2 Samuil 19 - DAWAN BÎLA AISKA

^1-2 Upla nani ba ai dara walan king sari bri ini kan ba, ai luhpia Absalón pruan ba pura mata, bamna witin nani wan bara Joab ra win. Baku bamna baha pura luan yua ba, sari lâka ra tawan.

³ Aiklaklabra nani sut ba sin, ai swira luki natka ra tawan ra diman, suldiar nani ba ai mawan swira, war wina plapi balan baku kan.

⁴ Sakuna king lika takaskras, ai mawan ban praki ai bîla baikra tara ini kan: “¡Yang luhpi Absalón! ¡Yang luhpi Absalón, yang luhpi!”

⁵ Joab king watla ra wan, bara witin ra win: —King tara ba ai warkka dadaukra nani ra swira daukisa, naiwa yua witin nani mita king tara luhpia waitna nani ba, luhpia mairin nani ba, maya nani bara lila mairin nani ba sut swaki sakan sakuna.

⁶ King tara ba naiwa param marikisa, witin wihta tara nani ba dukiara, ai uplika tara nani ba dukiara sin diara lukras sa, witin ra misbara kaiki nani ba ra latwan kaikisa bara witin ra latwan kaiki nani ba ra misbara kaikisa. Naiwa yang daira walisna king tara mapara, kanra yamni kaia kan Absalón ba raya kaia kan bara yang nani sut ba pruri kaia.

⁷ King tara ba nanara bal takbia, bara witin ai bîla ni, ai nina blablikra nani ra maisa nihkbia, baku daukras kabia kaka, Dawan nina ra swer takisna king tara ra, naha tihmika naha daknika kumi sin man wal nâra takaskbia apia. Naha na king tara, man mapara diara kau saura kabia, wahma kapram yua wina naiwa kat diara saura nani sut mampara takan ba wal.

⁸ Bamna king ba buan, bara tawan getka ra wih iwan. Upla nani baha walan king ba get ra wih iwan sa, witin nani sut wan ai mawanra buaia. Israel luhpia nani ba lika witin nani sut ai watla nani ra plapan.

Debit kli Jerusalem ra aula

⁹ Bara Israel kiamka nani sut ai tilara aisi blahwi kan: “King Debit ba wan waihla nani kingka lâka wina pri wan saki kan, filisteo nani mihta wina sin; ban sakuna, Absalón daukanka sîa lika kuntri ba swi plapaia kan.

¹⁰ Absalón ba yawan yamni muni wan kingka mangkata ba, nanara witin war ra pruan. ¿Yawan dîa bîla kaikisa? ¿Bamna yawan dîa kan diara kum daukras, king Debit ba kli yawan ra yaka balaia dukiara?”

¹¹ Israel luhpia nani sut baha aisi kaikanka ba, king Debit watla kat brih wan. Bara witin bîla kum ulbi blikan, prîs nani Sadoc bara Abiatar wal ra, bara witin nani ra win: “Juda almukka nani wal man nani aisas, bara witin nani ra makabi wals, dîa muni witin nani ban takaskisa, mahka aisi daukras bara yang kli king watla ra waia;

¹² witin nani ra wis man nani mampara diara âpu sa man nani pas diara daukaia sma yang kli tawi balaia dukiara, kan man nani ba yang kiamki sma.”

¹³ Baha purkara, Amasá ra sin wibia win: “Man ba sin yang wal taiya bara tâilia sma, bamna naiwa yua wina wan kanra man ba aiklaklabriki nani sut wihtka kama, Joab watlika ra. Bîli kat yang bui man wal daukras kamna kaka, Dawan bui klala karna aikbia.”

¹⁴ Baku Debit bui Juda uplika nani ba yan ai dara walan bara witin sut upla baku taki, ai bîla bliki king ra win wihta tara nani sut aikuki kli tawi balbia.

¹⁵ Bamna king ba mahka impakan kli tawi balaia, bara Jordan awala kat wan. Juda uplika nani ai mapara Guilgal kat wan, bahara aikuki prawaia, bara hilp munaia Jordan awala ba luaia.

¹⁶ Bara Simí, Guerá luhpia waitna kata ba sin, Benjamín kiamka wina, ai tawanka Bahurim, witin sin aihni muni Juda uplika nani aikuki bal iwan king Debit wal prawaia.

¹⁷ Benjamín wina 1,000 waitna nani aikuki balan. Sibá sin, Saúl taika nani napakanka ba, ai luhpia waitna nani 15, ai albika nani yawanaiska kum aikuki, witin pas king kainara Jordan ra wan,

¹⁸ bara awala ba puswi luan, king taika nani ba hilp muni baila wala ra lukaia, bara baku witin wal pain takaia. King ba sin mahka awala ba luaia buan ba ra, Simí witin ai mawan kat aimakupan,

¹⁹ bara witin ra win: —King tara, man ra mamkabisni, yang watawanki bara swakwanki nani mampara daukri ba ban ai kulkpara, naha man dukiam dadaukra na, Jerusalem wina taki waram yua mampara daukan ba, kupiam ra ban saura ai luki kapara,

²⁰ kan yang silp pâtkira sna ba yang kaikisna, baha mita Josep watla uplika tila wina, naiwa yang pas taki balri king wal prawaia.

²¹ Bara Abisai, Seruiá luhpia ba, naku win: —¿Simí pruaia ba aitani apia sa ki, Dawan bui bâk sakan ba kingka ra saura win ba?

²² Sakuna Debit pana win: —¡Seruiá luhpia nani, naha na man nani daukaia lâka apia sa! ¿Dîa kan maipara buisma? Aman daira walisna yang na Israel kingka sna, bamna naiwa yua ra Israel kumi sin prubia apia.

²³ Ningkara Simí ra tawi aisin, witin ra swer takan witin prubia apia.

²⁴ Mefi-bóset, Saúl luhpia ba sin bal takan, king wal prawaia. Baha yua king taki wan ba wina, witin kli yamni pain tawi balan ba kat, witin ai mina sikbras, ai unmaya sin irbras, ai prâka sin tuskras kan.

²⁵ Witin king wal prawaia Jerusalem ra balan ba ra, king bui witin ra win: —Mefi-bóset, ¿man dîa kan yang wal waras kapram?

²⁶ Witin pana win: —King tara, albiki mita kunin ai munan. Yang na skahwa sna na ra, witin ra wîri biriku kum satil mangkbia bara yang baha ra uli king tara ra wamna.

²⁷ Witin ba yang dukira king ra nini sauhkan. Ban sakuna, king ba Gâd insalka kum baku sa, bamna man dauks nahki kau yamni kaikisma ba kat.

²⁸ King tara, man mamwanra yang papiki luhpia nani sut ba pruaia aitani pali kan. Naha man albikam na paiwram kan king tibilkam ra iwi plun piaia. ¿Kau dîa wala king tara ra makabaia sip sna ki?

²⁹ King bui witin ra pana win: —Kau sturi aisaia âpu sa. Yang pat adar yâri Sibá man wal tasbayam ba tar baiki briaia.

³⁰ Sakuna Mefi-bóset pana witin ra win: —Witin baha sut bribia. Yang maipara diara tara ba sika king ba kli yamni pain ai watla ra tawi balan ba.

³¹ Barzilai, Galaad wina ba dukiara, witin Roguelim wina bal iwan, king yula kahbi waia, Jordan awala luaia bara lakula daukka waia.

³² Witin pat almuk pali, mani 80 bri kan, yuyakira pali kan, king Mahanaim ra bâra kan ba piua sut ra, witin dîa want kan ba sut yabi kan.

³³ King ba Barzilai ra win: —Yang wal Jerusalem ra wap, bara yang bui man wirhikam ba twilkamna, main mai kaikamna.

³⁴ Sakuna Barzilai pana witin ra win: —King, yang piui prahni pali sa, nanara Jerusalem ra yang waia,

³⁵ yang pat mani 80 brisna; plun pisna bara disna ba aunhka sin briras, yang sip mai wiras, sâl mangkan sapa, mangkras sapa; aiwawanra nani aiwani ba waitna sapa, mairin sapa bîla baikra yang sip walras. ¿Dîa muni yang kli kau wirhiki kum king purara kahbamna?

³⁶ Kainara yang bui man ra mamkabamna, aikrika man wal wamna Jordan luaia baman dukiara, ¿bara king ba dîa mana yang ra naha prisantka aikaia ai wisa?

³⁷ Kanra yang bui king ra makabaina ai swika kli tawanki ra wamna, bahara pruamna bara damiki nani raitika ra ai bikan kaia. Sakuna king ba nâra ai dukia dadaukra wala kum brisa: yang luhpi Quimham. Witin king wal wabia, bara king dîa daukaia luki ba tânka kat witin wal daukbia.

³⁸ King pana win: —Quimham yang wal wabia, bara man bui witin dukiara dîa kau yamni kabia lukisma ba, baha yang daukamni. Diara sut man bui yang ra makama ba, yang maikamni.

³⁹ Upla nani sut Jordan luan. King mita Barzilai ra kiawali si lakula daukan, bara Barzilai ai tawanka iwi kan ba ra kli wan.

⁴⁰ King lika Guilgal mata impakan Quimham aikuki, Juda uplika nani sut, Israel wina sin upla manis aikuki.

⁴¹ Israel luhpia nani sut king kaikaia wan bara witin ra win: —¿Dîa muni wan muihni nani Juda wina ba, witin nani king dawanka baku taki ba, bara witin nani bui king ba, taika nani ba, aiklaklabra nani ba sut sin mainka kakaira baku taki ba Jordan luan ba ra?

⁴² Juda wina nani sut ba, Israel luhpia nani ra pana win: —King ba yang nani taiya asliki pali sa. Sakuna man nani dîa dukiara lawaia ba tânka âpu sa. ¿Dîa yang nani na king wina plun piri samna, apia kaka witin wina yang nani diara kum briri samna?

⁴³ Israel wina uplika nani ba pana win: —Yang nani king purara kau aima matawalsip prais raitki brisna man nani purkamra. Baha purkara sin kiamka nani baku, yang nani ba man nani muihkam almuk nani. Baku bamna, ¿dîa muni bahki wan kulkisa? ¿Yang nani pas luki kaikras katna ki wan kingka ba kli tawi balaia ba dukiara? Ban sakuna, Juda uplika nani ba kau karna aisi kan Israel luhpia nani ba wal.