2 Timoti 2 - DAWAN BÎLA AISKA

Jisas Kraist suldiarka kum pain ba

¹ Bara man, luhpi, yawan na Kraist Jisas wal asla ba mita yamnika bri ba wina karnika bris.

² Witnis ailal mawanra yang aisari bîla nani walram ba, baha ba upla kasak nani mihta ra mangks, witinka nani mita upla wala nani ra smalkaia sip kabia ba.

³ Bamna man lika, pât nani wahwi bas, Jisas Kraist suldiarka pain kum baku.

⁴ Suldiar bisniska dauki nani ba, yu bani ai wihtka dîa daukaia wibia ba kat witin daukaia lukisa, bara baha mita witin ba suldiar apia nani bisniska tilara dimras.

⁵ Baku sin, upla kum pulanka tara ra puli ba, baha pulanka lâ mangki ba kat witin bîla walras kaka, prisant kumi sin sip bribia apia.

⁶ Insla ra wark taki ba, witin pas baha nasla wina ai dukia briaia sa.

⁷ Dîa mai wisna na man luki bas, bara Dawan mita maikka diara nani sut tânka brima.

⁸ Jisas Kraist pruan wina kli buan ba kupiam krauki bas, witinka king Debit kiamka wina kan ba. Naha sika yang mita aisi smalkisna swaki sakan sturka yamni ba.

⁹ Naha sturka yamni tâwan, yang pât nani wahwisna, bara ban sin lâ sasauhkra kum baku sîn ni ai priski ai brisa; sakuna Gâd bîla yamni ba lika sîn ni priskras sa.

¹⁰ Baha mita sika, yang diara sut mapara ban bapi buisni, Gâd mita bâk saki brin uplika nani painka dukiara, bara baku mika ban kaia ra swaki sakan lâka pranakira yawan Kraist Jisas wal asla mita bri ba, witin nani sin alki banhbia dukiara.

¹¹ Naha aisanka na lika kasak pali sa: Yawan lika witin wal pruan sa kaka, witin wal sin yawan raya iwbia;

¹² yawan pât wahwisa kaka, witin wal sin yawan king aimakbia. Yawan bui witin ra apia wibia kaka, pana witin mita sin apia wan wibia.

¹³ Yawan na kasak apia sa kaka, witin lika ban kasak sa, kan Gâd ai tânka ra sip apia wiras.

Wark uplika kum kasak ba

¹⁴ Uplikam nani ra naha na kupia krauks, bara Gâd mawanra sin karna smalki wis, bîla nani dukiara unsabiara. Naha blahwanka nani lika bahki baman sa, wali uplika nani ra sauhkaia baman.

¹⁵ Man ba nahki sip kama ba kat bas, wark uplika aitani kulkan kum baku Gâd mawanra bus, wark tatakra kum ai warkka ba tâwan ai swira lukras baku, Gâd kasakkira tânka bîla ba wapni kat smalki uplika baku.

¹⁶ Tasba lâka, bîla bahki nani bara tânkas nani ba wina tnaya ra taws, kan bahmuna dukia aisi uplika nani ba, Gâd wina kau kau laihura takisa.

¹⁷ Witin nani smalkanka ba lika sim wan taya ra siknis sukwi rawras ba baku kabia. Himeneo bara Fileto wal ra sika baku taki ba.

¹⁸ Naha nani wâlsut na, kasak tânka ba wina tnaya ra takan sa, bara witin nani aisisa, pruan wina kli buaia lâka ba pat lui wan, bara baku lalukra tila nani kasakka lukanka lâka ba, aihka baman laki taukisa.

¹⁹ Sakuna Gâd mita playa kum karna bapan ba lika ban buisa, bara naha bîla nani na bahara ulban sa: “Dawan mita ai uplika nani ba kakaira sa”, bara: “Ani uplika nani Dawan nina bri ba, witin nani ba saurka wina tnaya ra takaia sa.”

²⁰ Utla tara kum bilara diara nani sât sât bâra sa: tila nani ba gul bara silbar, wala nani lika dus ni bara slaubla ni paskan; tila nani ba piua tara nani dukiara baman, bara wala nani lika yu bahki nani dukiara.

²¹ Bâk sakan ra yus munaia dukia ba, Dawan mapa ra diara pain bara sunu kaia sa, yawan nani kumi bani ba klin kaia sa, saurka sut wina; baku lika diara pain baku ridi kabia wark yamni sut ra.

²² Baku bamna, wahma nani brinka karna ba wina tnaya ra taws, bara kasakka lâka nina blîks, kasak lukan lâka, latwan lâka bara kupia kumi lâka ba sin, baha nani ai kupia klin brih, Dawan ra hilp makabi wini nani ba sut aikuki.

²³ Blahwanka tânkas nani bara sinskas nani bîla walpara; man pain kaikisma baha dukia nani wina unsaban nani takisa.

²⁴ Dawan napakanka kum lika unsabaia apia sa. Witin lika upla sut aikuki pain kaia sa. Witin ba upla smalkaia mapa ra pain kaia sa; bîla kaikanka bri kaia sa,

²⁵ bara witin mapara nani ba ra, kupia swapni brih wapni daukbia. Baku ban kra Gâd mita baha nani ra yaka ai kupia lakbia, bara kasak tânka ba kakaira taki banhbia.

²⁶ Bara baha ningkara, witin nani ai sinska ra kli tawbia, bara dibil mita priski bri ba wina pri takbia, witinka ra dîa want ba daukaia luki bamna.