Abakuk 1 - DAWAN BÎLA AISKA

Lâ kasak apia ba mapara Abakuk aisisa

¹ Naha smalkanka na sika param aisaia, Dawan ai prapitka Abakuk ra marikan ba.

² Dawan, ¿yang ahkia kat man ra makabi wali ban wini kamna ki hilpkam briaia dukiara, bara man lika yang ra ai walras sma ba? Dawan, ¿ahkia kat yang nani puri suni ban kamna, rausauhkan lâka ba mapara bara man swaki wan sakaia balras kama?

³ ¿Dîa kan man sari lâka bara watawika lâka nani ba sin marikisma ki? Lâ krikanka nani bara sauhki tikaia lâka nani ba kutbi kir ai brisa; tnaiya bani ra unsaban lâka bara aiklaban nani man kir sa.

⁴ Lâ ba kat daukras sa, wapni lâka ba ai mina ni taibisa, watawikira nani ba, kasakkira nani ba nina blikisa kasakka lâka ba warbi sauhkisa.

Dawan pana aisan ba

⁵ Bara Dawan pana witin ra win: “Aihwaki kaiki bas nisan nani tnamya kir mai kutbi bri ba; man nani kaiks bara sirang tara iwi kama. Yang mahka baha dukia sâtka nani daukaia pat baila sna, man nani baha sturka walma ba ra, sip kasak lukma apia, upla kum bal mai wibia kaka.

⁶ Bamna kaiks, yang Caldea uplika nani ba war aiklabaia karnika yabamna, witin nani lika upla saura sa, bara piua bani ridi sa kuntri kumi wina kuntri wala kat waia, bara iwras wapi ban kaia, upla wala nani tasbaya ai dukia apia ba dakbi briaia wisi.

⁷ Witin nani ba sibrin saura wan dingkisa, bara sin saurakira nani sa, lâ wala nani kulkras sa, witin nani ai lâka mangkan ba baman ra kulkisa.

⁸ Ai araska nani ba limi bulni wal kau karna plapisa, upla iwras pliska ra yul wail nani kraskira bâra ba baku kraskira nani sa. Ai araska âiulra nani ba, ailal pali plapi aula, bara kau laihura aula ba wina pat rau wan sauhkisa, yakal tara ai daiwra nani pliki sakan ba purara kauhi baku.

⁹ Ai mina ra diara sut ba sauhki lui auya; upla nani ra sibrin saura dingki ai tâura auya, upla nani priski silak ra brih auya ba, kabu un ra auhya nani ba wal kau ailal pali sa.

¹⁰ King nani bara upla tara kulkanka bri nani ra lawaska kikisa. Kan kahbaika pliska nani bri ba dukiara sin kikisa, tawan tnaya kutbanka pura bâk dimaia dusa nani mangki bara baha nani sut ba kutbi alkisa.

¹¹ Witin nani prari baku bal luisa; dawan wala nani ra sin kulkras, ai karnika ba baman ai dawanka kulkisa.”

Abakuk aima wala kli mapara aisisa

¹² Dawan, man ba tâ pali wina Dawanki ban sma. ¿Man ba yang nani Gâdki sunukira ban kaia ra raya sma apia? Yang nani kaini kakahbra Dawanka, man mita Caldea uplika nani ra karnika ba yaram kasakkam lâka tânka ba kat daukaia.

¹³ Man ban sunukira pali aihwa sma ba mita, saura ba aitani kulkaia sip apia sma, baku sin watawika lâka ba aitani yamni kulkaia dukiara; ¿bamna, nahki man upla âikra nani ra kaiki diara daukras sâp sma ki? ¿Bara upla kau saura nani ba mita upla wala kau yamni nani ra rausauhki ba ra, man diara sin daukras sma ba?

¹⁴ ¿Dîa kan man upla nani ba, inska nani kabu ra bâra ba baku munisma, daiwan nani ai tâ uplika âpu kan ban watauki baku?

¹⁵ Caldea uplika nani ba, nisan wala purara karnika alki brisa, inska mamiskra nani, inska nani purara karnika alki bri ba baku; inska ba kabu ra kiulh ni, apia kaka ilis nani wal alkisa ningkara inska ba ai lamara sal kaikuya ba ra, asla sut lilia ni aibanhwisa.

¹⁶ Baha mita inska âialkra nani ba inska alkaia dukia nani bri ba, baha dukia nani ra mayunisa, kîa yamni daukaia dukia nani angki, pain kulkan lâka dauki yabisa, baha dukia nani ra ai pura suni tingki wisa, kan baha dukia nani ba wina, witin nani ai pata ailal pali saki pîsa bamna.

¹⁷ ¿Caldea uplika nani ba baku ban yang nani ra, inska alkaika dukia nani ba ni ban wan alki kaia sa ki? ¿Upla nani ra umpira kaikras ban baku iki kaia sa ki?