Abdías 1 - DAWAN BÎLA AISKA

Edom swira daukan kabia ba

¹ Dahra aisaia bîla kum Dawan mita Abdías ra param marikan ba, witin baha bîla ba brin. Smalkanka bîla kum Dawan wina wan win ba, yang nani walri; bîla twatwilkra kum ba nisan nani ra waia taki wan witin nani ra wiaia: “¡Man nani bus! ¡Kaisa yawan Edom mapara war aiklabaia waia!” Dawan Gâd Edom ra naku wisa:

² “Man ba nisan nani tilara yang sirpi pali mai daukaisna, bara yang mâya pali ra mai batakaisna.

³ Il walpaya tara baiwanka nani bilara laih purara iwisma bamna, kupiam prautka mita kunin mai munan sa, bara wisma: ¿Ya pali mita naha wina ai batakbia?

⁴ Yakal tara pâli baku purara pali uli slilma nani tilara wamtla mâkma kra, sakuna baha wina yang mai batakamni.” Dawan ba kasak aisisa:

⁵ “Âimplikra nani tihmia ra bal dukiam nani implikan kata sin, dukiam nani sut pali briaia apia kan; wain mâ dakbi uplika nani man ra balan kan kata, tila mâ nani kau tnawa nani ra swiaia kan. Ban sakuna waihlam nani balan ba lika, dukiam nani kumi sin swiras, sut pali aihwa brin.

⁶ ¡Isau, nahki pali dukiam nani ba baku aihwa implikan! ¡Dukiam kukanka nani kata ba, titikbi implikan ba!

⁷ Man wal uplikam nani takan ba sut, kunin mai munan; tasbayam pali wina sin mai kangban, uplikam pali aihwa nani ba mita sin man mampara buan, witin nani ra luki tniwi katma ba uplikam nani bui minam alkaika yabalkam ra mangkan. ¡Edom lika sins lâka âpu!”

⁸ Dawan ba kasak aisisa: “Yang Edom ra klala yabamna yua ra, Isau ilka nani ra upla sinskira nani bâra ba, sinska lâka ba sauhki âpu daukamna.

⁹ Temán ra war aiklaklabra nani bâra ba sibrin mita tatatwi kabia. Isau ilka nani tilara upla kumi sin raya kabia apia.

Edom pâtka nani ba

¹⁰ “Swiram dauki mai slingbi mai tikan lâka ba wal man puramra bâra ban kabia, man muihkam Jekob ra rausauhki ikram ba tâwan.

¹¹ Waihla nani bal tawan bilara dukia kukanka nani ba impliki kan ba ra, suldiar nani kuntri wala wina bal Jerusalem tawan getka ba kriki kan ba ra, ¡man muihkam tâwan aisaras tnaya ra tawram! Diara nani witin nani brin ba lat lulki kaiki ai mânka tilara yui brih wan, ¡bara man sin witin nani daukan ba baku daukram!

¹² Man muihkam sari lâka tara ra kauhan ba kaiki baha yua ra lilia takaia apia kapram. Juda sauhki tikan yua ba, baha kaiki lawaska kikaia apia kapram. Witin nani ai sarka tara bri kan yua ba man lawaska kikaia apia kapram.

¹³ Man ba yang tawanki ra dimaia apia kapram pât wahwi kan ba yua ra. Lilia briaia apia kapram trabil bri katna piua ra, man implikaia apia kapram yuyaka nani ba pât bri kata yua nani ra.

¹⁴ Yabal bîla wâl kilwi ba kat bûi kaikaia apia kapram, baha nani swakwaia plapi aula nani ra ikaia daukram ba; baha ai pâtka tara yua ra ai waihla nani wina plapi kan ba waihla nani mihta ra mangkaia apia kapram.

¹⁵ Upla wala nani ra dîa daukram ba, man sin baku mai daukbia. ¡Dîa daukram ba mana kulki maikan kabia! “Dawan ai warkka nisan nani sut mapara daukaia yua pat baila sa.

Israel ba kli purara bukan kabia

¹⁶ Kâp tahpla pali ba man nani yang ilki holikira ra diram ba, baha tahplika kan ba baku nisan wala nani sin dibia, kwatbi langki witin nani dibia, sut âpu pali takbia ba kat.

¹⁷ Sakuna Saion ilka holi ra swakwaia pliska kumi bâra kabia, bara tila upla bahara dimi swak takbia. Jekob kiamka nani ai tasbaya nani ba kli bribia.

¹⁸ Jekob bara Josep kiamka nani ba pauta aswan bâra lakwi ba yabia. Bara Isau kiamka nani ba twi lâwan baku takbia, bara baku baha pauta aswan buki klauhi ba mita twi lâwan nani ba angki âpu daukbia. ¡Isau kiamka wina, kumi sin swak takbia apia! Yang, Dawan, baku aisisna.”

¹⁹ Israel luhpia nani Négueb wina bal, Isau ilka tasbaya nani ba bribia; bara twi langnika tasbaya ra iwi nani ba bal filisteo nani tasbaya ba alki bribia. Israel luhpia nani Efraín tasbaya Sameria sin alki bribia; bara Benjamín lika Galaad tasbaya alki bribia.

²⁰ Israel luhpia nani priski brih wan kan ba wina kli balan nani ba bal Kenan wina Sarepta kat ai tasbaya piarkika ba ban alki bribia. Jerusalem wina priski brih wan kan nani Sefarad ra bâra ba, baha nani sin bal Négueb tawanka tara nani ba alki bribia.

²¹ Baha nani sut pura lui buaia karnika ba wal, bal Saion ilka ra uli wabia Isau ilka nani tasbaya lâka daukaia. Bara Dawan lika baha nani kingka aimaki kabia.