2 Samuil 10 - DAWAN BÎLA AISKA

Debit bui Siria uplika nani bara Amón uplika nani pura luan

¹ Piua nani wiria luan ba ningkara, Amón uplika nani kingka Nahas pruan, bara ai watlika ra ai luhpia Hanún king aimakan.

² Bamna king Debit lukan, witin Nahas ra sin yamni munaia, papika mita witin ra yamni munan yamnika ba baku. Tila wihta tara nani ba blikan Hanún ra waia, aisika pruan dukiara sarka maisa nihkra lakula ba yaia. Sakuna Debit wihtka tara nani ba Amón uplika nani kuntrika ra wan ba ra,

³ Amón lalka tara nani ba Hanún ra wan: “¿King tara ba kasak lukbia, Debit wina baha waitnika nani blikan ba sarka ba maisa nihkaia lakula daukaia king tara papika pruan ba, pain kulkan lâka yaia baman dukiara? ¡Kasak sika baha nani ba diara nani kaikaia blikan tawan ba biki kaikaia, baha ningkara bal sauhki tikaia!”

⁴ Bara Hanún adar yan, Debit wihtka tara nani ba aihni prak alkaia, bara un maya nani ba bakriki irbaia, kwalka nani ba sin kalki tnata taya kat swiaia. Ba ningkara swin wan.

⁵ Debit baha walan ba ra, upla blikan wal prawaia, saura pali swira daukan ba mita, adar yan Jeriko ra takaskaia, ai unamaya ba kli pâwbia ba kat kli tawi balbia.

⁶ Amón uplika nani ai dara walan, witin nani bui waihla lâka Debit mapara bukuya ba, bara Siria tasbaya Bet-rehob wina, Sobá wina sin suldiar nani 20,000 mana aibapi brin, king Maacá wina sin 1,000 kum suldiar nani brin, wala 12,000 suldiar nani Is-tob wina.

⁷ Sakuna Debit baha sturka walan ba ra, aiklaklabra karna nani ba sut blikan Joab wal.

⁸ Amón uplika nani ai tawanka lata tani ra taki bâra aiklabaia ridi takan, bara Siria suldiarka nani Sobá bara Rehob wina ba, bara Is-tob wihki Maacá wina war daknika nani ba lika, kau ai kanra blikan bara ai pliska dauki brin.

⁹ Joab ai dara walan baha daknika wâl ba witin ra pura lubia, bamna Israel wina suldiar nani kau aiklaklabra pain nani ba bâk sakan, Siria uplika wal aiklabaia dukiara.

¹⁰ Ningkara kau wala nani kan ba, ai muihni Abisai adarka ra swin, baha nani Amón uplika nani wal aiklabaia.

¹¹ Bara ai muihni ra win: “Siria uplika nani ba kau karna kabia kaka, yang ra man balma hilp ai munaia. Amón uplika nani ba kau karna kabia kaka, man ra, yang wamna hilp mai munaia.

¹² Kupiam lukra bri bas, wan kupia karna aiklabaia, wan nisanka nani ra luki, wan Gâdka tawanka nani ba ra sin lukaia. ¡Bara Dawan bui kau yamni kaiki ba kat wan daukbia!”

¹³ Joab ai daknika wal Siria uplika nani lamara dimi wan mahka aiklabaia, sakuna baha nani sibri mahka plapan.

¹⁴ Amón uplika nani kaikan, Siria uplika nani plapi kan ba ra, witin nani sin Abisai sîa plapi tawan ra wih diman. Bara Joab aiklabras, kli mahka Jerusalem ra tawi wan.

¹⁵ Siria uplika nani ai dara walan Israel luhpia nani bui ai pura luan ba, bara witin nani kli asla takan.

¹⁶ Éufrates awala baila wala ra Siria uplika nani bâra kan ba, Hadad-ézer bui mata blikan bri balan, baha nani Helam ra wan. Sobac suldiar wihtka tara ba Hadad-ézer daknika tâura wapi kan.

¹⁷ Sakuna naha sturka nani Debit ra win, bara witin bui Israel suldiarka nani sut brih takan, Jordan awala baila wala ra luan, bara Helam ra wan. Baha ra Siria uplika nani Debit wal prawan, bara Debit mapara aiklaban,

¹⁸ sakuna lâs kat Siria uplika nani ba Israel luhpia nani sîa plapan. Debit bui aras âiulra nani 40,000 ikan bara war waginka 700; baha purkara, Debit mita Sobac sin ikan, Siria suldiar wihtka tara ba.

¹⁹ King nani sut Hadad-ézer wal ai pânika takan ba kaikan, bara Israel luhpia nani bui ai pura luan ba, witin nani Israel luhpia nani wal kupia kumi lâka daukan bara witin nani ra bawan. Baha yua wina Siria uplika nani sibrin takan, bara kli Amón uplika nani ra hilp munras.