban ba, albangka nani ra lulkan sa, walpa nani ailal tilara.

²⁰ King wala nani bikan ba baku mai kulkan kabia apia; kan man tasbayam ba man mita sauhkram, uplikam nani ra sin ikram. Watawikira nani kiamka ba, piua wihka ban kabia apia.

²¹ Luhpia nani ba ikaia ridi taks, ai aisika nani watawanka nani ba tâwan; witin nani kli bubiara, tasba na sin bribiara, tasba mawanka na sin tawan tara nani wal banhbiara.”

²² Dawan karnika sut bri ba aisisa: “Witin nani mapara buamna, yang Babilon nani ba âpu daukamni bara witin nani wina dîa takaskbia ba, ai luhpia bara ai mula nani wal sin.

²³ Yang mita swamp baman daukamna, istapla nani pliska daukamni, kaina kutbanka ba wih, sauhki tatikra brumka ba wal pahbamni.” Baha sika Dawan karnika sut bri ba aisisa.

Asiria ba sauhki tikan kabia

²⁴ Karnika sut bri Dawan ba swer taki aisin: “Kasak pali yang dîa luki kaikri ba kat daukan kabia; yang daukaia luki kaikri ba baku daukbia.

²⁵ Asiria ba sauhki tikamna yang tasbayi ra, yang ilki nani ra ba mini ra taibamni; upla ra wirhika kahban dusa ba sakamna, wirhika nani upla pahpaya ra ba sin sakan kabia.

²⁶ Naha sika tasba aiska purara dîa daukaia win ba, mihti ba sakban sa klala yabaia nisan nani sut purara.”

²⁷ Kan karnika sut bri Dawanka baku luki kaikan ba, ¿ya mita baha ba alki takaskbia? Ai mihta sakbi klala yabaia ba ban sa, ¿ya mita yaka kli ai ninara lakbia?

Filisteo nani mapara dahra aisin ba

²⁸ King Ahaz pruan ba ningkara prapit Aiseya ba naha dahra nani aisan:

²⁹ Filisteo nani sut, man nani lilia kapara, klala maiki kan dusa ba krikan wisi; ani wina piuta kum takan ba, baha wina piuta kau puisinkira ba bal takbia, baha ningkara kau sin dragun pâpalra kum takbia.

³⁰ Umpira nani ba naisla ra ai daiwra nani ba twi dakakan kabia, diara luha nani ba ai âuyapah prawi kabia; sakuna yang mita yabrika man uplikam nani ba plun wahwi prubia, bara man uplikam nani kau takaskan ba sin ikamni.

³¹ ¡Filisteo tawanka tara nani, man nani puram mata ins, sari bri ini banhs, sibrin mita tatatwi bas! Kan yahbra tani wina upla dakni tara kum kasbrika kiasma baku aula; bahara aidrubankam tara ra upla kumi sin man lamamra takaskbia apia.

³² ¿Baha kuntrika ra blikan uplika nani aula blikan pana dîa wibia? Dawan mita Saion ba nikbras, bûi kaia daukan, baha nani sarka pakan ba bahara bri yukuwaika ba yabia.