2 Samuil 17 - DAWAN BÎLA AISKA

Ahitófel daukaia lukan ba Husai bui slingban

¹ Baha ningkara Ahitófel bui Absalón ra win: —Ai swis waitna 12,000 bâk saki brimna, bara naha tihmia pali Debit nina bliki rausauhkaia taki wamna.

² Witin swapni taki swapan sa, bara yang upliki nani brih wamni sirang ikaia, bara ai uplika nani ba sut plapbia bara yang lika king baman ikamna,

³ baha ningkara upla sut ba yarka kli man wal kupia kumi lâka daukbia, sim upla wâl bisi ai maya takan, unsabi bara kli wal kupia kumi lâka dauki ba baku. Man plikisma ba sika upla kumi baman ikaia, upla wala nani sut ba lika kupia kumi lâka ra ban kaia.

⁴ Baku daukaia ba Absalón pain kaikan, Israel lâ kakaira wala nani sut sin.

⁵ Sakuna Absalón adar yan Husai arquita ba sin paiwaia, witin wina sin ai lukanka ba yaia.

⁶ Husai Absalón mawanra wan, bara witin bui witin ra win: —Ahitófel ba naku daukaia lukan. ¿Bara yang nani baku daukamna ki? Apia kaka, man dîa lukankam brisma ba sin wan wis.

⁷ Husai witin ra win: —Naha kat lika, Ahitófel lukanka ba uya pain apia sa.

⁸ Man kasak kaikisma papikam ba bara ai uplika nani ba tahplu atia sa, baha nani sibrin âpu. Nanara kasak lawi pali kaia sa, wingku wail ai lupia paki kan mihta dakban ba baku. Baha purkara, aisikam sika war aiklaklabra, witin ai natka baku, tihmia ra lika ai uplika wala nani tilara takaski kabia apia.

⁹ Nanara pali pat walpa unta kum ra yukuwisa, apia kaka yukuwaika wala kum ra sa. Tnaya wala ra kaikma ba ra, man nani wal nan prawma ba ra, uplikam nani ra pat ikan sturka walbia kaka, tawan ba lukbia uplikam nani ra pat pura luan,

¹⁰ bara uplikam nani kau tahplu ba, layan wal sin kau praut ba sut kupia klip dasbia; kan Israel aiska kaikisa papikam ai uplika nani ba aikuki, tahplu kupia karnikira sa.

¹¹ Nanara aitani, yang kupi lukra na mai wimna, Israel luhpia nani sut Dan wina Beerseba kat paiws; witin nani ailal pali sa, kabu auhika mâ ailal ba baku sa, bara man bui tâ bris war ra aiklabaia waia.

¹² Bara baku lika papikam ani anira kabia sin, yawan ban saki ikbia. Diwas laya tasba ra kauhi ba baku yawan bui witin ai purara kauhbia, upla kumi sin raya swiaia apia, witin sin apia, ai uplika nani sin sut witin wal baku prubia.

¹³ Witin tawan tara kum ra yukuwi kabia kaka, Israel luhpia nani sut kiwa brih waia bara walpa kumi bani ba wilki raski sâkbia baha tawanka wina, tingni bilara baman lulkbia, walpa kumi sin tawan ra swibia apia.

¹⁴ Israel luhpia nani sut bara Absalón sin, Husai lukanka ba kau aitani kulkan, Ahitófel lukanka ba baku apia. (Baha sika Dawan bui baha lukanka ba yan Ahitófel daukaia lukan ba bahki ra lakaia, bara Absalón purara pâtka ba kauhaia.)

¹⁵ Baha ningkara, Husai bui baha sturka ba sut prîs nani Sadoc bara Abiatar wal ra win, nahki Ahitófel bui ai lukanka Absalón ra bara Israel almukka nani ra sin win, bara dîa witin win ba sin laki win,

¹⁶ sturka ba pat pali Debit ra wiaia dukiara, pain kupia kraukaia baha tihmika ba upla iwras tasbaya ra yapaia apia, sakuna pat pali Jordan baila wala ra lui waia, ai uplika nani ra bara witin ra sin ikan kaia apia ba mata.

¹⁷ Janatan bara Ahimaas wal En-roguel ra wih yukuwi kan, tawan ra sip dimras kan bamna, bara wark tatakra mairin kum wih sturka ba witin nani ra win, baha walan ba wal witin nani mahka taki wan, Debit ra wih sturka ba wiaia.

¹⁸ Ban sakuna, tuktan waitna kum pat, witin nani ba kaikan bara Absalón ra wiaia wan. Bamna wahma nani ba pat pali Bahurim ra plapan, ai lamara iwi uplika kum ai latka ra liwanhta kum bri kan bahara diman.

¹⁹ Bara baha waitnika maya mairin ba, liwanhta ba purak diara palkan bara baha purara plawar taya sakan nani ba yakaban. Naha tânka na upla wala lika briras kata.

²⁰ Absalón nina blablikra nani bahara wan ba ra, witin nani mairin ba ra makabi walan: —¿Ahimaas bara Janatan wal anira sa? Mairin ba pana win: —Witin nani nahak bal lui wan awala tani ra. Bara Absalón nina blablikra nani ba witin nani pliki wan, sakuna witin nani wal prawras kan bara kli Jerusalem ra tawi wan.

²¹ Baha nani mahka wan ba ningkara, Ahimaas bara Janatan wal liwanhta ba wina bal takan, bamna plapan Debit ra wih sturi ba wiaia; witin nani bui witin ra win mahka bûi Jordan awala baila wala ra lui wabia, Ahitófel pat upla nani ra win witin wal aiklabaia aula.

²² Bamna Debit, ai uplika nani sut witin wal auya kan ba aikuki buan, bara aihni pali witin nani Jordan awala baila wala ra luan. Yu baiwan kat upla kumi sin yakan ninara takaskras kan.

²³ Ahitófel kaikan witin diara daukaia lukan ba baku sip takras kan, witin ai birikuka ba satil mangki uli ai watla ra wan; bara witin ai tawanka ra ai watla bîla dukia nani sut wapnika mangki si, ailangki pruan. Baku pruan, bara bri si ai papika raitika ra bikan.

Debit ba Mahanaim ra

²⁴ Debit ba Mahanaim ra wan, Absalón Israel luhpia nani aikuki Jordan awala lui auya kan ba ra.

²⁵ Amasá ba Absalón bui aiklaklabra tâura mangkan, Joab watlika ra. Amasá aisika ba Ismael uplika kum, nina ba Itrá, witin ba Abigail wal yapan kan, witinka ba Nehas luhpia mairin bara Seruiá muihnika, Joab yaptika ba.

²⁶ Absalón Israel luhpia nani aikuki Galaad tasbaya ra ai kiampka bapan,

²⁷ bara Debit ba Mahanaim ra wan taim, naha uplika nani bal takan witin wal prawi lakula daukaia: Sobí, Nahas luhpia waitna, Rabá Amón tasbaya ra ba wina; Maquir, Amiel luhpia waitna, Lodebar wina ba; bara Barzilai, Roguelim ra Galaad tasbaya wina ba.

²⁸ Bara witin nani bui witin ra bri balan krikri nani, plapta nani, dikwa nani slaubla ni daukan ba bara plawar mâ, barli mâ, plawar, mâ kâkan, bins, dus mâ nani,

²⁹ nasma laya, kwahadu, kisu bîp tialka wina, sîp tialka laya wina sin, Debit baha piaia ai uplika nani aikuki witin wal tauki ba; kan witin nani lukan, naha nani upla iwras tasbaya wina aula swapan, plun dauki bara diran sin daukisa.