Aiseya 11 - DAWAN BÎLA AISKA

Jesé kiamka ba, laman bara kasakka lâka kingka brih aula

¹ Jesé plamaika ba wina, tnawa kum bal takbia, wakia nani ba wina sin tnawa urhwi takbia.

² Dawan Spiritka ba witin ai purara ban takaski kabia, bara sins lâka, âuyama kaia yabia, diara tânka luki sakaia, lâ tânka smalki mariki kaia, karnika sin yaia, diara tânka kaikaia bara Dawan sibrinka sin.

³ Bara witin lika upla aisinka wali ba wina baman lâka daukbia apia, upla nani aisi ba ra wali upla purara lâ kahbia apia.

⁴ Kasakka lâka ni swapni nani ba lâka daukbia, kuntri ra umpira nani bâra ba kan sunbia. Bîla nani witin aisi ba dus kum baku praut karna aisi nani ba ra klala yabi kabia. Ai bîla aisinka nani ba dus kum baku baha ni saura prautkira nani ba klala yabia, witin ai bîla aisi ba ni watawikira ba ikbia.

⁵ Kasakka lâka prâka dimi kabia, wapni lâka sin.

⁶ Bara limi, sîp aikuki asla pâwi kabia kupia kumi lâka ra, limi bulni ba guts luhpia aikuki watla kumi ra kabia, bîp luhpia bara layan wal sin, bara daiwan tim nani ba sut sin asla wapi tauki kabia, bara tuktan waitna sirpi kum mita, sepadka aimaki kabia.

⁷ Bîp mairin wingku mairin wal ai pâna kabia, luhpia nani ba sin aikuki asla prawi kabia; layan ba, bîp wainhka baku twi pibia.

⁸ Tuktan sirpi ba, piuta kau puisinkira ba untika purara puli kabia, sip kabia ai mihta ba, piuta untika ba ra dingkaia.

⁹ Yang ilki holikira aiska ra saura munbia apia, sauhki sin tikbia apia; tasba ba Dawan tânka kaikaia lâka ni banhwan kabia, kabu pura aiska lî nani praki brin ba baku.

¹⁰ Baha yua ra naha wakia Jesé wina pâwi takbia ba sika, sain kum baku kabia tawan nani mapara; kuntri ra nani ba pliki wan kabia bara pliska ba pranakira kabia.

Tasba wala ra brih wan nani ba, lilia pali kli tawi balbia

¹¹ Baha piua ra, Dawan ba aima wala kli ai karnika marikbia, ai uplika nani kau swin ba kli bri balaia, Asiria, Idsip, Patrus, Etiopía, Elam, Sinar, Hamat bara kabu un ra iwi tawanka nani ba wina sut sin.

¹² Witin nisan nani mawanra sain kum sunbia, Israel luhpia nani laihura yakaban nani ba asla daukbia, bara tasba tâ walhwal ra, Juda uplika nani yakaban ba asla daukbia.

¹³ Tuman lâka ba, Efraín wina sauhki tikan kabia, Juda wailhka nani ba slingbi tikan kabia; Efraín mita Juda ra tumbia apia, Juda sin Efraín ra sarka paskbia apia.

¹⁴ Witin nani wâlsut ba muna tani bâk filisteo nani ra wabia, nina tani tawi ba ra; mapara aiklabia, asla lalma tani tawanka nani dukia kukan ba dakbia. Ai karnika ba Edom, Moab bara Amón uplika nani ra taibi bribia.

¹⁵ Dawan mita Kabu Pauni bâk yabal kum kwâkbia Éufrates awalka ra ai mihta sakbia bara yaka pâsa saura kum krawbia, bara yabal 7 kilwan kabia, bara sip kabia ai sûska daikras lui waia.

¹⁶ Dawan uplika kau Siria ra ba, kli tawi balbia ba ra, yabal tara ba wal prawbia, sim Israel Idsip wina takan yua ra.