2 Samuil 15 - DAWAN BÎLA AISKA

Absalón ba Debit mapara buisa

¹ Baha piua nani luan ba ningkara, Absalón witin war waginka kum brin bara aras nani sin, bara 50 waitna wal ai wîna kat main kaikaia suldiarka daknika kum paskan.

² Witin titan pali ra buan, bara tawan ra dimaia yabalka un ra wih buan. Bara unsaban uplika nani sut ai lâka wapni daukaia pliki king ra balan ba bani ra, paiwi makabi wali kan witin nani ani tawanka wina aula sapa. Uplika nani ba wibia kaka, Israel luhpia nani taika kum kiamka wina sa,

³ Absalón witin ra wi kan: “Wals, man tawankam aisisma ba kasak sa, man raitkam briaia ba aitani sa, sakuna man lâmka wapnika dauki maikaia uplika sâtka ba king mawanra âpu sa.”

⁴ Witin sin pura praki aisin: “¡Yang naha tasbaya lâka dadaukra aimakamna sa kaka, ai lâka daukaia baha nani yang ra aula ba, unsaban nani lâka ba yang kasakka lâka kat daukamna!”

⁵ Baha purkara, upla kum ai lakula daukaia ai lamara auya ba ra Absalón witin ra ai mihta sakbi, kiubi alki kiawali kan.

⁶ Israel luhpia nani sut king kaikaia wan ba ai lâka wapni daukaia dukiara, Absalón witin nani sut wal baku daukan, bamna baku dauki witin nani kupia alki kan.

⁷ Mani walhwal alkan ba ra, Absalón king ra win: —Yang bui king ra mamkabisni, ai swika Hebrón ra wamna, Dawan ra pramis takri ba bîli kat daukaia.

⁸ King, naha man dukiam dadaukra na, Siria tasbaya Guesur ra iwi kapri ba ra, Dawan wal pramis takri, witin kli Jerusalem ra waia sanska aikbia kaka, yang bui witin ra pura sunra dauki mayunaia kapri.

⁹ King pana witin ra win: —Man kupiam kumi wal was. Bamna Absalón Hebrón ra wan.

¹⁰ Sakuna baha pali piua ra, Israel kiamka nani sut ra wih wiaia upla bîla twatwilkra nani pat sakan kan. Baha nani ra win, trumpit ba witin nani nan walbia ba ra, pana pana aisabia Absalón pat king mangkan Hebrón ra.

¹¹ Baha purkara, Jerusalem wina upla 200 paiwan witin wal waia; baha nani witin wal wan ai lukanka yamni wal, Absalón yukuwan ra baha diara nani dauki kan ba tânka briras kan ba mita.

¹² Baku sin Absalón, Debit waitnika lâ kakaira nani ba tila wina, kumika nina Ahitófel ai tawanka Guiló ra iwi kan ba, baha sin paiwan ai tilara kaia, witin sakripais dauki ba ra. Baku bamna, mapara baku ra daknika ba kau ban ai karnika alki auya kan, Absalón nina blablikra nani ba sin kau ailal taki kan.

Debit Jerusalem wina plapisa

¹³ Bîla twatwilkra kum Debit ra wan wiaia, Israel luhpia nani ba Absalón daknika ra tniwisa.

¹⁴ Bara Debit wihta tara nani sut witin wal Jerusalem ra bâra kan ba, witin nani ra adar yan: —¡Kaisa nanara pali yawan sut mahka plapbia, apia kaka yawan Absalón mihta wina sip swak takbia apia! ¡Kaisa, aihni muns, apia kaka wan alkbia bara tawanka na kat yawan sut sord ni wan ikbia!

¹⁵ Witin nani pana king ra win: —Yang nani sut nâra ridi sna, king tara ba dîa daukaia wan wibia ba daukaia.

¹⁶ Baku bamna, king ai watla bîla uplika sut aikuki taki wan, ai lila mairin nani matawalsip nani baman swin, king watla ba main kaikaia.

¹⁷ King ba ai uplika nani sut ba aikuki taki wan ba ningkara, tawan lâs pali ra utla kum bâra kan ba kat takaskan.

¹⁸ Witin ai tnaya ra ai wihtka tara nani ba mangkan, bara ai kaina kir ba lika quereteo nani bara Pélet uplika nani, geteo nani wina mangkan, baku sin waitna nani 600 Gat wina ai nina blikan ba sut sin ai kan kir yakaban.

¹⁹ Baha piua ra Itai, Gat wina ba ra king bui win: —¿Dîa muni man sin yawan aikuki nâra balram? Kanra yamni, man kli tawi was bara king raya ba wal takasks, dîa dîa daukma sin sakuna man na tringsar, tasbayam wina sin pat mai kangban sa.

²⁰ Man nahwala kat nâra balram, ¿bara nahki yang bui man ra mamkabamna naiwa yawan aikuki waia, yang pali sin anira auna sapa kaikras sna na? Bahamna man ra kanra yamni sa kli tawi waia, bara uplikam nani sin man wal. Dawan yamni mai munbia, man wal sin ban wabia.

²¹ Itai king ra win: —Dawan ra bara king tara ra sin swer takisna, ani anira king tara wabia ba, raya kabia kra, prubia kra sin, sakuna dukiam dadaukra na man wal bâra kabia.

²² Bara Debit bui witin ra win: —Ban kaka, bal yawan wal wap. Baku natka ra Itai Debit wal wan, ai uplika nani sut witin aikuki balan kan ba sin.

²³ Upla sut sari pali inan, witin nani sut Cedrón tingnika bâk luan; ningkara king ba sin luan, bara upla sut witin tâura wapan, upla iwras tasbaya bâk.

²⁴ Libait nani Gâd lâka auhbaia watla ba twilki auya kan ba tilara Sadoc sin aikuki auya kan, witin nani Abiatar lama kat swin, upla nani sut tawan bîla wina takan ba kat.

²⁵ Sakuna king ba Sadoc ra win: —Gâd lâka auhbaia watla ba kli tawan ra brih was, Dawan bui yang ra yamni ai kaikisa kaka, kli ai bri balbia; bara ai lâka auhbaia watla ba mairikbia, witin takaski ba watla ba sin.

²⁶ Sakuna witin bui yang ra yamni ai kaikras sa wibia kaka, nâra ai brisa, ai kupia lâka ba kat yang ra daukaia, witin yamni luki ba kat.

²⁷ King ba Sadoc prîs ra win: —Wals, man, Abiatar luhpiam nani wâl ba kira, âmyapah kli tawan ra was. Man luhpiam Ahimaas wal, bara Abiatar ai luhpia Janatan wal.

²⁸ Man nani auma ba ra, yang lika tasba lâwan upla iwras tasbaya ra takaskamna, man nani wina sturi brimna ba kat.

²⁹ Sadoc bara Abiatar wal, Gâd lâka auhbaia watla ba kli Jerusalem ra brih wan, witin nani sin bâra takaskan.

³⁰ Debit lika Olivet ilka albangkika bâk ai mina baman ini uli wan, sari tukinka ai lal purara praki. Upla nani sut witin wal auya kan ba sin, ai lal pura praki ini uli wan.

³¹ Upla nani wina kumika Debit ra win, Ahitófel ba sin kumika Absalón wal prawi ai mapara buisa. Debit bui Dawan ra ai pura sunan, Ahitófel daukaia luki ba sut yaka bahki ra tawbia.

³² Debit il bahna ba kat wih ulan ba ra, bahara Gâd ra ai pura suni mayunan. Bara kaiks Husai arquita ba, witin wal prawaia balan, ai kwalka kalwan bara ai lal purara sin tasba yakaban.

³³ Debit bui witin ra win: —Man ba yang wal wama kaka, man bui yang ra hilp âpu wirhika baman lika aikma;

³⁴ sakuna man kli Jerusalem ra wama ba ra, Absalón ra wima kaka: ‘King tara, naha man albikam na man dukiam dauki kabia, man aisikam dukia nahki dauki katna ba baku’, baku lika man tâ baikma Ahitófel diara daukaia luki ba slingbaia,

³⁵ kan bahara lika prîs Sadoc bara Abiatar sin brisma. Baku bamna, piua bani king watla wina dîa walisma ba sturka ba sut, witin nani ra aisi bas.

³⁶ Ai luhpia nani Ahimaas bara Janatan sin bâra sa, witin nani bâk bîla bliki bas bara dîa taki ba sut ai wi bas.

³⁷ Bara Husai Debit uplika pali ba, Absalón Jerusalem ra dimi aula kan ba piua witin sin pat bâra wan kan.