2 Timoti 4 - DAWAN BÎLA AISKA

¹ Gâd mawanra bara Jisas Kraist mawanra sin, witinka king baku bal pruan nani bara raya nani lâka daukaia ba, yang bui man ra kasak lâ maikuna,

² sturi yamni ba smalki kama, bara ban uya smalki bas, piua yamni brisma, bara âpu kama sin. Upla nani kupia alki bas, lawi dauki bas, bara tâ baiki bas, bara wihka bîla kaikaia lâka aiska ni upla nani ra smalks.

³ Kan piu kum balbia ba ra upla nani ba smalkanka yamni ba kau lika walan daukbia apia, sakuna ai brinka karna nani nina blîkbia, bara smasmalkra ailal pliki bribia, witin nani dîa walaia want ba baman baha nani mita smalkbia dukiara.

⁴ Kasak tânka ba wina tnaya ra tawbia, bara sturi bahki sât sât nani bîla wali nani kabia.

⁵ Sakuna man lika sinskam ba ban yamni bri bas, pât nani wahwi bas, swaki sakan sturka yamni aisi smalkaia warkka ba dauki bas, napakan warkka brisma ba sin pain pali dauks.

⁶ Yang lika sakripais ai daukan kaia piua ba pat aimakan sa; pruaiki awarka ba pat baila sa.

⁷ Aiklabanka pain ba yang aiklabri, yabal ba aiska tnata kat plapri, kasak lukan lâka ba ban alki bri kapri.

⁸ Bara nanara lika kasakka lâka prisantka ba, yang duki wisi sunan sa; bara baha ba Dawan mita, witinka lâ wihta kasakkira ba, baha yua ra aikbia. Bara yang ra baman lika aikbia apia, sakuna ani uplika nani latwan lâka wal witin balaia ba bîla kaiki nani ra sin.

Timoti ra kupia kraukanka nani yaban ba

⁹ Man aihni pali muni yang ra bal ai kaiks,

¹⁰ kan Dimas ai lulki ai swih Tesalonaika ra wan, witin naha tasba dukia nani ba kau want kan bamna. Crescente lika Galesha tasbaya ra wan, bara Taitus ba Dalmacia ra.

¹¹ Luk baman yang wal sa. Mk ba pliki man wal bri bal, kan witin sip sa napakan warkka ra nâra hilp ai munaia.

¹² Tíquico lika Epesus tawanka ra blikri wan.

¹³ Man balma ba ra, Troas tawanka ra Carpo watla ra prâika tara swiri ba sal aik, wauhtaiki nani ba sin, bara kau pali lika daiwan taya ra ulbri wauhkataya ba.

¹⁴ Alejandro bras warkka dadaukra ba, uya diara saura nani ai munan; Dawan mita witin ra dîa daukan ba kat ai mana yabia.

¹⁵ Man lika witin ba aman kaiki bas, wan smalkanka ba mapara witin kasak buan sa bamna.

¹⁶ Wihta nani mawanra yang pas pali daihra aisari ba ra, upla kumi sin hilp ai munras; sut ai swih plapan. Yang bui Gâd ra makabisna, baha ba witin nani mapara kulkan kabia apia.

¹⁷ Sakuna Dawan hilp ai munan bara karnika sin aikan, bamna yang sip katna swaki sakan sturka yamni aiska ba aisi smalkaia, Ju apia nani ba sut walbia. Baku sika Dawan mita layan bîla ba wina swaki ai sakan,

¹⁸ bara witin sin saurka sut wina dakbi ai sâkbia bara kasbrika purara ba ai kingka lâka bara swaki ai saki ai brih wabia. ¡Witin ra prana ba yaban kabia, ban kaia ban kaia ra! Baku kabia.

Prakaia lakula nani

¹⁹ Priscila ra bara Áquila ra laikula blikisna, bara Onesíforo watla aiska ra sin.

²⁰ Erasto lika Korint tawanka ra takaskan, bara Trófimo ba siknis kan bamna, Mileto tawanka ra swiri.

²¹ Trai kaiki lî piua kaina bal. Eubulo, Pudente, Lino, Claudia bara wan muihni nani sut mita, lamkula blikisa.

²² Dawan Jisas Kraist man wal kabia, bara Gâd mita man nani sut ra yamnika maikbia. Baku kabia.