Aiseya 1 - DAWAN BÎLA AISKA

Juda, kiamka watawikira

¹ Dahra aisaia bîla nani ba, Aiseya, Emus luhpia ba ra param marikan kaikan, Juda, Jerusalem wal dukiara; Ozías, Jotam, Ahaz, Ezequías Juda kingka aimaki kan ba yua nani ra.

² Kasbrika pura bara tasba, man nani aman wali bas, Dawan aisi ba: “Luhpa nani pakri, witin nani sut tara sakri, bara witin nani ba yang maipara buan.

³ Wark bîpka wainhka ba ai dawanka kaikisa, biriku sin ai dawanka daiwan watla ba; sakuna Israel yang upliki nani ai dara walaia tânka âpu sa.”

⁴ ¡Alai, upla saura dadaukra nani, watawi lâka man twilki banhwisa ba, saura dadaukra kiamka nani, watawi lâka luhpia nani! Dawan wina laihura takan nani, Israel Gâdka Holikira ba wina sin laihura takan, Gâd ba lulki swin.

⁵ ¿Dîa muni man nani klala kau makabisma? Wînam aiska ba mai wipan sa. Lamla ba insauhkan sa, karnikam sin aiska âpu pali takram sa.

⁶ Man nani minam bîla wina lamla bahna kat, diara yamni kumi sin âpu sa; baha sut ba, insauhkan baman, prukan baman, taya sukwan baman sa; sîka mangkras, kwala wilkras, batana laiki latwanka ba sin daskras.

⁷ Tasbayam ba sauhkan sa, upla iwras tasbaya baku swin, tawan tara nani ba angkan amisa. Man nani kaikisma waihlam nani bal man nani mangkram ba bri pîsa, upla iwras tasbaya baku sa Sodoma slingban kan ba baku.

⁸ Saion ba yakan swin bâra buisa, wain nasla tara bilara, mani watla lupia kumi yakan bâra ba baku, dista briaia watla lupia rayapisa nasla ra yakan bâra ba baku sa, tawan tara yakan bara waihla nani tnaya kir kutban sa.

⁹ Karnika sut pali bri Dawanka ba mita, upla dakni sirpi nâra ban wan swiras kan kata, nanara yawan na pat Sodoma, Gomora baku takan kaia kan.

Witin yamni kaiki ba dauki mayunaia

¹⁰ Sodoma wihtka nani, man nani lika Dawan bîla na wals; wan Gâdka lâka nani na aman wals, Gomora uplika nani, dîa mai smalkaia ba.

¹¹ Dawan aisisa: “¿Dîa dukiara man nani daiwan nani ban ailal angki aikisma ki? Sîp nani aiska angki aikisma, kau sin want ai daukras sa, bîp lupia nani batanka angkisma ba sin; bîp wainhka nani, bîp lupia nani, guts nani tâlia ba, brin ai daukras.

¹² Man nani ba yang maiwanra buaia aulma, sakuna, ¿ya man nani ra mamkaban waitla ra bal minam taibaia?

¹³ Sakripais bahki nani kau yang ra bri balpara; kiasmika ba kau brin ai daukras. Kati raya yua, bara ris yua liliaka daukaia dukiara, man nani upla paiwisma ba, sakuna, yang sip kau ban kupi alki takaskras sna, baha uplika nani ai saurka dauki ba.

¹⁴ Kati raya bara asla aidrubaia yua nani liliaka daukisma ba, saura kaikisni; ¡baha trabil ai munisa, yang kau sip kupi alki takaskras!

¹⁵ Man nani puram sunaia mihtam bukisma ba ra, mai kaiki kamna apia; man nani puram sunra ailal aisama sin, yang mai walamna apia. Man nani mihtam nani ba tala baman alkan sa.

¹⁶ ¡Mihtam ba siks, klin dauks! ¡Watawikam lâka nani ba naikra wina sâks! ¡Man nani saura daukaia ba swis!

¹⁷ ¡Lâ yamni daukaia ba man nani lan taks, trai kaiks dîa kasak ba daukaia, ai raitka bri ba raitka ba yas, rau nani lâka ba kasak dauks, piarka nani raitka ba tâwan aisas!”

¹⁸ Dawan aisisa: “Man nani bal, naha lâka na aisi kaikaia. Man nani saurkam ba tala pauni kabia sin, kwala pihni wahmuk baku daukamni; siksa mâka prâmka ra alkan ba baku kabia sin, bîp tialka laya baku pihni daukamna.

¹⁹ Man nani bui yang bîli wali daukaia wima kaka, plun pain nani tasba wina taki ba man nani pima;

²⁰ sakuna kiamapara lâka ban brisma kaka, war ra âpu prui tiwma.” Dawan mita baku aisisa.

Dawan Jerusalem klin daukbia

²¹ ¡Tawan tara kasakkira katma ba, nahki muni rug mairin wal baku takram! Blasi ra, uplikam sut ba, kasak lâka ra diara dauki kata ba bara wapni lâka ra iwi kan, sakuna nanara upla âikra nani baman bâra sa.

²² Silbar katma ba bara nanara dipasta takram, wain pain katma ba, nanara lî takram.

²³ Wihta nani brisma ba, mapara babura nani sa, bara âimplikra nani pânika banhwisa. Witin nani sut ba lalah mana ai wîna atkisa, witin nani prisant pliki taukisa. Rau nani lâka kasak ba sin yaras. piarka mairin nani lâka sin daukras.

²⁴ Baha mita, karnika sut ba Dawanka, Dawan karnakira Israel ra bâra ba, witin aisisa: “¡Baha kat aitani! Yang waihli nani lâka ba daukamni. Yang bui witin nani ra pana munamna.

²⁵ Mihti man nani mampara kli bukamna, dipastikam nani ba sut pali angkamna; tâskikam nani ba wina klin pali mai daukamna.

²⁶ Yang daukamna man nani blasi wihta nani bri katma ba kli brima, lâ mai smalki nani kata ba sin. Yang baha sut daukamna ba ningkara, ninam ba kli mâkamna ‘Tawan kasakkira’, ‘Kasakka lâka tawanka’.

²⁷ Kasakki lâka ni swaki sakaia daukisna ba Saion ra iwi nani ba pri sakamna, witin nani ba yang ra kli tawi balbia kaka;

²⁸ sakuna mapara babura nani saurakira nani lika kriki yuya lupia baku daukamna, ai briras ai swin nani ba lika prui tiwbia.

²⁹ Usupum dusa nani ra latwan kaikram ba mita, man nani swiram daukbia, dus mâ nasla nani bâk saki briram ba mita sin, bahki mai kulkan kabia, bahara aidul nani ra puram suni katma ba.

³⁰ Usupum dusa wahia nani, lâwi yakawi ba baku kama, dus mâ nasla ra lî âpu ba baku sin.

³¹ Karnakira ba, twi lâwan baku takbia, ai daukanka nani ba sin biulwaia dukia kabia, bara wâlsut ambia, baha daskaia sin upla âpu kabia.”