2 Samuil 12 - DAWAN BÎLA AISKA

Natán bui Debit ra lawi daukisa

¹ Dawan ai prapitka Natán ba Debit ra blikan wih kaikaia. Witin wih king mawanra buan, bara win: —Tawan tara kumi ra waitna wâl iwi kan. Kumi ba lalahkira pali kan, wala ba umpira.

² Lalahkira ba sîp ailal, bîp sin ailal pali bri kan;

³ sakuna umpira ba lika sîp lupia kumi baman atki bri kan. Witin pali bui pakan, sîpka lupia ba ai luhpia nani tilara pakan, ai pata pali wina dakaki kan, ai kapka di ba wina sin dakaki kan, bara ai lama bilara bri yapi kan. Waitnika ba ai sîpka lupia ra uba latwan kan, ai luhpia mairin ra latwan kaiki baku.

⁴ Yu kumi, impapakra kum lalahkira ba kaikaia wan, bara lalahkira ba witin ai daiwra nani ba wina kum iki ai uplika ra plun plit kum dakakaia watlika ra, waitna umpira sîp kumi lupia bri kata ba dakbi iki impapakra ra plun dakakan.

⁵ Baha waitnika mapara Debit ai kupia sauhkan, bara Natán ra win: —Gâd ra swer takisna, baha uplika dukiara, witin baha diara daukan ba lika pruaia aitani sa.

⁶ ¡Bara baha sîpka lupia mana kulkan ba, aima walhwal aibapaia sa, witin umpira kaikan lâka luha baku daukan ba mana!

⁷ Bara Natán bui witin ra win: —¡Baha waitnika ba sika man! Dawan Israel Gâdka, witin naku param pali aisata: ‘Yang bâk mai saki, Israel kingka mai mangkri, Saúl karnika wina sin mai dakbi sakri.

⁸ King watla ba sin maikri, dawankam mairka nani ba sin, ba purkara Israel bara Juda king tasbaya sin maikri. Naha sut na aitani apia kaka, diara wala nani sin kau pura praki maikaia kapri.

⁹ ¿Bara dîa muni yang bîli bahki kulkram, bara yang yamni kaikras sna ba man daukram? Urías hitita ba, man bui ikram, Amón uplika nani ba mita yarka ikaia, bara ai maya ba man mayam briram.

¹⁰ Baku man bui bahki ai kulkram bamna, Urías hitita maya ba, man mayam briram bamna, man wamtla wina lâ krikanka ba taki wabia apia ban kaia ra.

¹¹ Yang Dawan, param aisisni: Yang daukamna man pali wamtla bîla wina, saura ba man mampara takbia, man pali mamwanra mairkam nani ba brimna bara tamya kumika ra yabamna witinka wal yapbia, yu lapta ingnika param pali ba kat.

¹² Man lika yukuwan ra baha daukram, yang lika Israel luhpia nani sut mawanra daukamni lapta ingnika param pali ra.’

¹³ Debit ba Natán mawan ra win, rait witin saura daukan: —Dawan mapara yang saura daukri. Bara Natán pana witin ra win: —Man saurkam ba dukiara Dawan bui man ra klala maikbia apia, man sin pruma apia.

¹⁴ Sakuna man Dawan kupia kasak pali sauhkram bamna, luhpiam bisi aisubi takan ba prubia.

¹⁵ Natán ai watla ra tawi wan, bara Dawan bui daukan Debit, Urías maya wal baikan tuktika ba, siknis karna pali alkan.

¹⁶ Bara Debit Gâd ra ai pura sunan, baha tukta dukiara, kaiki plun piras kakna an tihmia tasba kat prawi kan.

¹⁷ Almuk nani king watla ra iwi kan ba, witin ra ai pura sunan tasba wina bubia wisi, sakuna king lika witin nani ra walras bara baha wina sin buras kan, witin aikuki sin iwi plun piras kan.

¹⁸ Yu 7 ningkara tukta ba pruan, wihta tara nani ba nanara sibrin lukan, baha sturka ba Debit ra wiaia, kan witin nani lukan: “Kau tukta ba raya kan ba ra, yawan mita witin ra aisin bara wan un briras kan, ¿nanara tukta ba pruan ba ra, nanara yawan nahki witin ra aisaia? Witin diara saura kum daukaia sip sa.”

¹⁹ Sakuna Debit kaikan wihta tara nani ba ai mânka ai tilara sturi aisi kan, witin tânka brin tukta ba pat pruan ba; bara witin nani ra makabi walan: —¿Tukta ba pat pruan sa ki? Witin nani pana win: —Âu, witin pat pruan.

²⁰ Baha walan ba ra Debit tasba wina buan, lî aihtaban, isint aimakan, kwala klin diman bara tempel ra wan Dawan ra mayunaia. Ba ningkara ai watla ra wan, plun piaia bara diara sin diaia.

²¹ Bara wihta tara nani witin ra makabi walan: —¿King ba dîa muni baku daukisa? Tukta ba kau raya kan bara king kaiki plun piras, witin dukiara inan baman kan, ¡nanara tukta ba pruan ba ra king ba bûi mahka plun pîsa!

²² Debit pana win: —Tukta ba raya kan ba ra, yang kaiki plun piras ini kapri. Yang lukri Dawan ba ban kra umpira ai kaikbia ban swika tukta ba prubia apia.

²³ Sakuna nanara pat pruan ba, ¿dîa dukiara yang kau ban plun piras kaia, witin pruan ba wina bukaia yang sip apia sna na? ¡Yang bui lika nanara waia sna witin wal prawaia, sakuna witin lika kli balbia apia!

Salaman aisubi takan

²⁴ Baha ningkara, Debit ai maya Betsabé maisa nihkaia wan. Witin ra wih kaikan wal asla takan, witin luhpa waitna kum baikan, Debit bui ai nina Salaman mâkan. Naha tuktika ra Dawan bui latwan kaikan.

²⁵ Bamna baku prapit Natán bâk, Dawan wina Debit ra marikan, Dawan aisin ba ra luki tukta ba nina Jedidías mâkan.

Debit bui Rabá pura luisa

²⁶ Baha piua ra, Joab bui Amón uplika nani tawanka Rabá mapara aiklabi ban auya kan, tawanka ba pat alkuya kan ba ra,

²⁷ Debit ra naha bîla blikan: “Yang bui Rabá kaina kahbaika pliska bri kan ba wal aiklabri, bara lî watla ba pat alki brisna.

²⁸ Bahamna nanara, king, mahka aiklaklabra wala nani ba asla dauks bara tawan ba aiklabi alks, baku wisi yang bui pura luri wisi yang nini mayunbia apia.”

²⁹ Bara Debit ai suldiarka nani sut asla dauki Rabá mapara impakan, bara aiklabi pura lui brin.

³⁰ Bara Rabá kingka lal wina gul kraunka ba alki brin, kraunka ra walpa manakira nani sin manis bâra kan, wirhika ba 75 paun nani bri kan, kraunka ba Debit lal ra mangkan. Diara wala manakira nani dukia manis sin tawanka wina sakan,

³¹ upla kau tawan ra bâra kan ba alkan bara wark takaia mangkan, sâ klakaia, ayan ni hu paskaia, asa ni klakaia bara walpa nani baikaia, baku sin diara angkaia watla walpa ni paskaia. Amón uplika nani tawanka nani sut wal sim baku daukan, baha ningkara ai daknika wal kli Jerusalem ra balan.