2 Samuil 3 - DAWAN BÎLA AISKA

¹ Saúl watla uplika nani bara Debit watla uplika nani wal aiklabanka ba piua yari pali wan. Sakuna Debit watla uplika nani piu bani ra karna kau karna taki kan ba ra, Saúl watla uplika nani ba lika kau swapni taki kan.

Debit luhpia nani

² Debit Hebrón ra kan ba ra luhpia nani baikan ba naha nani kata: Tawahkia ba Amnón, Ahinóam Jezreel wina ba luhpia waitna;

³ ningkara ba Quilab, Abigail Carmel wina, Nabal piarkika luhpia waitna; yumhpika ba Absalón, yaptika Maacá, king Talmai Guesur wina ba luhpia mairin;

⁴ walhwalka ba Adonías, Haguit luhpia waitna; matsipka ba Sefatías, Abital luhpia waitna;

⁵ matlalkahbika ba Itream, Eglá luhpia waitna, Debit maya wala. Naha sut Debit Hebrón ra bâra kan ba piua ra aisubi takan.

Abner Debit wal asla takan ba

⁶ Saúl watla bîla uplika bara Debit watla bîla uplika nani wal war ba ban aiklabi kan takaskras, bara Abner lika kau ai karnika alki kan Saúl watla purara.

⁷ Saúl ai lila mairin kum bri kan nina Rispá, Aiá luhpia mairin, Abner baha mairka wal yapan. Baku bamna, Is-bóset baha tâwan Abner ra aisin: —¿Dîa muni man papiki lila ba wal yapram?

⁸ Abner kasak lawan Is-bóset Rispá tâwan aisin bamna, bara pana aisin: —¿Dîa yang na, yul kum baku Juda warkka daukisna ki? Papikam Saúl watla ra yang kasak kapri, ai taya nani, ai uplika nani ra sin bara man ra sin Debit mihta ra mai mangkras kapri. ¿Bara nanara man bui yang dusi kuhbisma mairin kum wal saura daukri wisi?

⁹ ¡Dawan bui klala karna aikbia, witin Debit wal pramis daukan ba, yang daukras kamna kaka,

¹⁰ king iwaika ba wina Saúl kiamka ba saki, Israel bara Juda kingka iwaika ra Debit mangkaia, Dan wina Beerseba kat!

¹¹ Is-bóset bui Abner ra pana bîla kumi sin sip aisaras kan, Abner ra sîa kan bamna.

¹² Abner lika maisa papakra nani Debit ra blikan witin ra wiaia: “¿Kuntri na ya dukia? Kaisa wal lâ kum daukaia; yang daukaia sip sna ba kat daukamna, Israel luhpia nani ba sut man wal asla prakaia dukiara.”

¹³ Debit pana win: “Yang aitani lukisna man wal lâ kum daukaia, sakuna baha ba naku kabia: ai kaikaia balma ba ra, Mical bri bal, Saúl luhpia mairin ba, mai wisna na âpu kira lika yang ra balpara.”

¹⁴ Baha purkara, Debit Is-bóset ra sin maisa papakra nani blikan bara win: “Mical ba mihti ra mangks, mayi ba, witin wal marit takri filisteo nani waitnika wîna taya 100 kum mana.”

¹⁵ Bamna Is-bóset adar blikan, Paltiel Lais luhpia Mical wal ai maya kan ba dakbi sakaia;

¹⁶ sakuna Paltiel ai maya ninara wan, ini bara nina blikan Bahurim kat. Bahara Abner bui win kli mahka tawi wabia, bara Paltiel tawi mahka wan.

¹⁷ Kau naika Abner Israel almukka nani sut aikuki aisin, bara witin nani ra win: “Pat piua wihka man nani pliki taukisma, Debit ba man nani kingkam kaia.

¹⁸ Baha ba aitani sa, nanara piua ba aimakan, Dawan Debit ra pramis munan ba witin bâk Israel nisanka ba swaki sâkbia, filisteo nani ai lâka witin nani purara alki ba bara ai waihla nani karnika ba wina sin.”

¹⁹ Abner sin Benjamín uplika nani aikuki aisin, ningkara Hebrón ra wan, Israel luhpia nani sut Benjamín kiamka sin aitani lukan ba Debit ra wiaia.

²⁰ Ningkara waitna yawanaiska kum aikuki Hebrón ra wan, bahara Debit bâra kan bara Debit pata tara kum daukan, Abner dukiara bara ai uplika nani ai yula kahbi wan ba dukiara sin.

²¹ Ba ningkara Abner Debit ra win: —Nanara yang waia sna Israel luhpia nani sut asla paiwaia, bara king wal witin nani lâ kum daukaia, baku lika, man kingki, kupiam lâka kat king aimaki kama. Bara Debit Abner lakula daukan, bara witin ai âuyapah mahka wan.

Joab bui Abner ra ikan ba

²² Joab bara Debit nina blablikra wala nani ba aikuki, baha piua ra balan kan war ba wina, ai waihla nani wal aiklabi dukia kasak dakbi bri. Abner lika Debit wal Hebrón ra âpu kata, kan Debit bui witin ai lakula daukan ningkara, ai âuyapah pali pat taki wan kan.

²³ Joab aiklaklabrika daknika aiska wal bal diman ra witin ra win Abner, Ner luhpia ba, witin nani ai kainara king watla ra bâra kan, bara king bui lakula daukan ningkara mahka wan.

²⁴ Bamna Joab king kaikaia wan, bara win: —¿King tara ba dîa daukisa? Abner king tara kaikaia balan ba ra, king tara witin ba kli swin wan.

²⁵ ¿King tara ba baha tânka brisa ki, Abner, Ner luhpia ba kunin mai munaia baman balan kan ba, king tara diara nani dauki ba tânka pliki kaikaia baman?

²⁶ Joab ba Debit wal aisi si nan taki wan ba ra, maisa papakra blikan Abner plikaia, Debit lika baha tânka briras kan, bara baha nani wih witin ba kli bri balan Sirá layawanhta ba wina.

²⁷ Abner ba Hebrón ra wan ba ra, Joab bui tawan getka ba wina tnaya ra brih wan, witin wal baman sturi aisaia, bamna bahara ai plauya kat sord ni sabi ikan, ai muihni Asael ra ikan ba tâwan pana ikan.

²⁸ Baha ningkara, Debit baha tânka ba brin bara win: “Dawan mawanra, yang bara kingki lâka ba sut pâtkas pali sna Abner, Ner luhpia ikanka ba.

²⁹ ¡Pâtka ba Joab lal purara kauhbia, ai taya nani sut purara sin, naha pâtka nani wina swak takbia apia iskadura, lipar, apia kaka skahwa wapaia, ya bui kra ikan kabia, plun wahwan pâtka nani wauhbia!”

³⁰ Joab bara Abisai bui Abner ra ikan, Gabaón warka ra Abner bui witin nani ai muihni ikan ba tâwan.

³¹ Baha ningkara Debit bui Joab ra adar yan, ai daknika witin wal tauki ba nani ra sin sut, “Prâmka nani kalks, kwala kukusni dims bara Abner pruanka dukiara sari bris.” Bikaia bri auya kan ba ra, king Debit ba krikrika twilki ba ninara wapi kan,

³² bara Abner ba Hebrón ra bikan. Bahara Abner raitika ra king ba ai bîla tara inan, upla sut sin baku inan.

³³ Bamna king ba inanka lawana aiwanan Abner dukiara: “Abner, ¿dîa muni man pruaia kapram, tânkas pali natka ra,

³⁴ kan mihtam nani, minam nani sin priskras kan ba? ¡Upla watawikira nani mihta ra aimaki prui baku pali pruram!” Upla nani sin king nina bliki witin dukiara ini kan.

³⁵ Ningkara upla nani Debit ra makaban plun wiria pan piaia kau yu dimras ba ra, sakuna Debit swer taki win: —¡Gâd klala karna aikbia, kau yu dimras ba kainara yang plun wiria kra, diara wala sin kra pimna kaka!

³⁶ Upla sut witin aisin ba tânka brin, bara aitani lukan, diara sut king dauki kan ba nani yamni kaikan.

³⁷ Baha yua Israel luhpia nani sut tânka param brin, Abner, Ner luhpia ikanka ra king ba pâtkas pali kan ba.

³⁸ Ningkara king ba ai wihtka tara nani ra win: —Man nani kaiki tânka brisma ba baku, naiwa Israel ra wihta tara pali kum kauhan, upla tara kum kan.

³⁹ Baha mita, Gâd bâk ai saki king ai mangkan, ban sakuna swapni ai sakan daira walisna, Seruiá luhpia nani baku pali saurka tara daukan ba mita. ¡Naha watawika lâka na ya pali mita daukan ba, witin ai mana dîa briaia kan ba aitani sa Dawan bui witin ra yabia!