2 Samuil 20 - DAWAN BÎLA AISKA

Sebá Debit mapara buisa

¹ Benjamín kiamka wina watawikira kum, nina Sebá bara Bicrí luhpia waitna, Guilgal ra bâra kan. Witin tawan ra maisa pakan war bukaia, bara naku witin aisi kan: “¡Jesé luhpia Debit wal yawan diara briras, wan prapatika sin âpu! ¡Bamna Israel luhpia nani sut wamtla ra was!”

² Israel luhpia nani sut Debit ra lulki swin, Sebá Bicrí luhpia ba nina blikaia dukiara. Juda uplika nani sut lika, Jordan wina Jerusalem kat, king wal kasak wapni ban kan.

³ Debit Jerusalem ra kli ai watla ra balan ba ra, ai lila mairin nani matawalsip king watla ra main kaiki kaia bâra swin kan ba, utla kum ra bri si, aihwawakra nani mihta ra swin. Witin nani ra ban main kaiki kan, sakuna witin aikuki lika kli yapras kan. Bahara witin nani ba durka praki swin, piarka nani baku iwi kan pruan yua ba kat.

⁴ Bara king ba Amasá ra win: —Juda uplika nani ba paiws, bara yu yumhpa ningkara witin aikuki nâra bal.

⁵ Amasá wan upla nani ba paiwaia, sakuna ai piua yaban ba wina luan.

⁶ Bamna Debit bui Abisai ra win: —Absalón ba wal, Sebá kau sauhkanka tara bri balbia. Bara suldiarki nani ba man tâ bri, witin nina blîks, apia kaka walpa ni kutban tawanka nani ra dimi baha wina plapi swak takbiara.

⁷ King suldiarka nani Joab tâ baikan ba, quereteo nani bara Pélet uplika nani wina ba sut bara suldiar wala nani kau aiklaklabra pain nani ba sin, Jerusalem wina taki wan, Abisai wal, Sebá nina blikaia dukiara.

⁸ Guibeá ra walpa tara ba lama kat wan, ba ra, Amasá witin wal prawaia bal takan. Joab war aiklabaia kwalka dimi kan, ai maisa wilkan, ai sordka sin ai taya ra dingki ai maisa ra bri kan, sordka ba kauhaia baman, baku isi kan sordka taya wina isti sakaia dukiara.

⁹ Bara Joab ba Amasá wal aisi kan ba ra, ai mihta aihkika ni witin unmaya kat alkan kiawalaia wisi, bara makabi walan: —¿Muihki, nahki yamni sma?

¹⁰ Joab ai mihta wala ra sord bri kan ba, Amasá kaikras kan. Ai lakula wisata ba wal, pat ai biara kat klaki biara yakaban takan. Baha kat pruan, bara kau diara munras swin. Baha wina Joab bara ai muihni Abisai wal, Sebá nina blikan, witinka ba Bicrí luhpia.

¹¹ Joab suldiarka kum Amasá wîna tara lamara ra bal buan, bara win: —¡Man nani ya Joab bara Debit wal sma, Joab nina blîks!

¹² Sakuna Amasá ba yabal lilapas kat ban bâra kan, ai tâlia tilara aikarwi; bara baha suldiarka ba kaiki kan upla nani sut aula ba takaski bâra bûi kaiki kan, bara witin Amasá wîna tara ba yabal wina tnaya ra lakan bara pura biki swin.

¹³ Yabal tnaya ra laki swin ba ningkara, Joab uplika nani sut bal luan ba ra, witin wal Sebá nina blikan.

¹⁴ Sebá lika Israel kiamka nani sut bâk lui wan, ban Abel-bet-maacá kat balan, bara Bicrí kiamka nani sut sin asla taki witin nina bliki tawan ra diman.

¹⁵ Joab uplika nani Abel-bet-maacá ra wan ba ra, tawan lata tani ra tasba watla nani mâkan, baha wina tawan ba sauhkaia, bara ningkara bakahnu wark takan kutbanka ba batakaia dukiara.

¹⁶ Tawan kutbanka ba pura wina, mairin âuya mâira kum bal taki wini kan: —¡Man nani, yang ra ai wals! ¡Man nani, yang ra ai wals, pliskam pali! Joab ra wis witin laimara balbia, yang lika witin wal aisaia want sna.

¹⁷ Joab ai lamara balan bara mairin ba witin ra makabi walan: —¿Man ba Joab? Witin pana win: —Âu, yang sika. Mairin ba win: —Albikam mairin aisi na wals. Witin win: —Yang mai walisna.

¹⁸ Bara mairin ba mahka aisin: —Blasi piua ra aisi kan: ‘Ya diara kum tânka walan dauki kan ba, Abel ra makabi wali kan.’ Bara baku wapnika taki kan.

¹⁹ Israel tawanka nani tilara, yawan wan tawanka na kumika ai tânka kasak brisa, lamni lâka bara kupia kumi lâka, ¡baha sika kau tara ba! Ban sakuna man ba ban sauhki tikaisma. ¿Dawan dukia ba dîa muni sauhki tikaisma?

²⁰ Joab pana witin ra win: —¡Yang baku daukaia lukras! Tawankam na sin, sauhki slingbi tiki swiaia lika apia.

²¹ Baha dukiara daukras, sakuna waitna kum, Efraín ilka nani ba wina, nina Sebá, witin war aiklabaia dukia nani king Debit mapara bukan. Man nani bui witin ba baman mihti ra mangks, bara yang tawankam na wina mahka wamna. Mairin ba bila Joab ra win: —Waitnika lal ba, kutbanka na pura wina yang nani bui man ra batakamna.

²² Baha ningkara mairin ba wan, bara ai âuya mâira lâka ba wal tawan uplika sut kupia alkan ba ra, witin nani Sebá lal dakbi, Joab ra lulkan. Bara Joab win trumpit ba puhban bara tawan ba wina taki wan, kumi bani ai watla ra; Joab lika Jerusalem ra kli tawi wan king wal aisaia.

Debit wihtka tara nani ba

²³ Joab ba Israel luhpia nani sut war aiklaklabra nani ba wihtka ban kan, bara Benaías, Joiadá luhpia waitna ba, quereteo nani bara Pélet uplika nani suldiarka nani ba wihtka mangkan.

²⁴ Adoram ba lal mana nani aibapi ba warkka nani ba wihtka kan, bara king wauhkataya âiulbra ba, Josafat Ahilud luhpia ba.

²⁵ Sevá sturi âiulbra kan, Sadoc bara Abiatar wal ba lika prîs nani kan.

²⁶ Irá, Jaír tawanka wina ba sin, Debit prîska kan.