2 Samuil 13 - DAWAN BÎLA AISKA

Amnón bui Tamar swira tara daukisa

¹ Absalón, Debit luhpia ba, ai lakra kum bri kan mairin painkira, nina Tamar. Bamna Amnón Debit luhpia waitna ba ai lakra ra latwan kaikan,

² latwan lâka ba ai pura luan, ban kupia wirha taki si siknis ni takan. Tamar tiara aihwa pali kan, kau waitna kumi wal sin prawras kan, witin ai mapara karna pali kan diara kum pan Tamar ra daukaia.

³ Sakuna Amnón ai uplika kumi bri kan âuya mâira pali kan, nina ba Jonadab mâki kan, witin Debit muihnika bara Simá luhpia.

⁴ Yu kum Jonadab witin ra wan bara makabi walan: —King luhpia, ¿man dîa trabil brisma? Mai kaikisna yu bani man kau siknis takisma. ¿Tânkam ba ai wiaia apia ki? Amnón witin ra win: —Muihki Absalón lakrika Tamar ra yang latwan kaikisna.

⁵ Jonadab mita witin ra smalkan nahki kupia alkaia: —Krikri ra praws bara siknis mai alkan baku taks. Baku papikam mai kaikaia wabia ba ra witin ra wis, ai pliska pali lamkra Tamar ra wibia, plun piaia maikaia man lamamra wih pata ba piakbia, man kaiki kama ba ra witin maikuya ba pima.

⁶ Amnón krikri ra prawan bara siknis taki baku daukan. Bara king ba wan witin ba kaikaia. Amnón witin ra win: —¡Pliskam pali! Tamar balbia bara nâra laimara turtiya wâl daukbia, bara witin bui maiwanra kahbia.

⁷ Bara Debit bui Tamar watla ra blikan maisa pakaia: —Pliskam pali, lamkra Amnón watla ra was, bara plun wiria dauki yas piaia.

⁸ Tamar ai lakra Amnón watla ra wan, bara kaikan witin bâra aitniki kan. Tamar plawar ba brih akbi turtiya daukan;

⁹ ningkara turtiya ba brit angkaia pânka ra bri si, ai mawanra kahban; sakuna Amnón baha pin daukras kan, witin adar yan upla wala nani bâra ba sut baha wina taki wabia.

¹⁰ Upla nani ba sut taki wan ba ra, Amnón bui Tamar ra win: —Pata ba krikriki ra bri bal, bara man pali bui aik. Tamar witin turtiya nani daukan ba brin, bara ai lakra Amnón krikrika ra brih wan,

¹¹ sakuna plun ba dakakaia ai lama kat wan ba ra, Amnón witin ra prak alki bara win: —Bal, laikra, yang wal aitniks.

¹² Witin pana win: —Apia, laikra, swiri daukpara, naku kau Israel ra daukras sa. ¡Naha sât swira lâka daukpara!

¹³ ¿Swiri lâka ba wal yang anira waia sip kamna? Bara man mampa ra sin Israel ra sinskas kum mai kulkan kabia, man ra mamkabisna man king wal aisas, witin bui man ra apia mai wibia apia yawan wal briaia.

¹⁴ Amnón witin ai bîla walras, ban alki taibi muni witin wal aitnikan, Amnón kau karna kan ba mita.

¹⁵ Witin wal daukan ba ningkara, Amnón mita kli misbara pali kaikan, ban kau misbara pali aihwa kaikan, latwanka lâka kata ba misbara lâka ra tawan. Baku bamna, naku adar yaban: —Bus bara naha wina taki was.

¹⁶ Tamar pana witin ra win: —¡Apia, laikra, man ai munram ba wal, naha wina ai lulki sakuma na saurka ba kau tara kabia! Sakuna Amnón lika witin ra walras;

¹⁷ kau ni ai albika nani ra paiwi adar yan: —¡Mairka na naha wina sâks, bara dur ba pain pali praks!

¹⁸ Albika bal Tamar latara sakan, bara durka ba pain prakan. Tamar prâk painkira dimi kan ba, king luhpia mairin tiara aihwa nani ai natka dimi kan ba,

¹⁹ ai lal ra yamhpus yakaban, ai prâka dimi kan ba kalkan, ai mihta bara ai lal ra alki, ini yabal ra taki wan.

²⁰ Bara ai lakra Absalón bui witin ra makabi walan: —¿Lamkra Amnón ba baku mai munan ki? Naha daukanka ba dukiara, laikra, man bin daukpara, sâp swis, kan witin ba man lamkra sa. Ban pali pura lui trabil taki lukpara naha dukiara. Tamar, tnaya ra lulki swin ba kaiki, ai lakrika Absalón watla ra takaskan.

²¹ Baha diara nani takan ba king Debit walan ba ra, witin kasak ai kupia sauhkan; sakuna ai luhpia Amnón ra lawi daukras kata, kan ai luhpia almuk bara latwan pali kaiki kan ba mita.

²² Absalón witin mita lika Amnón ra diara kumi sin wiras kan, sakuna ai lakra Tamar ra swira daukan ba dukiara lika misbara kaiki kan.

Absalón bui Amnón ra pana munan

²³ Mani wâl luan ba ningkara, Absalón uplika nani ba Baal-hasor ra, Efraín tasbaya lamara, sîp nani taya irbi kan, bara Absalón mita king luhpia nani sut paiwan witin wal plun piaia.

²⁴ Baha purkara, witin king kaikaia wan bara witin ra win: —Nanara upliki nani ba sîpki nani taya irbisa, brin ai daukisa king tara ba, wihta tara nani ba sin sut, albikam ba pain kulkanka yabia.

²⁵ Sakuna king pana win: —Apia, luhpi, yang nani sut sip waras kamna, lalahkam uya tikaia apia dukiara. Absalón witin ra ban taibi muni kan, sakuna king waia brin daukras kan, sakuna ai yamnika lâka ba lika yan.

²⁶ Bamna Absalón bila win: —Baha ba sip apia sa kaka, king tara ba muihki Amnón ba swika yang nani wal wabia. King ba makabi walan: —¿Dîa muni Amnón ba man wal waia brin mai daukisa?

²⁷ Sakuna Absalón ban kau aisi kan, bara king ba Amnón bara ai luhpia wala nani sin ban swin witin nani wal wan. Baha pata tara Absalón daukan ba, king piaia pata daukan,

²⁸ bara ai albika nani ra adar yan kan: “Amnón ba aman pali kaiki bas, wain ba di lilia pali takbia ba ra yang bui man nani ra mai wimna, bara man nani bui witin ba iks. Man nani baha daukaia si bripara, baha yang adarki nani sa, bahamna man nani kupiam wilinkira bara karna bris.”

²⁹ Baku ba mita, Absalón adarka win ba dauki, ai albika nani Amnón ba ikan. Bamna king luhpia nani sut buan, bara ai muyulka ra uli plapan.

³⁰ Witin nani kau yabal ra auya kan, sturi binka ba pat Debit ra wan, Absalón bui king luhpia nani sut ikan, kumi sin raya swiras.

³¹ King baha walan ba ra, bûi ai prâka kalkan bara tasba kat prawan. Wihta tara nani sut sim baku ai prâka kalkan bâra bûi kan nani ba.

³² Sakuna Jonadab, Debit muihnika, Simá luhpia ba bîla bri aisin: —King tara, baku lukbiara ai luhpia nani sut ba ikan. Amnón baman ikan. Absalón ba pat baku daukaia lukan kata, Amnón bui ai lakrika Tamar ra saura munan yua ba wina.

³³ Baku bamna, king tara, king luhpia nani sut pruan baku lukpara. Kumi pruan ba Amón baman.

³⁴ Absalón plapi kan ba ra, wahma kum aihwaki kakaira kan ba, ai nakra buki kaikan, upla daknika tara Horonaim ilka yabalka albangkika bîla bâk iwi aula kan. Bara aihwawakra ba king ra wih win, witin kaikan Horonaim yabalka bâk upla nani iwi aula kan.

³⁵ Bara Jonadab king ra win: —King luhpiam nani ba pat aula, naha man albikam luki kan ba baku.

³⁶ Witin aisi si takaskan wal baku, king luhpia nani ba bal diman bara witin nani sut sarkira pali aihwa kasak inan. King ba bara wihta tara nani ba sin ini banhwata.

^37-38 Absalón, witin lika, Guesur kingka Amihud luhpia Talmai wal plapan, bahara mani yumhpa takaskan. Bara Debit yu bani ini kan ai luhpia Amnón pura mata,

³⁹ ban sakuna baha pruanka dukiara ai maisa nihkra brin bara ai luhpia Absalón ba kaikaia brin pali dauki kan.