2 Samuil 22 - DAWAN BÎLA AISKA

Pura luan lawana Debit aiwanan ba

¹ Debit naha lawana Dawan ra aiwanan, Saúl mihta ra bara ai waihla nani sut mihta ra sin kauhaia kan ba wina, Dawan bui swaki sakan ba ra.

² Naku win: “Dawan, man sika yang kaini kakahbra, yang yukuwaiki watla, pri ai sasakra,

³ yang Gâdki, kaini kahbi ba walpaya, yang laima prakaika, swaki ai saki ba karnika, yukuwaiki rayaka kau purara ba, yukuwaika watla kau purara ba, yang sasakriki. ¡Saura munaia lâka ba wina swaki ai sakram!

⁴ Man, Dawan, aitani sip pali sma mayunra ba briaia: yang bui man ra winisna ba ra, waihli nani wina swaki ai sakisma.

⁵ “Prura ai ripka nani tilara ai blakan; sibrin ai daukan sauhki tatikra nani karnika ba wina.

⁶ Prura ai kiwka nani ra ai blakan; ¡daihra walras pruaia yabalka ra waia kapri!

⁷ Kupi wirha ai taiban Dawan ra winri, yang Gâdki ra hilp makabri, witin ai tempelka ra bâra ba wina yang ra ai walan; inanki nani ba witin walan.

⁸ “Tasba nikban tara kum takan kan; kasbrika purara ba playka tara nani ba nikban; Dawan kupia baiwanka ba mita nikban kata.

⁹ Ai kakma wina kiasma takan, sauhki tikaia pauta klauhanka ai bîla wina takan; ¡ai bîla wina pauta klauhan maskuka nani lulki kan!

¹⁰ Kasbrika purara durka kwalka awa ba dakbi bal iwan. ¡Ai mina nani mununhtara kasbrika siksa tara baman kan!

¹¹ Kirubin kum ra uli pâlan; pâsa tnawa purara uli kan kaikan.

¹² Slingbaia watla baku brin tihmia tara aikan kir kutbi kan ba, lî kasbrika siksa ba ni sin.

¹³ Imyula ingnika kum ai mawan wina takan; pauta klauhan maskuka nani auhan.

¹⁴ “Dawan ba, Laih Purara pali ba, alwani binka baku ai bîla baikra ba yan walan kasbrika pura wina:

¹⁵ ai trisbaika nani lulkan, imyula nani sin, bara yang waihli nani munan inipis plapan.

¹⁶ Wan Dawan bui upla ra lawi daukan, ai wingka puhbra karna puhban ba mita, kabu tihuka ba purara param bal takan, tasba tnata playka bapanka nani ba sut nakra ra param bal takan.

¹⁷ “Pura wina Gâd lika yang ra ai mihta sakban, ai mihta ni kabu tara wina ai sakan.

¹⁸ Waihli karnakira nani wina swaki ai sakan, misbara ai kaiki kan ba bara yang wal sin kau karna kan ba.

¹⁹ Pât pali ra kapri ba ra yang wal aiklaban, sakuna Dawan lika yang tâi baikan,

²⁰ pri lâka ra ai sakan; ¡swaki ai sakan latwan ai kaiki kan ba mita!

²¹ Dawan wina maina ba aikan, tâinka yamni ba mita aikaia kan,

²² yang Dawan yabalka ba nina blikri; ¡yu kumi sin Gâd ba watawi kulkras kapri!

²³ Ai lâka daukanka nani sut yu bani maiwan kat brisna; ¡ai lâka nani wina yu kum sin tnaya ra tawras kapri!

²⁴ Witin ai mawanra rayaki tânka wapni lâka kat brih wari; watawan lâka wina laihura takri.

²⁵ Dawan bui yang maina aibapan, rayaki tânka ai mawanra tâski âpu briri ba mita.

²⁶ “Dawan, man ba kasakkira sma kasakkira ba wal, wapni uplika ba wal wapni pali sma,

²⁷ kunin âpu sma kunin âpu ba wal, sinskira pali sma âuya mâira ba wal.

²⁸ Bawikira nani ba man swaki sakisma, prautkira nani ba swira paskisma.

²⁹ Dawan, man ba yang ingniki; man, yang Gâdki, tihmuki tara yang ra ban ingni daukisma.

³⁰ Man hilpkam ra waihli nani wal aiklabamni, ai tawanka kutbanka purak sin wapi luamni.

³¹ “Gâd yabalka ba wapni pali sa; Dawan pramiska nani ba kat wan kupia mangki briaia ba aitani pali sa; ¡Gâd ba witin ra luki uplika nani sut ba kan kahbisa!

³² ¿Ya ba Gâd sa, Dawan wina tnaya ra? ¿Dîa gâd wala bâra sa ki wan kan kahbaia?

³³ Gâd ba yang kaini kahbaiki watla karnakira, yang yabalki nani ba tâski âpu daukisa,

³⁴ witin bui mini nani isti aikaia sip sa, sula mina baku, pura pliska nani ra karna bûi kaia ba witin mita aikisa,

³⁵ witin ai smalkisa nahki war aiklabaia, witin karnika aikisa bras trisbaika nani ba bukaia.

³⁶ “Man bui yang kaini kahbi, swaki ai sakisma; kupiam pihni lâka nani ai paki tara ai sakisa.

³⁷ Yabalki nani ba wapaia isi daukram, mini nani swiram lalalras.

³⁸ “Waihli nani ba nina bliki slingbi tiki âpu daukri ba kat yang kli tawi balri.

³⁹ ¡Sut âpu tikri! ¡Sut yuya baman daukri! Witin nani kli buras; ¡sut mini mununhtara kauhan!

⁴⁰ War aiklabaia man karnika aikram; mapara babura nani yaram yang maiwanra bawaia,

⁴¹ bara waihli nani ba kainira yaram plapan. Baku sip kapri misbara ai kaiki nani ba sauhki tikaia.

⁴² Hilp makabi kan, sakuna upla kumi sin witin nani ra hilp munras kan. Dawan ra winan, witin nani ra pana aisaras kan.

⁴³ ¡Tasba yamhpuska âpu dauki ba baku, âpu daukri! ¡Mini ra taibri, yabal ra slaubla ra wan mina taibi baku!

⁴⁴ Tawanki aiklabanka nani wina pri ai sakram, main ai kaikram nisan nani wihtka ban kaia, upla nani kakaira apia kapri ba nanara duki daukisa.

⁴⁵ Witin nani nan ai waluya ba ra bîli kat daukisa; kuntri wala uplika nani ba yang ra ai kulkisa,

⁴⁶ upla tringsar nani ba sibrin taki ai yukuwaika wina tatatwi bal takisa.

⁴⁷ “¡Dawan raya ban kabia! ¡Yang kaini kakahbra ba yamni pali sa! ¡Gâd nina ba purara ban kabia, swaki ai saki kaini kahbi ba!

⁴⁸ Witin ba Gâd, witin bui pana muni tawan nani ba yan yang ra bawan.

⁴⁹ Witin bui yang waihli nani wina dakbi ai sakisa, maipara babura nani maipara buan ba wina. ¡Dawan, man swaki ai sakisma upla saura nani mihta wina!

⁵⁰ Baha mita nisan nani sut tilara mamyunisna, lawana nani sin ninam ra aiwanisni.

⁵¹ Man bui bâk sakram kingka ra, pura luan lâka tara ba yabisma; Debit ra bara ai kiamka ra sin latwan lâka ban marikisma.”