2 Samuil 6 - DAWAN BÎLA AISKA

Debit luki kaikan, Dawan lâka auhbaia watla ba brih waia

¹ Bara Debit kli aiklaklabra nani sut Israel ra bâra kan ba pliki 30,000 asla daukan,

² Juda tasbaya Baalá wina, witin nani ai daknika aiska buan, Gâd lâka auhbaia watla ba saki brih waia, Dawan karnika sut pali bri ba nina ra ai pura suni ba, kirubin nani purara ai kingka lâka bri ba.

^3-4 Il purara Abinadab watla ra lâ auhbaia watla ba bâra kan; ba wina saki, karita raya kum purara mangki, Abinadab luhpia Uzá, Ahió wal karita ba bri wapi kan, Ahió lika tâura wapi kan.

⁵ Witin nani auya kan ba ra, Israel luhpia nani sut Debit aikuki lika, Dawan mawanra ai karnika aiska aiwani dans puli wapi kan bara arp, miusik awira, arp tara, drum sirpi pruki, maraka singbi, pân pruki banhwi kan.

⁶ Plis kum kakaira nina Nacón Tasbaya Pîska ra bahara wan ba ra, bîp wainhka nani ba ai mina prukan, bara Uzá ai klahkla sakbi Gâd lâka auhbaia watla ba alkan kaina kahbaia luki.

⁷ Sakuna Dawan Uzá wal ai kupia baikan, ai mihta takaskras ban diara alkaia want ba tâwan, baha kat ikan, Dawan lâka auhbaia watla arkka tnaya ba kat kauhi pruan.

⁸ Debit ai kupia ra trabil uya brin, Dawan Uzá rayaka sakan ba dukiara. Baha mita, baha pliska nina ba Peres-uzá mâkan. Baha nina ba naiwa piua kat ban mâkan sa.

⁹ Sakuna baha pali yua Debit sibrin tara daukan Dawan lamara, bara ai bîla baikra bukan: “¡Nahki kau lukaia, Dawan lâka auhbaia watla ba wan kanra brih waia!”

¹⁰ Bara Dawan lâka auhbaia watla ba Debit Tawanka ra brih waia apia lukan bamna, adar yan Gat wina waitnika Obed-edom watla ra brih waia.

¹¹ Dawan lâka auhbaia watla ba Obed-edom watla ra kati yumhpa takaskan, bara Dawan ba witin ra bara ai taya nani ra sin yamni munan.

Debit lâ auhbaia watla ba Jerusalem ra brih wan

¹² King Debit ra win taim Dawan lâka auhbaia watla ba Obed-edom watla ra swin kan, bara Dawan bui witin ra, ai taya nani ra bara ai dukia nani ra sin yamni munan ba, Debit liliakira wan bara Obed-edom watla wina Dawan lâka auhbaia watla ba saki, Debit Tawanka ra brih wan.

¹³ Bara Dawan lâka auhbaia watla ba twilki ai mina taibanka matlalkahbi wapan ba ra, Debit bîp wainhka kum bara sîp batanira kum sin sakripais daukan.

¹⁴ Debit lika ‘‘efod’’ kum dimi wan, linin ni daukan ba, bara ai karnika aiska srutwi puli kan,

¹⁵ bamna witin bara Israel luhpia nani sut sin, Dawan lâ arkka ba brih auya kan wini, lilia tara kira trumpit nani puhbi kan.

¹⁶ Dawan lâ auhbaia watla ba Debit Tawanka ra brih wan ba ra, Mical, Saúl luhpia mairin ba, windarku biki kaikan; bara Debit lika Dawan mawanra srutwi dans puli kan ba kaikan ba ra, witin dukiara ai kupia ra saura lukan.

¹⁷ Dawan lâka auhbaia watla ba brih wan bara ai pliska ra mangkan tint watla bilara, Debit bui pliska pat ridi daukan ba kat. Baha ningkara, kli wal wan uplika takaia lâka ba Dawan lamara daukaia dukiara, daiwan wîna aiska angkan sakripais nani sin daukan,

¹⁸ bara wapni sakaia lâka ba sut daukan ningkara, witin bui upla sut ra yamni munan, Dawan karnika sut bri ba nina ra.

¹⁹ Baha wina Israel luhpia nani sut bâra kan ba, waitna nani bara mairin nani ra yan brit, dus mâ sâtka ni daukan ba, turtiya, dus mâ damni nani sin piaia yan. Ba ningkara upla sut ai watla ra wan.

²⁰ Debit sin ai watla ra kli tawi wan, ai taya nani ra yamni munaia. Sakuna Mical, Saúl luhpia mairin ba bal takan, witin wal prawaia, bara naku win: —¡Israel kingka na, naiwa witin ai nina tara pali sauhkan! ¡Ai dukia dadaukra albika mairin nani mawanra, upla bahki ai swirkas tara kum baku takan!

²¹ Debit pana win: —Âu, baha kasak sa; yang dans srutwi puli kapri ba, sakuna Dawan lamara yang pulri. Witin bui yang ra bâk ai sakan man papikam bara man tamya nani ba watlika ra, Israel ai tawanka ra wihtka aimakaia. Baha mita yang lika witin ai lamara dans pulisna.

²² Bara nanara sin kau bawikira mâyara iwamni, man lukisma ba baku, sakuna baha albika mairin nani dukiara man aisisma ba wina, yamni kulkanka lâka brimna.

²³ Bara Mical ai rayaka aiska ra ai luhpia kumi sin briras kan.