2 Samuil 1 - DAWAN BÎLA AISKA

Debit ba Saúl pruan sturka walisa

¹ Saúl pruan ba ningkara, Debit Amalec uplika nani ra aiklabi pura lui si kli Siclag ra wan, bahara yu wâl takaskan.

² Sakuna yu yumhpa luan ra Saúl kiamka wina waitna kum balan, prâka kalwan, ai lal ra sin tasba yakaban sari tukinka baku. Witin Debit lama kat bal ai lal tasba ra bawi kulkanka yaban.

³ Debit bui witin ra makabi walan: —¿Man ani wina aulma? Waitna ba pana win: —Israel kiampka wina, yukuwi swakwi plapi aulna.

⁴ Debit bui witin ra taibi muni, makabi walan: —¡Bamna, ai wis! ¿Dîa pali takisa? Witin pana win: —Aiklaklabra nani ba war wina plapan, bara witin nani manis pruan. ¡Bamna Saúl ai luhpia Janatan wal sin pruan!

⁵ —¿Man nahki tânka briram, Saúl bara ai luhpia Janatan wâlsut pruan ba? —Debit bui baku makabi walan sturka bri balan albika ra.

⁶ Waitna ba pana win: —Yang tâinka briras nahki, sakuna Guilboa ilka ra kapri ba ra, kaikri Saúl ai langsika purara ai tâ baiki bâra kan, bara waihla nani ba sin aras ra uli wagin nani bri pat lamara aula kan alkaia.

⁷ Baha kat witin ai ninara tawi ai kaiki ai winan, bara yang dîa ai wibia ba kat aitani luki kapri.

⁸ Bara makabi walan yang ba ya. Pana wîri, yang ba Amalec uplika kum sna.

⁹ Bamna yang ra maikaban ai lamara wamna bara witin ra ikamna ai win, kan witin kau raya kan sakuna prura wirhika ba pat taiban kan.

¹⁰ Baku yang lika witin ba lamara wih bara ikri, kan tânka briri witin kauhan ba wina kli lika buaia apia kan. Ningkara, lal wina kraunka ba sakri, bangkilka ba sin klahkla ra bri kan ba, baha nani man ra bri balaia dukiara, mâsiki waitna.

¹¹ Bamna Debit bara ai uplika nani sut, ai prâka kalkan ai kupi wirha diman ba tânka,

¹² bara Saúl ai luhpia Janatan wal pruan ba dukiara ini, ai kupia wirha pali brin, Israel luhpia nani, Dawan war aiklaklabrika nani ra waihla nani bui pura luan ba dukiara, bara kaiki sin plun piras ban tutni kat kan.

¹³ Baha ningkara, Debit kli makabi walan baha wahmika bîla bri balan ba ra: —¿Man ani wina? Witin pana win: —Yang na upla kiamka wala kumi sna Amalec wina.

¹⁴ Debit ai bîla baikra karna saki aisin: —Alai, ¿baku kan nahki man kupias taki, Dawan bui bâk saki mangkan kingka ba mapara mihtam bukram?

¹⁵ Bara ai uplika kum winan balan bara win: —¡Naha bri si iks! Bara witin bui Amalec uplika ba bri si ikan piua ra,

¹⁶ Debit bui witin ra win: —Prura pâtka ba man lamla ra sa, pâtkira sma damra ba man bui param aisi sakisma, Dawan bui bâk sakan kingka ba man bui ikram bamna.

Saúl bara Janatan wal dukiara inan lawana

¹⁷ Bamna Debit naha inanka lawana na aiwanan, Saúl bara ai luhpia Janatan wal pruanka ba dukiara.

¹⁸ Witin sin adar win Juda uplika nani ra sin smalkaia. Naha lawana na Kasakkira Wauhkataya ra ulban sa:

¹⁹ “¡Alai, Israel, man nani pramna ba ilkam nani tilara insauhkan! ¡Tahplukam nani nahki kauhan ba!

²⁰ Gat uplika nani ra wipara, Ascalón yabalka nani ra sin sturka na aisapara, filisteo mairin nani ba lilia takbia apia dukiara, baha idan mairin nani ba sin lilia pulbia apia mata.

²¹ “¡Guilboa ilka nani, man puramra diwas laya kli kauhbia apia, lî sin auhbia apia, pruan nani langnika takram bamna! Bahara karnakira nani kan kahbaika nani baha nani ai mina ra taiban. Baha ra Saúl kan kahbaika ba siksa takan.

²² “Piua kumi ra sin Saúl bara Janatan wal ai sordka bara ai trisbaika nani ba war aiklaklabra tahpla nani tâlia bara batanka ra buskras kaka, balras kata.

²³ “Saúl bara Janatan wal latwankira pali kan, ai rayaka ra bara ai prurika ra sin sip dakwi takras kan. ¡Yakal wal sin kau isti plapi kan! ¡Layan wal sin kau karna kan!

²⁴ “¡Israel luhpia mairin nani, Saúl dukiara ins, witin bui kwala balianta talia bara linin painkira mai dingki kan, gul dukia nani wal pramna dauki kan ba!

²⁵ ¡Nahki tahplu nani ba war aiklabi langni ra kauhan! ¡Janatan ba man ilkam nani purara pruan!

²⁶ “¡Muihki Janatan, man dukiamra kupi wirha pali sa! ¡Latwan lâka sâtka nani ai muni kapram! Man latwankam ba, mairin latwanka lâka ba pura luan.

²⁷ ¡Tahplu nani nahki kauhan ba! ¡Aiklabaia dukia nani ba sut sauhki tikan sa!”