2 Samuil 11 - DAWAN BÎLA AISKA

Debit Betsabé wal

¹ Piu kum lî sikwaia piua ra, king nani ai natka ba baku war ra waia piua ra, Debit Joab ba blikan wihta tara nani aikuki, Israel suldiarka nani sut sin, bara Amón uplika nani ba sut sauhki tikan, Rabá tawanka ba sin kir kutban. Ban sakuna, Debit witin lika waras Jerusalem ra takaskan.

^2-4 Tutni kum, Debit ai krikrika ra yapi si buan ba ra, king watla bahna purara wapi taukaia pliska ba ra wapi tauki kan, baha wina mairin painkira kum kaikan, ai katka siknis wina klin taki si bal aihtabi kan. Debit upla saki blikan, wih mairka ba tânka pliki kaikaia. Tânka pliki kaikan ba ra witin ra win baha sika Betsabé, Eliam luhpia mairin, Urías hitita ba maya. Debit bîla twatwilkra nani saki blikan mairka ba bri balaia, bara witin wal krikri ra aitnikan, baha ningkara kli ai watla ra wan.

⁵ Mairka ai dahra walan kwihra tiwan kan, bara witin Debit ra maisa pakan.

⁶ Debit Joab ra adar yan, Urías hitita ba, witin ra brih balbia, bara Debit win ba baku Joab daukan.

⁷ Urías Debit mawanra buan, bara Debit bui witin ra makabi walan Joab ba pain sa sapa, suldiar nani bâra wan sturka ba sin dîa bâra sa sapa.

⁸ Baha ningkara win ai watla ra wabia bara ai mina sikbia. Urías nan king watla wina taki wan ba ra, king ba ai prisantka plun pain kum blikan;

⁹ sakuna Urías ai watla ra waia watlika ra, tihmia aiska king watla durka ra lalawan, suldiar nani king watla aihwaki kaiki nani ba aikuki.

¹⁰ Urías ai watla ra waras kan ba, witin nani Debit ra win, bara Debit bui witin ra makabi walan: —¿Dîa muni man wamtla ra waras kapram, impakanka daukram ba ningkara?

¹¹ Urías pana witin ra win: —Dawan lâka auhbaia watla holikira ba, Israel bara Juda suldiarka nani, baku sin Joab wihtka tara ba bara king wihtka tara wala nani sut, kiamp watla ra twi ra yapisa; ¿bara yang na lika waitla ra plun pi, di bara mayi wal krikriki ra yapi kaia? ¡King tara rayaka ba dukiara, yang baku daukamna apia!

¹² Sakuna Debit bui witin ra adar yan: —Naiwa baman kau nâra takasks, bara yauhka mai swirka wama. Baku Urías kau yu kum Jerusalem ra takaskan, ban yu wala kat.

¹³ Debit bui witin ra paiwan, witin wal plun piaia, diaia bara yan bla takan. Tihmia kat Urías taki balan, king watla main kaiki suldiarka nani tilara wih bahara yapan, sakuna ai watla ra lika waras.

¹⁴ Yu wala titan ra, Debit wauhkataya kum ulban bara Urías ra yan, Joab ra brih waia.

¹⁵ Wauhkataya ra naku ulban kan: “Urías ba anira war karna aiklabi ba tâ pali ra mangks, bara baha ningkara witin ai mânka swis, baku witin insauhki prubia.”

¹⁶ Baku bamna, Joab tawan ba kutbi brih mahka aiklabaia, witin ai dara wali kan anira suldiar nani kupia kau karna nani bâra kan ba,

¹⁷ baha kat tawan main kakaira nani ba pat dingki balan Joab mapara aiklabaia, bara Debit wihtka tara nani tila baha aiklabanka ra kauhan, Urías sin baha nani tilara kauhan.

¹⁸ Joab bui Debit ra maisa pakanka ba sitnika wina blikan wan,

¹⁹ bara bîla twatwilkra ba ra naku ai bîla smalkan: “War aiklaban sturka ba sut king ra wima ba ra,

²⁰ sip sa king ba ai kupia baiki naku mamkabi walaia: ‘¿Dîa muni witin nani ban tawan lamara pali dimi aiklaban? ¿Witin nani ai dara walras kan ki, baha nani tawan kutbanka ba pura wina diara lulki ba,

²¹ Tebés ra mairin kum bui Abimélec, Jerubaal luhpia ra ikan ba baku, tawan kutbanka pura wina akbaia walpaya kum lulki? ¿Bara dîa muna ban tawan kutbanka lamara wan?’ Baku aisabia kaka, man bui witin ra naku wis: ‘King wihtka tara Urías hitita ba sin pruan.’ ”

²² Bara maisa papakra ba Debit ra wan, Joab ai bîla blikan ba sut witin ra win. Debit baha walan ba ra Joab mapara kasak ai kupia baikan, bara maisa papakra ra win: —¿Dîa muni ban tawan lamara dimi wan? ¿Dîa witin nani ai dara walras kan ki baha nani tawan kutbanka pura wina diara lulki ba, Tebés ra mairin kum bui Abimélec, Jerubaal luhpia ra ikan ba baku takan, tawan kutbanka pura wina akbaia walpaya ni lulki saban? ¿Bara dîa muni, ban tawan kutbanka lamara pali wan?

²³ Bîla twatwilkra ba pana win: —Suldiar nani aiklabaia maipara twi ra taki balan ba karna kan, sakuna yang nani bui ninara kitbi tawan dimaika kat brih wari.

²⁴ Bahara trisba lalulkra nani tawan kutbanka pura wina trisbaya lulki kan king suliarka mapara, bara wihta tara nani tila pruan, baha nani tilara Urías hitita ba sin ikan.

²⁵ Bara Debit bui bîla twatwilkra ba ra win: —Joab ra wis, baha dukiara witin ban pali trabil taki lukbiara, war tânka ba baku sa. Sakuna tawan ba kau tânkira pruks, sauhki tikaia praiska kat, sakuna man bui witin ra kupia tâ baiks.

²⁶ Baha sturka Urías maya walan, ai maya ba sin pruan ba, bara witin ai dukiara sari tara brin;

²⁷ sakuna witin ai sarka ba luan ba ra, Debit upla blikan mairka ba mata, bara witin king ai watla ra brin ai maya, bara witin luhpia kum baikan. Sakuna Debit daukan ba, Dawan bui yamni kaikras kan.