Abakuk 3 - DAWAN BÎLA AISKA

Abakuk pura sunra ba

¹ Naha sika prapit Abakuk ai pura sunanka ba.

² Dawan, diara tara nani daukram ba walri, bara tara mai kulkisna, sibrin sin ai daukisa. Bara warkkam nani dauki kapram ba naha yua nani ra sin kli dauks, yang nani sin warkkam ba kaikamna; sakuna man lawanka nani tilara ban umpira wan kaiki bas.

³ Gâd Edom tasbaya ba wina taki aula, Parán ilka nani wina Dawan holikira ba aula, witin ai prana ingnika ba mita kasbrika mawan ba banhwisa, tasba aiska ba sin witin mayunra ni aibanhwan.

⁴ Witin aula ingnika tara kir kutban tilara, bara ai mihta bîla wina, imyula baku ingnika nani ingwisa; baha ni marikisa dîa karnika nani witin bri ba.

⁵ Siknis saura nani ba witin ai kainara blikisa, bara baha nani prura ba brih aula.

⁶ Witin takaski bûi ba ra tasba ba nikwisa; witin nisan nani ra tawi kaiki ba ra tasba aiska ba sibrin tara wal tatatwisa; il almuk tara nani ba kauhisa, il nani unta tara ra blasi pali wina bâra kata ba, baha nani sut sin âpu takisa; sakuna Dawan yabalka ba lika ban kaia ra ban kabia.

⁷ Cusán uplika nani ba kaikri umpira bara pât pali tilara iwisa, Madián uplika nani sin sibrin lâka mita taibi brisa.

⁸ ¿Dawan, man awala nani mapara kupiam baiwan sa ki? ¿Kabu nani ba mapara lawankam tara briram ki? ¿Bamna man pura luaia dukiara, araskam karnakira nani ba waginka ra ulram ki?

⁹ Pantamangka ra, trisbaikam nani mangki aubi buki kahbi brisma. Awala laya aubi ba mita ni tasba lâwan ra tingni nani daukram.

¹⁰ Il nani ba mai kaiki bara tatatwisa; lî nani ba kasbrika wina laiwisa; bara kabu tihuka tara ba ulbisa ai ripka tara nani saki lulki ba ra.

¹¹ Trisbaikam bara langsikam wal ingnika ingwi ba, imyula baku lipi ba ingnika karnika mita kati bara wan yu ba sin, ai yukuwaika ba wina sip bal takras sa.

¹² Man lawankam tilara tasba aiska ra plapi taukisma, kupiam baiwanka ra nisan nani sut minam munhtara taibisma.

¹³ Man tawankam ra hilp munaia taki waram, bara king ba man mita wahbi sakram, watawikira nani watla bahna ba sauhki tikram, bara plamaya nani walpa karnakira ni paskan ba param sakram.

¹⁴ Man trisbaikam nani ni, witin nani ai wihtka tara ba ikram, witin nani ai araska âiulra nani ba, pâsa saura karna krawi ba baku, yukuwan lâka ra bal takan, upla nani ai kan kahbaika âpu nani ba mapara, bara yukuwan lâka ra sauhki tikaia.

¹⁵ Man araskam nani ba uli kabu aiska kir plapi tawisma, bara lî tara ba ukata man takisa.

¹⁶ Baha nani daukram sturka ba sut yang walri, bara sibrin ai daukisa; uni nani mahka tatatwan, kuhmi dusa nani swapni takan bara karniki sut tiwan. Sakuna ban yang sâp iwi bîla kaiki kamna, Gâd yawan wan waihla nani ra klala yabia ba kat, wan tataibra suldiar daknika ra.

¹⁷ Kwah damni dusa ba ai mâ sakras kabia kra, wain dusa nani ba, oliv dusa nani ba sin ai mâ sakras kabia kra, insla nani ba sin mâ sakras kabia kra, sîp daknika nani ba sin sut âpu takbia kra, sîp watla nani ra sîp âpu kra kabia sin,

¹⁸ ban sakuna, baha sut purkara lilia lâka ni aibanhwamna yang Dawanki bara yang Sasakriki ba dukiara.

¹⁹ Kan Dawan wina yang karniki aikisa; sula ai karnika brih plapi ba baku witin mita kuhmi dusa nani ra karniki aikbia, bara yang plapi il nani ra uli swak takamna.